یئنی یازې‌لار / Yeni Yazılar
آنا صفحه Ana Səhifə / ادبیات / دووارسېز اۏتاق / نیگار خیاوی (حیکایه)

دووارسېز اۏتاق / نیگار خیاوی (حیکایه)

Nigar-Xiyavi-www.YeniQapi.com-1

دووارسېز اۏتاق / نیگار خیاوی (حیکایه)

 

– گؤڲۆن هاراسېنا سن باخسان، دیک اۏردان بیر آی گؤیه­‌ریر

– گئنه باشلادېن رۏمانتیک-رۏمانتیک دانېشماغا

– سن باخاندا اولدوزلار آیلاشېر إله­­‌بیل. گؤڲ اۆزۆ دۏلو اۏلور آیېنان. قۏرخورام…

– آیا باخسان قۏرخمازسان… من یانېندا اۏلسام دا، اۏلماسام دا سن همیشه آیا باخ!

سۏنرا کیشی گئدیب بیر آلایانمېش شام گتیردی. گۆلۆمسه­‌یه‌رک:

– بونو اوشاق‌لېغېمدا تاسوعا گۆنۆ مچیددن اۏغورلامېشام. شاه مچیدیندن. نذیر شامېدې. تورشوموش قېزلارېن نذیر شامې. اوشاق‌لېغېمدان ساخلادېغېم قېوېر-زېوېرلارېن آراسېنا آتمېشدېم قالمېشدې.

قادېن قالخېب بیر لامپا گتیردی. شامې، لامپانېن آلتېنا یئرلشدیردی. شامېن ایشېغې چۏخالدې.

– هه، یاخشې اۏلدو. بئله­‌سینه ألیم ده قېزېشېر… سن هانسې یۏلدان گلیب چاتدېن منیم چاتلاغېما؟

– بیلمیرم، منیم هوشوم باشېمدا دڲیل کی… سۏووشدوغوم خیابان‌لارېن هئچ بیریسی‌نین آدېنې اۏخویا بیلمه­‌دیم.

– هوشووون باشېنا نه گلمیشدی کی بورا گلنده؟ کئشکه بیر-ایکی‌سینی اۏخویا بیلسه’یدین.

– دینمه! سس گلیر، گئنه ده ساچ‌لارېوې دارایېرسان؟

– سن گلنه کیمی هامېسې تؤکۆلدۆ. منیم ساچېم یۏخدورکی.

– گئنه ده أل‌لرین اۆشۆیۆر؟ ساچېوې داراماغې‌نېن سسی منی بوراجان چکیب گتیردی.

– آی آللاه… نه­‌لره فیکیر وئره بیلیرسن گؤر. سن ایسته­‌سن تزه­‌دن گؤیرده بیله‌رم اۏنلارې. گؤرۆرسن نئجه بۏشالمېشام قۏرخولارېمدان… بیر سؤز دئسم گۆلمزسن؟

– گۆلسم جینله‌­نرسن؟

– ایندی من أته­‌ڲیمی بو یاغان قارېن آلتېنا آچېب، اۏندان بیر أتک تۏپلایاجېیام. اؤزۆن گؤره­‌جکسن. اینانېرسان منه؟

– سن نییه بو قدر قادېنسان. نئجه باجارا بیلیرسن بیر بئله قادېن‌لېغې؟

– قادېن قالماق چۏخ گۆج ایستیر. بونو سۏنرالار باشا دۆشدۆم. گؤردۆم ایچیمده قۏرخولو درین چوخورلار وار. آما هردن دیکسینیرم ده. قۏرخورام قادېن‌لېغېمې لاپدان دانالار. دڲیشکن بیر شئی‌دیر قادېن‌لېق، حایات کیمیدی.

– بیز ایکیمیز ده بیر یانقې‌نېن اۏرتاسېندا أریییریک. أل‌لرین هله ده اۆشۆر؟

– هارا گئدیرسن؟ گئتمه. بوردا قال، قۏی بیرآز هَده‌رن-پَده‌رن دانېشاق. سفئحله­‌یَک.

