دووارلاردان قاچماغا دۆشۆنۆرم / سحر خیاوی (شعر)

دووارلاردان قاچماغا دۆشۆنۆرم / سحر خیاوی (شعر)

عؤمۆر-گۆن کؤرپه‌جیڲیمیزین،
یارېمجان چېلپاق گؤوده‌سی
اوزانېب دلی کۆلک‌لر قارشې‌سېندا؛
قېزمار گۆنش آلتېندا
آج-یالاواج قابېرقالارې‌نېن سۆمۆڲۆ سانانېر
قوزقون‌لار پوسقودا دوروب بیزی یئمه‌ڲه
دۆنیا “سئلفی” چکیر گؤوده‌میزدن
عارسېز-عارسېز
بیر-بیرینه گؤرسه‌دیر گۆله-گۆله
من بیر درین قویو قازمېشام بۏغازېمدا
گیزلیجه،
هر گئجه گۆنۆمۆزۆ آغلایېرام اۏنا
دۏلمور، دۏلمایاجاق
جهنم قویوسودور سانکې
آفریقا چؤللۆک‌لری‌دیر بوراسې اۏلمایا؟
باخېرام گئجه دیش‌لریندن هؤرولمۆش سرت دووارلارا؛
آسلان‌لار آیاغې قانداللی باغېرېرلار آرخاسېندا
بیزی چاغېرېرلار
من…بو دووارلاردان نئجه آشماغې…
نئجه اوچماغې
نئجه قاچماغې دۆشۆنۆرم!!

سحر خیاوی