یئنی یازې‌لار / Yeni Yazılar
آنا صفحه Ana Səhifə / ادبیات / نثر / حیکایه / تئلئفۏنداکې اؤلۆم سَسی… / آرزو موراد (حیکایه‌)

تئلئفۏنداکې اؤلۆم سَسی… / آرزو موراد (حیکایه‌)

arzu murad-yeniqapi.com-

تئلئفۏنداکې اؤلۆم سَسی… / آرزو موراد (حیکایه‌)

 

یئنه‌ دوردوغوم یئرده‌ اۏنو خاطېرلادېم. أصلینده‌، “خاطېرلادېم” دئمه‌ڲیم دۏغرو دَڲیل، من کی اۏنو اونوتمامېشدېم. یادېما تک اۏلاندا تئلئفۏن’لا‌ تانېمادېغېم عۆنوان‌لارا زنگ وورماغېم دۆشدۆ. فقط ایل‌لردیر بیر نؤمره‌نی هئچ اونودا بیلمیرَم.

 

10-نجو صینیفده‌ اۏخویوردوم، یانوار آیې‌نېن 15-ی ایدی. هئچ بیلمیرَم بو تاریخی نه‌ ایله‌ یاد‌دا ساخلامېشام. صینیف یۏلداشېم آی‌گۆن دئدی کی، بئکار اۏلاندا تانېمادېغېم نؤمره‌لره‌ زنگ إدیب جماعتی أله‌ سالېرام. اۏنو بو حرکتینه‌ گؤره‌ مذمَّت إدیب “تئلئفۏن هۏلیقانې” دئمیشدیم. همین آخشام إوده‌ هئچ کس اۏلمادېغېندان باغرېم چاتلایېردې، ایشېق‌لارېن دا سؤنمه‌سی لاپ سېخېردې منی. آی‌گۆنۆن گۆندۆز إتدیڲی تکلیف بئینیمی مشغول إتمه‌ڲه‌ باشلادې. من ده‌ آدېنې “هۏلیقان‌لېق” قۏیدوغوم حرکتی سېناقدان کئچیرمک ایسته‌دیم.

 

بیر نئچه‌ نؤمره‌یه زنگ إتدیم، گؤتۆرمه‌دیلر، إله‌ بیل سؤزلَشمیشدیلر. بختیمدن‌ گیلئیلَنیب تئلئفۏنو بیر بوجاغا تۏلازلادېم. سۏنرا یئنه‌ اؤزۆمده‌ گۆج تاپدېم، اوزاندېغېم یئردن قالخېب تئلئفۏنو گؤتۆردۆم و بایاق توتدوغوم نؤمره‌‌لردن بیرینه‌ تکرار زنگ ووردوم. گوشی‌نی بیر قادېن گؤتۆردۆ. مۆلاییم، تیترک سَسیندن‌ 27-28 یاشلې خانېما بنزه‌’سه ده‌، سۏنرا‌لار صؤحبَتیمیز زامانې دئدی کی، 48 یاشې وار. آدې لاله‌ اۏلان بو خانېم سوبای ایدی، تک یاشایېردې، پیانۏچو ایدی. غریبه‌ اۏلان اۏدور کی، منیم بئکار واختېما دۆشمه‌سیندن‌ ذرّه‌ ده‌ ناراحات‌لېق دویموردو. بلکه‌ ده‌ واختېمېن یاخشې اۏلمادېغېنې دویوردو، بلکه‌ اۏ دا بئکار ایدی.

 

اۆزۆنۆ بئله‌ گؤرمه‌دیڲیم بو قادېن’لا‌ آرتېق دۏست اۏلموشدوق. یاخشې خاطېرلایېرام، همین واخت من عیسا موغاننا‌نېن “دۏغما و یاد آدام‌لار” أثرینی اۏخویوردوم دئیه‌، اۏنون اۆچۆن ده‌ حیصّه‌‌لر سَسلندیریردیم، اۏ دا منه‌ پیانۏ‌دا موسیقی‌لر ایفا إدیردی. مندن أن چۏخ شعر سَسلندیرمه‌ڲیمی ریجا إدیردی. مکتبدن إوه‌ تله‌سیردیم، 1 تامامدا دَرسیمیز بیتیردی، 2 تامامدا من إوده‌ اۏلوردوم. إله‌ قاپېنې آچېب ایچه‌ری‌ گیرَن کیمی تئلئفۏنون فریادېنې إشیدیردیم. منیم’له‌ بیرگه‌ یئییر، منیم’له‌ بیرگه‌ تئلئویزیۏنا باخېردې، حتتا هردن دَرس‌لریمه‌ ده‌ کؤمَک إدیردی، أعلاء ریاضییّاتچې ایدی. چۏخ واخت ایسه‌ گئجه‌نی تئلئفۏن’لا‌ دانېشېب بیرگه‌ یوخویا گئدیردیک. اؤزۆمۆز ده‌ بو حالېمېزا گۆلۆردۆک، آدېمېزې کؤهنه‌ سئوگیلی‌لر قۏیموشدوق.

 

هله‌ اۏ واختدان یئمک پیشیرمه‌ڲی سئویردیم دئیه‌، هردن اۏنا دا غریبه‌ یئمک رئسئپت‌لری دئییردیم. برابر حاضېرلایېب یئییردیک، چۏخ دا بَڲه‌نیردی ایمپرۏویزه‌لریمی. بیل‌یوردا حاضېرلاشان واخت‌لارېم ایدی دئیه‌، تئست‌لری بیر یئرده‌ إدیردیک. جاوابېنې بیلمه‌دیڲیم ریاضی سوال‌لارې حَلّ إدیب شکلینی mms-له گؤندَریردی. من ده‌ اۏنا دیل-أدبیاتدان معلومات‌لار وئریردیم. أن چۏخ دا فۆضولی‌نین یارادېجې‌لېغېنې سئویردی. مندن هفته‌ سککیز-من دۏققوز “پنبه‌یی-داغ-جنون” غزلینی سَسلندیرمه‌ڲیمی خواهیش إدیردی، من ده‌ أرک’له‌ اؤزۆمۆ نازا قۏیوردوم، بیر نۏع قیراعَتیمه‌ اۏلان آسېلې‌لېغېندان ایستیفاده‌ إدیردیم.