– هئچ یئره یۏل یۏخدور. گئدیرم زئرزه‌میدن شاراب گتیرم بیرآز. آدامېن اؤز ایچیندن باشقا، سېغېناجاق یئری یۏخدور. بارداغېندا نه‌یین وار سنین؟

– من ده شاراب ایچیرم… ساغ‌لېغېوا! قۏرخورام بیر- بیریمیزین یانېندا دا اؤز ایچیمیزی تاپا بیلمه­‌یک. ألیم قېزېشسا گئده‌جکسن؟

– نوش اۏلسون… ایکی آغاج أکمک ایستیرم آدېمېزا عزیز. بیر-بیری‌نین یانېندا. هئچ کسیلمه‌­یه‌­جک اۏلان ایکی آغاج… دۆنیادا أن چۏخ سئودیڲین آغاج هانسې‌دېر؟

– من هر آخشام سَسیمی گۆلداندا أکیرم، هر آخشام. اؤزۆ ده کؤلگه‌ده. اؤزۆ ده یۏل یئرییه-یئرییه. من چۏخ یۏل یئریمیشم. آما آخېردا گئنه باشلادېغېم یئره چاتمېشام. تؤوشۆلۆ-تؤوشۆلۆ. چکیل بیرآز یان دور مندن. آیاغېم قانا باتېر. پالچېغا باتېر. کؤرپه­‌یه باتېر. أل‌لریم کؤرپه’­یله دۏلودور. أل‌لریم کؤرپه تېخې’یلا دۏلودور. بیر تۆکانېن بۆتۆن صابېن‌لارېنې آلدېم، دۆز بیر گۆن یارېم سۆره‌­سی حامامدا قالېب أل‌لریمی یودوم. أل‌لریمین قۏخوسو گئنه چکیلمه­‌دی. سۏنرا یوخودان آیېلدېم. آما تک ایدیم. سن منده گیزلنمیشدین. سنی گیزلتمیشدیم.

– من اوشاق‌لېغېمدان بَری گئجه‌­لر سنین یوخووو گؤرۆردۆم، 9-8 یاش‌لارېمدان بیر قادېن یاشاردې من’له. اۏ سن ایدین. ایندی ده سنین یوخووو گؤرۆرَم.

– هئچ بیلیرسن من نئچه قارېن دۏغموشام؟ بیلیرسن نئچه قارېن، اوشاق زیان إله­‌میشم؟ بو شهرین مریضخانالارېندا هرگۆن دۏغوب، هرگۆن زیان إله­‌میشم. ألیمدن جانا گلیب شهرین بۆتۆن  مریضخانالارې دا. هرگۆن منه بیر دار آغاجې قورولور. آسېلېرام هرگۆن… باغېشلا! بونلارې سنه نییه دانېشېرام آخې. منی یوخولارېندا نه جۆر گؤرۆرسن، هن؟ هئچ اۏلماسا بیری‌سینی دئ، تئز اۏل، تئز اۏل دئ!

– ایسته­‌دیک‌لریمی آنجاق یوخودا سنه آچېقلایا بیله‌رم. آما سن یوخولارېما گلیب گیزله‌نیرسن، اۏنا گؤره­ بیر-بیریمیزه تانېنماز قالېرېق. بارماق‌لارېوا باخ، بوز قندیلی کیمی آسلانېب.

– گئنه تک قالاجام سن گئتسن. سن منه خییۏو چایې‌­نېن شۆولۆک­‌لریسن. اؤزۆمۆ سندن کئچیرده بیلمیرم. سندن کئچه بیلمیرم.

– یوخولارېمېن بیرینده گؤردۆم بیر دره ایچینده باغېرېرسان. بدنی‌نین هریئریندن آچېلېب یومولان آغېزلار جۆجرمیشدی. سن باغېردېقجا اۏ آغېزلار یئره أله­‌نیردی. سنی ساچ‌لارېندان تانېدېم. یئره أله‌نن آغېزلار آچېلېب یومولاندا، آچېلېب یومولان آیرې آغېزلار إشیڲه فانتاللېردې. دره‌­نین ایچیندن بیر شهرجه آدامېن باغېرتېسې گلیردی.

– یوخولارېن چیندی. هه یادېمدا، یادېمدا! باغېرېردېم اۏ گۆن. اۏنلارېن هامې‌سېنې من أمیزدیرمه­‌لی’یدیم. سن ده گؤردۆن؟ إشیتدین؟

– هه… سنی گؤرۆردۆم. آما ها گۆجه‌نیردیم، إشیدَنمیردیم. سَسیوی آیېرد إدَنمیردیم بیر شهرین باغېرتېسېندان. نفس کۆشۆلتۆسۆ، آت کیشنَرتیسی، سئل کۆکره­‌مه‌­سی، پارتلایېش، قان آخما سَسی، ماشېن قېژېلتېسې. سن اۏنلاردان نئجه قۏرخموردون؟ آیاغېوا ایلیشن جنازه‌لردن دیکسینمیردین به؟

– قۏرخونون اۆزۆنه دورموشدوم اۏ گۆن‌لر. آمما اؤزۆملۆک دڲیلدی کی. اؤزۆم سئچمه‌­میشدیم اۏ وضعیتی. اۏنا گؤره ده شیشمه­‌ڲه گلمز. هامې اۏ گۆنه قالمېشدې یانې. قَنۏولاردا لاخېم-لاخېم قان. هئش کیم اؤز جانې‌نېن هایېندا دَڲیلدی. هرکس اۏ بیریسی‌نین هایېندایدې. دمیر سَسی،  تۆستۆ قۏخوسو گلیردی آغېزلاردان. آغېزلار إله­‌بیل بیر ماققاج’لا آچېق ساخلانېلمېشدې، هامې دانېشېردې، هئچ کسین سَسی إشیدیلمیردی، گؤزلر ایسه یومولو قالدېقلارې یئرده دۏندورولموشدو.

