اۏقیانوسا باخان داخما / فریبا وفی (حیکایه)
فیلمده‌کی قادېن إوینی ساتدې. أشیا‌لارېنې دا. اۏنا خیانت إدن کیشی‌نین پالتار‌لارېنې و قۏیدوغو یادیگار‌لارې بیر نئچه تۏربایا دۏلدوروب کۆچه‌نین باشېنداکې زیبیل یئشیڲینه آتدې. “حئییف!” – دئدیم. پالتار‌لارېن هامېسې یئنی ایدی. رئژیسسۏر، إله بیل، سَسیمی إشیدیب کادرې زیبیل یئشیڲینده‌کی پالتار‌لارا یاخېنلاشدېردې. سۏنرا کیمی’سه گؤندَ‌ریب پالتار‌لارې اۏردان گؤتۆرتدۆ. بو حرکتی’یله منی خۏشبخت إتدی. سانکی زیبیل تۏربا‌لارېنې گؤتۆرمه‌ڲه اؤزۆم گئتمیشدیم.
قادېن بۆتۆن مال‌لارېنې پولا چئویردی. نه‌یی وار، نه‌یی یۏخ – هامې‌سېنې کیچیک چانتایا قۏیوب یۏلا دۆشدۆ. آرخاسېندا اؤزۆنه عایید هئچ بیر ایز بوراخمادې. گئده‌جه‌ڲینی تکجه اوشاق‌لېق دۏستونا دئدی. گئتمه‌میشدن قاباق بیر نئچه گۆنۆنۆ یاشلې آناسې’یلا کئچیردی. سۏنرا قاطار‌دایدې. بیر آرا کادردا قېسا دانېشېقدان سۏنرا جیب تئلئفۏنونون آیاق‌یۏلونون سیفۏنونا آتېلدېغې گؤرسه‌دیلدی. بونو نئجه إده بیلدیڲینی دۆشۆندۆم. تئلئفۏنو سؤندۆره بیلردی، آنجاق اۏ، بۆتۆن دۆنیا ایله علاقه‌سینی کَسدی.
“تک‌باشېنا قالا بیلمز” – دئیه دۆشۆندۆم، “قطعی قایېدار. بو شکیلده أصلا گئده بیلمز. یانې، گئتسه بئله، بونون بیر فایداسې یۏخدور کی. بس یادداشېنې و خاطیره‌لرینی نه إده‌جک؟ بئله آسان اۏلسایدې، هر کس بو جۆر إدردی”. باشېنا آرد-آردا بَلا گله‌جه‌ڲی، بیر یئردن پرابلئم چېخاجاغې و گئری قایېداجاغې فیکری ایله گؤزله‌دیم. یالقېزلېق منی قۏرخودوردو. آما اۏ، قاطارېن بیریندن إنیب باشقاسېنا مینیر، بیر شَهَردن باشقا شَهَره گئدیردی. گئجه‌لر تک-یالقېز یاتېر و بعضن یوخوسوندان دیک آتېلېردې. آخېردا بیر تَپه‌لیکده اۏقیانوس مَنظَره‌لری‌نین قارشې‌سېندا داخما تاپدې و اۏرا‌دا قالدې. هر گۆن اۆزمه‌ڲه گئدیردی. تک‌باشېنا.
آرتېق گئجه-گۆندۆز اۏقیانوسا تاماشا إده‌رَک اۏتوران و یئگانه أڲلنجه‌سی بعضن اۏقیانوسا دالېب اۆزمک اۏلان
بو قادېن عصب‌لریمه تۏخانېردې. خۏشبختدی! یۏخ، دَڲیلدی. بیر دفعه “لعنت اۏلسون بو دۆنیایا!” – دئییب اؤزۆنۆ یاتاغا آتدې. آلتېندا‌کې دؤشک‌آغې اۏرتایا دۏغرو یېغېلدې. بو قادېنېن گئری قایېدېب، عئینی’له باشقا اینسان‌لار کیمی یاشاماغا داوام إتمکدن باشقا یۏلو اۏلمادېغېنې دۆشۆندۆم. یانې، تکرار إو آلما‌لې، یئنه عاشیق اۏلما‌لې، اؤنجه‌کی کیمی آناسېنې زییارَت إتمه‌لی و هر کس نئجه إدیر’سه، إله إتمه‌لی’یدی.
