تۏرپاق آلتېندا قالان دیلیمیز / شلاله جوانشیر (شعر)

تۏرپاق آلتېندا قالان دیلیمیز  / شلاله جوانشیر (شعر)

 

آنا دیلیم

سن باسقې آلتېندا قالدېن

أزیلدیکجه دیره‌نیش گۆجۆن آرتدې

سن اؤلکه‌میزده اۏبا-اۏبا، کند-کند، شهر-شهر سېخېشدېرېلدېن

سېخېشدېرېلدېقجا

باغرېمېزا تپیلدین، کؤکسۆمۆزده یووالاندېن

سنی، فوضولی‌نین غزل‌لرینده سئودیک، قۏرقود دده‌نین قۏپوزوندا

سن بیزیم سۏیوموزون، کیم‌لیڲیمیزین جانلې تابلۏوسو اۏلدون

یۏخ اۏلمادېن، یۏخ اۏلمایاجاقسان

یوردوموز داغېلدې، داغېدېلدې

تۏرپاق آلتېندا قالدې تۆرکجه هایقېران آنالارېمېز

تۏرپاق آلتېندا قالدې تۆرکجه هایقېران دده‌لریمیز

تۏرپاق آلتېندا قالدې تۆرکجه هایقېران گلین‌لریمیز

تۏرپاق آلتېندا قالدې تۆرکجه هایقېران گنج ایڲیدلریمیز

یاردېم‌لارېنا گلن اۏلمادې، اۏلماز اۏلدو.

بۏغولدولار، تۏرپاق آلتېندا قالېب بۏغولدولار

چۆنکۆ تۆرکجه هایقېردېلار

تۆرکجه هایقېردېلار سۏن نفس‌لری ایله آنالارېمېز

تۆرکجه هایقېردېلار سۏن نفس‌لرینده اوشاق‌لارېمېز

تۆرکجه باغېردېلار گنج ایڲیدلر

تۆرکجه هایقېردېق‌لاری اۆچۆن اؤلدۆلر

تۆرکجه باغېردېق‌لارې اۆچۆن اؤلدۆلر

اوچوق‌لار آلتېندا قالدېن دیلیم

اوچوق‌لار آلتېندا قالدېن تۆرکجه‌م

اوچوق‌لار آلتېندا قالدېن اؤلکه‌م

اوچوق‌لار آلتېندا قالدېن آنا دیلیم

یوردوم اوچوق-اوچوق خرابه‌لره دؤنۆشدۆ

دؤنۆشدۆرۆلدۆ

یارالار آچېلدې یوردومون باغرېندا

اۆره‌ڲی پارام-پارچا اۏلدو اؤلکه‌مین

باغرې دلیک-دئشیک اۏلدو فوضولی غزل‌لری‌نین

کؤنلۆنه آتش قۏیولدو کاشقارلې دیلی‌نین

قاران‌لېغېن دالغالاندېغې اؤلکه‌مده-

بئشیک‌لرینده اؤلدۆلر بالاجا اوشاق‌لار

آغزېنا داش تپیلدی تۆرکجه دیل آچان بالاجا اوشاق‌لارېن

هئریس’دن، ورزیقان’دان، اهر’دن، قاراداغ’دان

قارا خبر یایېلدې

قاراباغېن قارا خبرلرینه قارالار قاتېلدې

تۆرکجه آغولار سؤیله‌دی آغ‌بیرچک آنالار

تۆرکجه آغلادې آنالار

سن اؤلمه‌دین، منیم تۆرکجه‌م

سن یاشاییرسان باغرېمېزدا

سن یاشایاجاقسان عاغلېمېزدا

سنین اۆچۆن، یالنېز سنین اۆچۆن یاشایان‌لار وار آنا دیلیم

سن بیزیم گرچک قورتولوش بایراغېمېزسان تۆرکجه‌م

قلبیمیزده دالغالانان بایراغېمېزسان.

بایراغېمېزسان.