یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
سئوگی ایستیکانی / خوشنام
سنی، سئوگی ایستیکانیندا-
چای یئرینه ، جالادیم،
دوداقلاریما توخونمادان
اوره ییمه چالپالاندین آخشام-آخشام.
کوچه نیزه سو یئرینه
گؤزلریمی سؤکوب سَپدیم
سن گلمه دین!…
توز اَلندی کوچه لره
اَلک- اَلک
اَتک- اَتک
شیمشک لر ده شاخدی اوگون
کؤلگن قاپیمیزا دوشمه دی کی،
خیالیما سن گله سن!
آلما آتابیلمه دیم کی،
نارگلسین!…
یاخاسی دارکؤینک یئرینه
دار قورولدو کوچه نیزده
سئوگیمیزین اعدامینا!
دار آغاجین سلاملادیم
گؤزلریندن سؤز دانیشدی!
حامی بیزه یالان دئدی
تک او منه دوز دانیشدی!
حؤرویونو گتیرمیشدی
سنمی وئردین؟
اؤپوب قویدوم گؤز اوستونه
قوجاقلاشدیق گؤزلرینده
شیمشک شاخدی بولودلاردان
سن اَلندین اوستوموزه!
یادیندامی؟
اوگون سنه سؤیله میشدیم:
– اؤله سییه سئوه جه یم گؤزلرینی
اؤله سییه!…
خوشنام
