یئنی یازې‌لار / Yeni Yazılar

قۏرخو / سحر خیاوی (حیکایه)

seher-xiyavi-www.yeniqapi.com-

یئنی قاپې مئدیا بو حیکایه‌نی 1399-نجو ایلین بایرام گۆن‌لرینه، بایرام‌لېق اۏلاراق، خالقېمېزا پای وئریر. (4 صفحه / 569 سؤزجۆک)

دۆزنله‌ییب اویقونلاشدېران: آیناز بزرگان

قۏرخو / سحر خیاوی (حیکایه)

آخشام چاغې پایېز گۆن‌لری‌نین بیری’یدی. هر یئری چن دومان‌ بۆرۆمۆشدۆ. اوزاق‌لار بیر رؤیا کیمین گؤرسه‌نیردی.قاباغا گئتدیکجه سانکې پرده‌لر قېراغا چکیلیب تصویرلر جانلانېردې. بۏیلو قادېن إولرینه یاخېنلاشېردې. إولری‌نین بؤیرۆنده اۏلان قبریستانې گئندن گؤرنده اۆشندی. اۆره‌ڲینه غریب بیر قۏرخو دۏلدو. قبریستانېن اۆستۆن چن بۆرۆمۆشدۆ. وهملی بیر منظره یارانمېشدې. دومانېن ایچینده إلئکتریک آغاج‌لاردا چېراق‌لار یانېردې. سانکې ألی فانوسلی روح‌لار اۏنا سارې گلیردیلر. قۏرخوسو یان کۆچه‌دن چېخان جنازه آپاران کیشی و قادېن دسته‌سی’له لاپ تکمیللشدی.کیشی‌لر “لااله الا الله” دئیرکن قارایا بۆرۆنمۆش بیر تابوتو أل‌لری اۆسته آپارېردېلار. قادېن‌لار شۆوَن چکیب اۏخشاما دئییردیلر. قادېنېن قۏرخودان گؤزلری بَرَلدی.بیر شئی اۆره‌ڲینده ایستی-ایستی تؤکۆلدۆ. اۏ ایندییه‌جن اؤلۆمه بو قدر فیکیرلَشمه‌میشدی! اؤلۆمۆ بو حدده یاخېن حیس إتمه‌میشدی!

اۏنلارېن اؤنۆندن تئزجه سۏوشدو. آما بو منظره‌لری گؤرمک اۏنون حساس حالدا اۏلدوغونا پیس تأثیر بوراخدې. ناخۏشلادې. اۏ گۆندن بری حیس إدیردی اؤلۆبدۆ و هئچ کیمسه‌یه بو حالېن سؤیله‌یه بیلمیردی. سانېردې هرکسه سؤیله‌سه بو ماجرانې اۏنو لاغا قۏیوب گۆله‌جک. بئینینده سانکې قبریستان اۆستۆنه چؤکن دومان چؤکمۆشدۆ. بیر تهر یوخو-‌اۏیاق‌لېق حالېندا یاشایېردې اۏ گۆندن بری.