– سۏنرا سنی گلین آپارېردېلار قارقالار، هر آخشام اۆستۆ. قېزلار أل-أله وئریب اۏخویوردولار. قارقالارېن توشو’یلا قاچا-قاچا لاپ قاباقدا اوچان قارقانې بیر بیرینه گؤرسه‌­دیردیلر:

گلین اۏ دې! … یۏخ اۏ بیری‌سیدی!…  بوداخا بوداخا گلین بودو، دئییردیلر.

– أصلینده من، هئچ گلین کؤچمه­‌دیم کی. منی گلین کؤچۆرتمه‌­دیلر. گلین‌لیک دۏنو گئیینمَزدن منه گردَک اۏتاغې بَزه‌­دیلر. دَرزی‌لرین باش قاشېماغا ماجال‌لارې یۏخ ایدی. هامېسې کفن بیچیردی. قۏی گؤرۆم … یۏخ! گردَک اۏتاغېم دا اۏلمادې هئچ منیم. دئدیلر قان سو یئرینه آخېر. گلین‌لیک دۏنونون أته‌­ڲی قانا باتار عایېب اۏلار. من ده اوتاندېم. اوتاندېغېمدان یاناق‌لارېم پؤرتدۆ. منی بَزه‌­مه‌­دیلر ده گلین‌لر کیمی. سۏنرا اؤز ألیم’له دۏداغېما، یاناغېما قان چکیب قېزارتدېم. گؤزل اۏلدوم. دېرناق‌لارېمې دا خېنا یئرینه قان’لا بۏیادېم. آنام جئهیز صاندېغېنې آچېب قېرمېزې یای‌لېق گتیردی. بئلیمی باغلاماغا قاینېمې چاغېردېلار. آچېلېب یومولان آغېزلارېن آراسېندان آیېرد إدنمه­‌دیلر اۏنو. آتامې فیرقه­‌چی‌لیکده آسمېشدېلار. اۏنا گؤره بؤیۆک قارداشېمې چاغېردېلار منه خئیر دوعاسې وئرمه­‌ڲه، “اۏ اؤزۆنۆ فلسطین میللتینه آداخلاېیب گئدیب”، بۏیلو آروادې دئدی. اۏرتانجېل قارداشېمې چاغېردېلار “دۏستاقدان بیر دسته چئریک ایله قاچېب، نَمی-نیشانې یۏخدو” دئدیلر. کیچیک قارداشېمې چاغېردېلار، “کۏکتۏل مۏلۏتۏفنان اۏینور”، دئدیلر. آتام إویندن، خئیر دوعاسېز یۏلا سالېندېم. نیشانلېم، باشېمدان قېزېل آلما آتماغا داما چېخاندا، باشېندان گۆللـه­لندی. ألینده­‌کی قېزېل آلما دېغېرلاندې-دېغېرلاندې گئدیب گردَک اۏتاغېما چاتاندا پارتلادې. آنام دئدی: “سنه دئمه‌دیم قانا باتارسان؟” من اوتاندېم.

– سن’له من، آجې گرچک‌لر یېغېنجاغې‌یېق، ظالېمېن قېزې! تۆک‌لریم بیز بیز اۏلور، دریم اولدوز اولدوز.

– قۏرخورام گرچک‌لیڲیمیزدن…

– سنی آلماق ایستیرم.

– سن گله‌نـه کیمی منی آلېب آپاردېلار. ساتېلدېم.

– أل‌لرین أریییر شام تکی. اۏوجونون ایچی تَر مونجوغو’یلا دۏلودور.

یازار / Yazar : آیناز بزرگان

بو یازېنې دا اۏخویون /Bu Yazını da Oxuyun

Lalə Əşgiyə-YeniQapi.com-2

علی قۏماندان / لاله أشگیه (حیکایه)

علی قۏماندان / لاله أشگیه (حیکایه) آخشام ساعات‌لارې’یدې. مشدعلی آغا داها إوه دؤنمه‌میشدی. کۆبرا خانېمېن …


Warning: count(): Parameter must be an array or an object that implements Countable in /home/yeniqapi/public_html/wp-includes/class-wp-comment-query.php on line 399

Leave a Reply

Your email address will not be published. Required fields are marked *