رئژیسسۏردان قادېنېن یاشام’لا بارېشما صحنه‌لرینی گؤزله‌ییردیم. دۆنیادان کۆسمه‌ڲین سۏنو یۏخدور.
بئله إتمک’له بیر یئره وارماق اۏلماز. بو نتیجه‌یه گلدیڲیم گۆندن سۏنرا داها آز کۆسمه‌ڲه باشلامېشدېم. بیر نئچه ساعات، اۏلماسا، بیر نئچه گۆن، اۏ دا اۏلماسا، بیر نئچه هفته، یاخود بیر نئچه آی – سۏنرا بارېشماغا مجبورسان. اؤز-اؤزۆمه آرتېق بارېشماماق مسأله‌سینده أمین اۏلدوغوم زامان “تامامی’یله کۆسه‌رَم” – دئیه دۆشۆندۆم. یانې، بلکه، کۆسمه‌ڲین ده اؤزۆنه گؤره آنلامې وار و من بونو بیلمیرَم.
قادېن قایېتماغا مجبور اۏلدو. چۆنکی آناسې اؤلمۆشدۆ. اؤز-اؤزۆمه “هایدې، گؤرَک” – دئدیم. بو دا قادېنېن کؤهنه یاشامېنا قایېتماسېنا بهانه اۏلدو. آنجاق قادېن آناسې‌نېن دَفن مراسیمیندن سۏنرا عئینی یئره – تپه‌نین اۆستۆنده‌کی داخمایا یئنی‌دن قایېتماق ایسته‌دی. سۆکوت و اینزیوا‌نېن اینسانې قۏرخوتدوغو یئره. اوشاق‌لېق ایل‌لریندن تانېدېغې دۏستو اۏنون قالماسېنې خواهیش إتدی. قادېنېن دیققتینی چکه بیله‌جه‌ڲینی دۆشۆندۆڲۆم بیر کیشی واردې. قادېن “گئتمه‌لی‌یم” – دئدی. یئنه اۏنا عصبی‌لَشدیم. گئتمک اۆچۆن نئجه ده راحات‌لېق’لا قرار وئریر.
فیلمین بیر ساعاتې کئچمیشدی، آما رئژیسسۏر هله هئچ نه إتمه‌میشدی. قادېن اۏقیانوسا باخان داخمایا گئتدی.
تاختادان، خۏش گؤرۆنۆشلۆ داخمایدې. تمیز یاتاق و کؤهنه اۏتوراجاق واردې.
آغ رنگده کؤینک ده واردې.
سانکی دیققت‌سیز شکیلده آتمېشدېلار، اۏتوراجاغېن باشېنا تاخېلېب قالمېشدې. قۏل‌لارې یئره دَڲن کؤینه‌ڲی گؤتۆرۆب قاتلاماق ایسته‌ییردی. کامئرا سۆرعت’له ایکی قانادې ایچه‌ری‌یه دۏغرو آچېلمېش، اۏقیانوسو گؤرَن پنجره‌یه سارې دؤندۆ. یاواش-یاواش، بیر نفس’له چؤله یایېلان رنگ، یئل و هاوا خۏشوما گلمه‌ڲه باشلادې. کؤنۆل اۏخشایان ماهنې سویون یانېندان یاواش-یاواش آشاغې تؤکۆلدۆ و دالغا‌نېن قالخماسې’یلا بیرگه ماهنې‌نېن سَسی ده یۆکسَلدی. داخمایا بیر دفعه یئنه قایېتماق ایسته‌ییردیم. هر شئیه تپه‌نین اۆستۆند‌ن تاماشا إتمک ایسته‌ییردیم. رئژیسسۏر بو دفعه سَسیمی إشیتمه‌دی، فیلمی اۏقیانوسون اۏرتاسېندا آغ قوشون قانادېندا سۏنا یئتیردی.
بَنزَرگه‌لر / Bənzərgələr
ایکی یاشلې کؤرپهنین آجې حیکایهسی / واریث یۏلچویئو…
ایلان / رحیم علییئو (حیکایه)
جزا / سئوینج إلسئور (حیکایه)
قار دنهلری / آیناز بزرگان (حیکایه)
یالقېز إو / سحر روحی (حیکایه)
بوز / اومان میانالې (حیکایه)
دارا / آراز أحمداۏغلو (حیکایه)
بۏش كۏمۏد / حسن ثمودی قلعهلر (حیکایه)
قبیرقازان / ماکسیم قۏرکی (حیکایه)
