یئنی یازې‌لار / Yeni Yazılar

سئوینج / پاولۏویچ چئخۏف (حیکایه‌)

VanMeetin-AntonChekhov-YeniQapi.com-

سئوینج / پاولۏویچ چئخۏف (حیکایه‌)

 

گئجه‌ ساعات اۏن ایکی ایدی.

میتیا کولدارۏو جۏشغولو، ساچ‌لارې پېرتلاشدېرېلمېش حالدا تَلَم-تله‌سیک آنا-آتاسې‌نېن یاشادېغې إوه گلدی، سۏنرا تئز اۏتاق‌بااۏتاق گزدی. آنا-آتاسې یاتماغا حاضېرلاشېردېلار. باجې‌سې یاتاغېندا اوزانمېشدې و اۏخودوغو رۏمانېن سۏنونجو صفحه‌سینده’یدی. گیمنازیست قارداش‌لارېسا یوخودایدېلار.

– هاردان گلیرسن؟ – آنا-آتاسې تعجّۆب‌لَندیلر. – نه‌ اۏلوب؟

– هئچ بیلیر‌سیز نه‌ اۏلوب؟! گؤزله‌نیلمز اۏلدو! یامان گؤزله‌نیلمز اۏلدو! بو هئچ… عاغېلاباتان دَڲیل!

میتیا قَهقَهه‌ چکه‌رَک خۏشبخت‌لیکدن دوروش گتیره‌ بیلمیر‌میش کیمی اۏتورقایا چؤکدۆ.

– بو، اینانېلماز بیر شئی! هئچ تَصَوّۆر إتمزسیز! گؤر إ…

باجې‌سې یاتاغېندان سېچرادې و ملافه‌نی چیڲنینه‌ آتېب، تئز قارداشېنا یاخېنلاشدې. گیمنازیست‌لر ده‌ اۏیاندېلار.

– نۏۏلوب سنه‌؟ تانېنماز اۏلوبسان!

– سئوینجدندی، آناجان! ایندی منی بۆتۆن روسییه‌ تانېیېر! روسییه‌! أوّل بو دۆنیادا کالئج رئژیستراتۏرو دیمیتری کولدارۏو کیمی تکجه‌ سیز تانېیېردېز منی، ایندی حاقّېمدا بۆتۆن روسییه‌ بیلیر! آناجان! آی، آللاااه‌!

میتیا یئریندن‌ سېچرایېب، اۏتاق‌بااۏتاق یۆیۆرۆب یئنی‌دن اۏتوردو.

– آخې نۏۏلوب، دئسه‌نه‌؟ دانېش گؤرَک!

– سیز غریبه‌سیز، قزئت اۏخومورسوز، آشکارلېق نه‌دیر بیلمیر‌سیز، قزئت‌لرده‌ إله‌ ماراقلې‌ شئی‌لردن یازېرلار کی! نه‌ باش وئردی‌’سه‌، درحال یازېرلار! من نئجه‌ ده‌ خۏشبختم! آی، آللاه‌! قزئت‌لرده‌ آنجاق مشهور‌لاردان یازېرلار، بیردن-بیره‌ منیم حاقّېمدا دا!

– حقیقی؟ هار‌دا؟

آتاسې‌نېن رنگی قاچدې. آنا‌سې دووارداکې شکیله‌ باخېب خاچ چَکدی. گیمنازیست قارداش‌لار اۏتاغا یاتاق گئییم‌لرینده‌جه‌ سېچرایېب، بؤیۆک قارداش‌لارېنا یاخېنلاشدېلار.

– بَلی-بَلی! حاقّېمدا یازېبلار! ایندی منیم بارم‌ده‌ بۆتۆن روسییه‌ بیلیر! هه‌، آناجان، بو قزئت نؤمره‌سینی خاطیره‌ کیمی ساخلایېن! آرادابیر اۏخویاجاغېق! بیر باخېن!

میتیا قزئتی جیبیندن‌ چېخاردېب، آتاسېنا اوزاتدې و گؤڲ‌ قلم’له‌ داییره‌لنمیش یئری بارماغې’یلا گؤرسَتدی.

– اۏخویون!

آتا گؤزلۆڲۆنۆ تاخدې.

– اۏخویون دا!

آنا شکیله باخېب، یئنی‌دن خاچ چَکدی. آتا بۏغازېنې آرېتلایېب، اۏخوماغا باشلادې:

– “29 دئسامبر، گئجه‌ ساعات 11-ده‌، کالئج رئژیستراتۏرو دیمیتری کولدارۏو…

– بیر باخېن، باخېن! آردې!

– …کالئج رئژیستراتۏرو دیمیتری کولدارۏو، کازیکسی‌نین کیچیک برۏننېداکې شراب‌خاناسېندان سرخۏش دورومدا چېخارکن…

– اۏ منم، سئمیۏن پئترۏویچلیم… دقیق‌لیڲی’له‌ یازېلېب ها! داوام إدین! سۏنرا، سۏنرا! دینله‌یین!

– …سرخۏش دورومدا چېخارکن سۆرۆشمۆش و اۏرا‌دا دایانمېش یوخنۏوسکی قضاسېنداکې دوریکین کندیندن‌ اۏلان ایوان درۏتۏوون آتې‌نېن آلتېنا یېخېلمېشدېر. هۆرکمۆش آت، کولدارۏوون اۆستۆند‌ن آدلایاراق و ایچه‌ری‌سینده‌ ایکینجی گیلدییا دَرَجه‌لی مۏسکۏلو تاجیر استئفان لوکۏو اۏلان خیزیی اۏنون اۆزه‌ریندن‌ دارتمېش، کۆچه‌ بۏیو برک چاپمېش و نهایت، آت سۆپۆرگه‌چی‌لر طرفیندن‌ ساخلانمېشدېر. کولدارۏو بایېلمېش دورومدا اؤنجه پۏلیس بؤلمه‌سینه‌ آپارېلمېش و دۏکتۏر طرفیندن‌ مۆعایینه‌ اۏلونموشدو. بۏینوندان آلدېغې ضربه‌…

– منیم قۏشقویا چېرپېلماغېمې دئییر، آتا، باخېن.

– اۏخویون! آردېنې اۏخویون!

– …بۏینوندان آلدېغې ضربه‌ یۆنگۆل حئساب إدیلمیشدیر. حادیثه‌ باره‌ده‌ پرۏتۏکۏل ترتیب إدیلمیشدیر. ضررچکمیش شخصه‌ طیبّی یاردېم گؤرسه‌دیلمیشدیر…”

– بۏینومون آردېنې سۏیوق سو’یلا ایسلاتماغې مصلحَت گؤردۆلر. اۏخودوز؟ هه‌؟ ایش ده‌ إله‌ اۏراسېندادې دا!.. بۆتۆن روسییه‌یه‌ یایېلدې! وئرین بورا!

میتیا قزئتی قامارلایېب قاتلادې و جیبینه‌ دۆرتدۆ.

– ماکارۏوگیله‌ قاچېم، اۏنلارا گؤرسه‌ده‌جم…سۏنرا هله‌ ایوانیتسکی‌گیله‌ گؤرسَتمک وار، سۏنرا ناتالیا ایوانۏونایا، آنیسیم واسیلیئویچه‌… من قاچدېم! سلامت قالېن!

یازار / Yazar : آیهان میانالیAyhan Miyanalı


Warning: count(): Parameter must be an array or an object that implements Countable in /home/yeniqapi/public_html/wp-includes/class-wp-comment-query.php on line 399

Leave a Reply

Your email address will not be published. Required fields are marked *