 

آی‌لار کئچدیکجه‌ لاله‌یه‌ باغلې‌لېغېمېن دۏزو آرتېردې، باغلې‌لېغېم آرتدېقجا سوال‌لارېم دا آرتېردې. أن چۏخ دا اۏنون نییه‌ تک اۏلماسې منی ماراقلاندېرېردې، دی گل کی، هئچ واخت اۏ باره‌ده‌ سوال وئرمیردیم. چۆنکی ایچیمده‌ بیر حیسّ واردې کی، بو تک‌لیڲین کدر‌لی بیر طالئعی وار. اۏ دا شخصی یاشامېندان هئچ دانېشمېردې. نه‌ غریبه‌دیر، دَڲیل‌می؟ غئیبت إتمَزدن، شخصی یاشامدان دانېشمازدان دا صؤحبَت إتمک اۏلورموش. اۏنو گؤرمک ایسته‌ییردیم، آما بیردن راضېلاشماز دئیه‌، بیر کلمه‌ ده‌ دئمیردیم. من دئمه‌سم ده‌، بیر گۆن اۏ دیله‌ گلدی و دئدی: شکلینی گؤندر، گؤرۆم دانېشدېغېم بو بالاجا کیم‌دیر؟ منه‌ بالاجا دئییردی. اۏ واخت تئکنۏلۏژی بو قدر اینکیشاف إتمه‌میشدی، آما شکیل و آزحجملی ویدئۏ گؤندَرمک اۆچۆن mms دئیه‌ بیر خیدمت واردې. شکلیمی گؤنده‌رَنده‌ منه‌ تأثّۆرات‌لارېنې دئدی، چۏخ غریبه‌دیر کی، لاله‌ده‌ یاراتدېغېم تأثّۆرات‌لار تا بو گۆنه‌ قدر کاراکتئریمده‌ منی تعقیب إدیر. اۏنون دا شکلی منده‌ هله‌ ده‌ قالماقدادېر. نه‌ گیزلَدیم، گۆنۆ بو گۆن ده‌ اۏنون اۆچۆن ایت کیمی دارېخېرام. بو یازې‌نېن عرصه‌یه‌ گلمه‌سی‌نین نه‌دنی ده‌ یاشامېمدا حیسّ إتدیڲیم اۏ بۏشلوقدور. بلکه‌ ده‌ منی اینجیدن نَسنه‌‌لر وار اۏ بۏشلوقدا. بیلدیڲیم دقیق بیر شئی وار کی، “کاش”لارېم یاخامې هئچ واخت راحات بوراخمایاجاق.

 

صؤحبَتیمیز ایل یارېمدان چۏخ چَکدی و هر شئی قفیل بیتدی. عادی گۆن‌لردن بیرینده‌ اۏنا زنگ ووردوم، گؤردۆم یاد بیر قادېن گؤتۆردۆ و لاله‌نی سۏروشاندا منه‌ اۏنون وفات إتدیڲینی دئدی. همچینین صؤحبَت آراسېندا اؤرگندیم کی، اۏ، یئرییه بیلمیر‌میش، ویلچئرده ایمیش. تئلئفۏنداکې قادېن منیم لاله‌نین نه‌یی اۏلدوغومو سۏروشاندا سوال بئینیمی چۏخ مشغول إتدی: دۏغرودان دا من لاله‌نین نه‌یی ایدیم کی؟

 

سۏنرا‌لار چۏخ تئز-تئز اۏ نؤمره‌یه‌ زنگ ووروردوم، دایېم‌گیله ده‌، صینیف یۏلداشېما دا زنگ ووراندا چاشېب اۏنون نؤمره‌سینی توتوردوم. هر دفعه‌ ده‌ عئینی آدام گؤتۆرۆب دئییردی کی، آی اوشاق، لاله‌ یۏخدور داها. آخېردا اؤزۆم ده‌ بو حالدان بئزدیم، تئلئفۏنداکې‌نېن اۆستۆنه‌ قېشقېردېم کی، نؤمره‌نیزی دَڲیشین. سۏنرا ایسه‌ عۆذر ایسته‌ییب سؤزۆمه‌ داوام إتدیم:

 

– اونوتماغا واخت لازېم‌دېر، منه‌ بیر آز واخت وئرین، خواهیش إدیرم. حئساب إدین کی، بو نؤمره‌ بارماق‌لارېمېن آلېشېغې‌دېر…

یازار / Yazar : آیهان میانالیAyhan Miyanalı

بو یازېنې دا اۏخویون /Bu Yazını da Oxuyun

nuray nəzərova-yeniqapi.com-

آنامېن “خۏشبخت‌لیک قوطوسو” / نورآی نظراۏوا (حیکایه‌)

آنامېن “خۏشبخت‌لیک قوطوسو” / نورآی نظراۏوا (حیکایه‌) بو یاشامدا أن پیس سۆکوت اؤلۆم سۆکوتو دېر. …


Warning: count(): Parameter must be an array or an object that implements Countable in /home/yeniqapi/public_html/wp-includes/class-wp-comment-query.php on line 399

Leave a Reply

Your email address will not be published. Required fields are marked *