گۆزگۆ / سۏناسې ولی‌یئوا (حیکایه)
بو، هر گۆن تکرار اۏلونور. هامېنې منیم دَلی اۏلمادېغېما ایناندېرماق. دۆز دیر، بیر-ایکی دفعه حکیم‌لر ثوبوت إتمه‌ڲه چالېشدېلار کی، گویا من دَلی اۏلموشام. آخې هر گۆن بو آغ اۏتاقدا گۆزگۆ قارشې‌سېندا دایاناندا باشقا گۆزگۆلر ده تاپېلېردې و من همین گۆزگۆ ایزدیحامېندان قورتولماغېن مۆمکۆنسۆزلۆڲۆنۆ درک إدنده باشېمې اۏتاقداکې أن نهنگ گۆزگۆیه چېرپېردېم. باخ، اۏندا مؤعجۆزه‌وی شکیلده کیم‌لر’سه منی تاپېردې، حکیم چاغېرېردې و حکیم‌لر ده منی مۆعایینه إدیب بو قناعَته گلیردیلـر کی، من عاغلېمې ایتیرمیشم.
اینسان‌لارسا داها جیدّی ایش‌لر’له مشغول دېر. اۏنلارېن منیم کیمی بۆتۆن گۆنۆ گۆزگۆنۆن قارشې‌سېندا دایانېب اؤز‌لرینه تاماشا إتمه‌ڲه واخت‌لارې یۏخ دېر. اۏنلار قاپې‌لارې آرخادان باغلې اۏلان آغ اۏتاق‌لار‌دا دا یاشامېرلار. و بۆتۆن گۆنۆ اۏرا-بورا قاچان بو اینسان‌لارېن إولرینده قالا‌ق-قالا‌ق یېغېلمېش مۏبل‌لارېن، أشیا‌لارېن سایې یئره-گؤڲه سېغمېر: دۏلاب‌لار، اۏتورقالار، ماسالار، پرده‌لر، خالچا‌لار….
بلکه من ده اۏن مرتبه‌لی بینانېن ایکینجی، اۆچۆنجۆ یاخود دؤردۆنجۆ، بئشینجی مرتبه‌سینده یاشاسایدېم، إویم ده، چئشیدلی أشیا‌لار’لا دۏلوب-داشسایدې، هامې‌نېن اومدوغو همین اینسان‌لارا بنزه‌یَردیم. لاکین، من جېرېلتې‌سې ایله میلچک‌لری ده یوخوسوندان إله‌ین سېنېق-سالخاق یاتاقدان و گۆزگۆد‌ن عیبارتم.
بیر واخت‌لار ایندی آدلارېنې خاطېرلامادېغېم آدام‌لار’لا إله إو‌لردن بیرینده یاشایېردېم. بیر واخت‌لار دئیَنده 90-نجې ایل‌لرین أوّل‌لرینده. اۏ ایل‌لر بیز‌ده ساواش ایدی، یئکه ساواش، أرزاق قېت‌لېغې ایدی، چؤرک یۏخ ایدی، یئمک یۏخ ایدی، آلما یۏخ ایدی، آلما‌لارې سئومیردیم، کپه‌نک‌لر ده، کپه‌نک‌لری ده سئومیردیم، إویمیزده‌کی دووار‌لارېن رنگینی، منیم اۏتاغېمداکې آغ، آنامېن اۏتاغېنداکې چهرایې، بیر ده دقیق خاطېرلامېرام یا قارداشېمېن بلکه ده باجېمېن اۏتاغېنداکې ماوی، اۏنلار دا ایرگنج ایدی. همین اینسان‌لار دا جیدّی ایش‌لر’له مشغول اۏلدوغوندان یاشادېغېمېز إوده چۏخلو أشیا‌لار وار ایدی. لاکین، منی اینجیدن چۏخلو أشیا‌لار و یاخود اینسان‌لار دَڲیلدی. ساده‌جه من إوده‌کی گۆزگۆنۆ هامې’یلا بؤلۆشمک مجبورییَتینده’یدیم.