بو حالدا إوی‌نین ایشینی گؤرمه‌ڲه ده سېنېق سالخاق ناچار ایدی. دؤنه‌لر إحساسې اۏلماغې و دیری اۏلماغېنې سېناماغا ألین گاز اۆستۆنده اۏلان قاب-قازانا یاپېشدېرېردې.گاه قصدیجه آیاغېن آذر سۏیوغوندا گۆر یانان سۏبایا یاپېشدېرېردې. اؤزۆن یاندېرېردې بلکه بیلسین اؤلمه‌ییب.گاه ألین پیچاق’لا کسیب یاراسېنا دوز سپیردی و گؤینَلتی‌سیندن لذت آلېردې. شۆکۆر دیری‌یم.آغرې آجېنې بیلیرم دئییردی!! اۏ گۆنۆ-گۆندن سویا گئدیردی آما یاشام یۏلداشې سانکې بو أریـیَن شامې اؤنۆنده گؤرمۆردۆ. هردن بونلاردان داها قۏرخولو ایش‌لره أل ووروردو. بیر گۆن آتاسې إویندن قایېداندا اؤزۆن قصدیجه ماشېن قاباغېنا آتدې بلکه سۆرۆجۆنۆن اۏنو گؤردۆڲۆن و دیری اۏلماسېنې دویسون. یئیین گلن ماشېن شیدتلی تۏرموز إله‌دی. دالېجا طاس اۏرتا یاشلې سۆرۆجۆ دۆشۆب قادېنې یامانا باسدې. قادېن دینمَزدن مات-مات اۏنا باخېردې. سۆرۆجۆ ساندې اۏ لال-کاردې. باشېن تۏولایېب آی آللاهېن یازېغې، منی ده یازېق إله‌میشدین دئییب جیبیندن یزدی دستمالېن چېخاردېب اۆز-گؤزۆنۆن ترین سیلدی. اۏندان یۏلا دۆشۆب گئتدی. قادېن تصادۆفدن قۏرخماق و سۆرۆجۆدن یامان إشیتمه‌ڲه رغمن اۆره‌ڲینده سئوینیردی. چۆنکۆ اۏ دیریـدی. اۏنو سۆرۆجۆ گؤرۆب  یامانلامېشدې. بیر آخشامدا دیری اۏلماغېن سېناغا چکمه‌ڲه گئجه یارې‌سېناجان دارېخماق بهانه‌سینه بالکۏن دا قالمېشدې. اۏ آخشام شهرین ایلک قارې یاغېردې. قادېن إلئکتیریک آغاجېن چېراغې‌نېن اؤنۆنده اوچوشان قار دنه‌لرینه باخېردې.اۏنلار یانان اولدوزلار کیمی ایشېقدا اوچوشوردولار. أل-آیاغې بوم-بوز اۏلوب. دیشی دیشینه دَڲیردی. آز قالېردې قار آدامېنا دؤنسۆن. ألین یاغان قارېن آلتېنا توتدو بیر اۏووج قارې کؤزلۆ اۆره‌ڲی‌نین باشېنا قۏیدو اۏ اؤلمه‌میشدی چۆنکۆ سۏیوغو حیس إدیردی. تیترک إوه گیردی. یاشام یۏلداشې خبرسیز نورسوز شب خواب آلتېندا پتویا بۆرۆنۆب یاتمېشدې. بؤیرۆنه تپیلدی. دۏنموش گؤوده‌سینی أری‌نین قوجاغېنا یئرلشدیردی.کیشی بیر آن اۏنون سۏیوق بدنین لمس إله‌مَزدن دیکسیندی؛ مۆختصر آیېلدې. سۏنرا اۏنو سېخ باغرېنا باسدې. چۏخ چکدی بَدَنی قېزېشسېن آما اۆره‌ڲینده سئوینیردی اؤلمه‌ییب و سۏیوغو حیس إدیب. بدنی یاواش-یاواش قېزېشارکن یوخو گؤزلرینه گلیردی‌ یازېق قادېنېن.

بیرداها گۏن یاشام یۏلداشې چۏخ اۆزگۆن و دارېخان حالېن گؤرۆب ماشېنا میندیریب دۏلانماغا آپاردې اۏنو. یاشام یۏلداشې باغېن بیر گوشه‌سینده ایشله‌ییردی. قادېن دیلی‌نین آلتېندا سئودیڲی بیر ماهنېنې مېزېلدانارکن‌ باغېن ایچینده گزیردی. لاپدان اؤنۆنده اۏت‌لارې ترپه‌شن گؤردۆ. اؤنجه حیس إتدی یئل اۏنلارې أسدیریر آما ألینده‌کی آغاج’لا اۏت‌لارې قېراغا ووراندا، اوزون بیر ایلان گؤردۆ. ایلک اؤنجه دیلی توتولدو. آما سۏنرا تامام قودرَتی’له قاچا-قاچا أرین هایلادې…ایسماعیل…ایسماعیل…ایسماعیل…..أری سسین إشیدیب اۏنا سارې قاچدې. دیلی توتار-توتماز ایلان-ایلان دئییب؛ أری‌نین قاباغېندا یئره یېخېلېب؛ هوشدان گئتدی. اۏ أری‌نین بئل’له گؤرستدیڲی سمته قاچدېغېنې و ایلانې اؤلدۆرمه‌ڲینی گؤرمه‌دی. یازېق قادېن داها بۏیلو دڲیلدی. اوشاغېنې سالمېشدې. آما قۏرخموردو دای. پئسیکال ناخۏشلوغو دۆزلمیشدی. سانکې بو ناخۏشلوق تۏخداماغا بیر آغېر شۏک و قۏرخو گَرَکلی‌یمیش و ایلان بو ایشی گؤرمۆشدۆ!!!

یازار / Yazar : آیناز بزرگان

بو یازېنې دا اۏخویون /Bu Yazını da Oxuyun

seher-xiyavi-www.yeniqapi.com-

داشدان سس چېخدې، سندن سس چېخمادې / سحر خیاوی (حیکایه)

داشدان سس چېخدې، سندن سس چېخمادې / سحر خیاوی (حیکایه)   اۏرتا یاشلې قادېن تزه …


Warning: count(): Parameter must be an array or an object that implements Countable in /home/yeniqapi/public_html/wp-includes/class-wp-comment-query.php on line 399

Leave a Reply

Your email address will not be published. Required fields are marked *