توتساق دیلیمیز / دومان بختیاری (شعر)

توتساق دیلیمیز / دومان بختیاری (شعر)

دیلیمیز توتساق اۏلاندان آنام آغلار قالدې
دۏداغېندا داغېلان قېرمېزې داغ‌لار قالدې

باغا قار دۆشدۆ گۆلۆن قۏل- بوداغې قۏورولدو
پایېز اوغروندا سېنان یالخې بوداق‌لار قالدې

گۆنشین باغرې یارېلدې قارا قان قایتاردې
یادداشېندا یازېغېن ساپ-سارې چاغ‌لار قالدې

دیلي باغلې ألی باغلې آیاغې قانداللې
آنالار یاندې کۆل اۏلدو لال اوشاق‌لار قالدې

اۏخولون هنده‌ورینده یازېمېز دۏغراندې
فیکریمیز دۏندو قېفېللاندې دۏداق‌لار قالدې

کئچمه‌گه چرچیوه‌سیندن آنامېن یۏل سالدېق
چؤکۆلۆب تۏرپاغا باغلاندې آیاق‌لار قالدې

سارې گۆل قارقېشا توش گلدی بیزیم باغ‌لاردا
هامې شن‌لیکده بیزیم قاپ-باجا باغلار قالدې

دومان’ېن دردی دئشیلدی قایالار سسلندی
تیتره‌دی سؤز چاناغې سېندې چاناق‌لار قالدې

سېناغا چکدی إلین دیل دنیزیندن کئچدی
اۏنون آردېندا سۏلان یاشلې یاناق‌لار قالدې.
.