یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
دارېخمالار / آینار تبریزلی (شعر)
سنی سن‌سیزجه گزن کۏر خییاوان‌لار دارېخېر
و ایچیمدن سۏووشان وحشی بۏران‌لار دارېخېر
بو سېخېلمېش دووارېندان قۏپا بیلمیر اۆره‌ڲیم
جانا حسرت قالانې جانېما جان‌لار دارېخېر
دارېخان گؤڲ‌لره باخ، یۏل‌لارا سَرمیش اۆره‌ڲین
بۏینو چیڲنینده قالان یۏلدا قالان‌لار دارېخېر
بئله پۏزقوندو ایچیم، زیل سَسیمی بم قېنایېر
منی تصویره چکن شعره اۏزان‌لار دارېخېر
نئچه مین‌لر یالانېن قوربانې اۏلموش سئوگیم
سن گئدیرسن منه بو دادلې یالان‌لار دارېخېر
داها سېنمېر دۏداغېمدان گۆلۆشۆم بیر پارچا
سنلی چاغ‌لارېما هئی یاخشې یامان‌لار دارېخېر
دئه آنام دا هله‌لیک ساچ‌لارېمې اۏخشاماسېن
آینارام شعریمه سس‌سیزجه جومان‌لار دارېخېر
آینار تبریزلی