دئیه‌سن، إله اۏندا آنلادېم کی، بۆتۆن فیکیر‌لریمی اؤزۆنده سیرّ کیمی ساخلایان گۆزگۆمۆ هئچ کَسدن قۏرویا بیلمه‌یه‌جم. من گۆزگۆمۆن تۏخانېلمازلېغېنې قورماق اۆچۆن ألیمدن گله‌نی إدیردیم. قېشقېر-باغېر سالېردېم، إوده‌کی‌لر’له دالاشېردېم. آخېردا منی اؤز یان‌لارېندان آیېرېب باشقا إوه، داها سۏنرا باشقاسېنا و سۏندا آغ خالاتلې آدام‌لارېن گزیشدیڲی آغ اۏتاق‌لاردان بیرینه کیلیتله‌دیلر. آنجاق، بورادا خۏشبختم. چۆنکی، آرتېق اؤزۆمه اؤزل گۆزگۆمه دۏیونجا باخا بیلیرم. و بو حیسّ منه ذؤوق وئریر. ایندی گۆزگۆنۆن قارشې‌سېندا دایانېب هر گۆن دفعه‌لر’له تکرارلادېغېم شئی‌لری یئنی‌دن دانېشماق. بیرجه گۆزگۆمۆن آرخاسېندان گؤرۆنن چۏخلو گۆزگۆلر منی اینجیدیر. اۏنلار هر گۆن منه باش چکیر‌لر. دۆنن، سېراغاگۆن، اۏندان اؤنجه‌کی گۆن، بو گۆن ده.
بَلی، بو گۆن ده گلیبلر. هئچ واخت منی یالقېز بوراخمېر‌لار. اۆسته‌لیک غریبه مخلوق‌لارا بنزه‌ڲَن گۆزگۆ‌لرین أل‌لری و آیاق‌لارې دا وار. منسه دۆنن، سېراغاگۆن، اۏندان اؤنجه‌کی گۆنده اۏلدوغو کیمی، بو گۆن ده قاچېب جانېمې اۏنلاردان قورتارا بیلمیرَم. اۏنلار بیر نفر کیمی منی دؤوره‌یه آلېر و من گۆزگۆ‌لرین إحاطه‌سینده چاره‌سیز دورومدا دۏنوب قالېرام. سانکی نه‌سه دئمک ایسته‌ییرلر. لاکین، من آنجاق بیر گۆزگۆ’یله دانېشا بیله‌رم، دۆشۆنجه‌لریمی جمعی بیری’یله بؤلۆشه بیله‌رم. تاوانېن گئنیش چات‌لارېندان سۆزۆلن ایشېغېن دووار‌لارېن آغ رنگینه قارېشېب گۆزگۆده عکس اۏلونماسې اۆرَک‌بولاندېرېجې دېر.
چاره‌سیز‌لیک و اۆرَک‌بولانمانېن إتکی‌سی’له باشېمې، منی دؤوره‌له‌ین گۆزگۆ‌لردن أن نهنگینه چېرپېرام. هوشومو ایتیریرَم.
بَنزَرگه‌لر / Bənzərgələr
گۆزگۆ / مۆباریز جعفرلی (حیکایه)
گؤرهسن قۏدۏ صاباح گلهجَک؟ / آیدان ناغېیئوا (أدبی مقاله)
ایکی یاشلې کؤرپهنین آجې حیکایهسی / واریث یۏلچویئو…
حیکایهلر
بیلَرزیکلر / نوریه لۏح (حیکایه)
قۏرخو / سحر خیاوی (حیکایه)
ایبلیس / همت شهبازی (حیکایه)
وای ..... وای / زامان پاشازاده (حیکایه)
جزا / سئوینج إلسئور (حیکایه)
