اللرین…/ مصطفی شیخ پور

اللرین…/ مصطفی شیخ پور

بیرآز داها قارالسایدی گئجه
دنیزه ووراردیم اؤزومو
بالیقچیلارین گؤزوندن اوزاق
گؤز ووراردیم اولدوزلارا
آیی چاغیراردیم سویا

بیرآز داها قارالسایدی گئجه
بوتون هُتللردن اوغورلاردیم اولدوزلاری
بوتون پولیسلردن
بایراقلاردان
دنیزه باغیشلاردیم هر شئیی
سنه باغیشلاردیم

سنین اللرینده یمیش یاشام
قیپ-قیرمیزی بالیقدیر سانکی
چیرپینیردی اللرینده اوره ییم
اولدوزلاری دا بئله جه توتسایدین دنیزدن
اللرینی گتیرسه یدین
بئش اولدوزلو اللرینی
اؤپسه یدیم
پولیسلرین ده اللری اوخوناردی
هتل لرین ده
بایراقلارین دا یالانی بلله نردی
فقط آووجلارینی آچسایدین سئوگیلیم
اللرینی گتیرسه یدین
بئش اولدوزلو اللرینی

مصطفی شیخ پور
حلله -عراق
7 اردیبهشت 1395