تۆرکجه‌م / سید حیدر بیات (شعر)

تۆرکجه‌م / سید حیدر بیات (شعر)

تۆرکجه‌م!
بیر تۆرکۏلوق کیمی سئویرم سنی
سؤزجۆک‌لریمه یازمایاجام مرثیه
اۏنلارې
سن یاشاداجاقسان
و اۏنلار’لا
آغېت‌لار قۏشاجاقسان بیله‌مه.

اؤلۆم
قاپېمېزدا دایانېب سندن اؤنجه ایچه‌ريیه گیرسین
اۏنو دا من چاغېرمېشام
آخې
سنین’له پارالئل اؤلۆمه ده دۆشۆنمۆشم
آخې!
بیلیرسن؟
اۆره‌ڲیمده اۏلان دۆڲون‌لرین بیر چۏخونو
یالنېز تۏرپاق چۆرۆده بیلر.

اؤلۆم
سئوگی’یله فلسفه‌نین
تانرې’یلا لئیلانېن
بیرلَشیم نؤقطه‌سی.
اؤلۆم
سنی ایچیب، کائیناتېن تاوانېندان آشماق
اؤلۆم
باخېش‌لارېنا دؤزه بیلمه‌مک،
دار گلنده بو قاندال گؤوده روحون هیجان‌لارېنا
یالنېز بیر سئچیم وار:
اؤلۆم
*
بیز چۏخ یازېغېق لئیلا
منیمسه‌یه بیلمه‌دیک بیرگه
شهرلرین هئچ بیری‌سینی
إولرین هئچ بیری‌سینی
سازلارېن هئچ بیری‌سینی
سۆرَکلی
یۏل‌لار آیرېنتې‌سېندا سئویشدیک
آیرې‌لېق باشلانقېجېندا
*
بو دؤنه یۏل‌لارا فیکیرلَشمیرم
اۏنلار سنین گؤزلرینده ایتیر
بیتیر
باشلانېر
…..
اؤلۆم؟

سیدحيدر بيات