لئیلا / إلنور نَحمت‌اۏو (حیکایه)
ایلک گؤرۆش
لاپ یاخېندا گؤرۆنن داغ‌لار، اوپ-اوزون چینار‌لار، کۆچه‌نین اۏرتاسې’یلا آخان دوم-دورو سو، گؤڲ اۆزۆنده اۏ یان-بو یانا اوچوشان طَيّاره‌‌لر، تۏپ سَس‌لری’له آچدېغېمېز اۏ سَحَرلر و لئیلا.
لئیلا قاراباغا قۏناق گئتدیڲیمیز إوین قېزې ایدی. آغ‌آپپاق اۆزۆ، سارې ساچ‌لارې، سیچان گؤزلرینه بنزه‌ڲَن ماوی گؤزلری، خېرداجا بورنو’یلا ایلک تانېش‌لېغېم دا همین گۆن اۏلدو. اۏ، ماشېندان دۆشن کیمی أل‌لریمدن توتدو. اؤزۆنه سارې چکیب سیچانابنزر دۏداق‌لارې’یلا منی اؤپدۆ. لئیلا‌نېن اۆزۆنۆ آغ‌آپپاق سیچانېن اۆزۆنه بنزه‌دین، هم ده اۏرا سارې چیل‌لر قاتېن. لئیلا‌نېن ساچ‌لارېنا سارې دئییرَم، أصلینده قېرمېزېیا چالان سارې رنگده’یدی.
رنگیمین قارا‌لېغېندان هر زامان اوتانمېشدېم، لئیلا‌نېن منی اؤپدۆڲۆ آن لاپ چۏخ اوتاندېم. بو گؤزَل‌لیکده قېز منیم کیمی عئیبه‌جری، قارابالانې نییه اؤپسۆن آخې؟!
آخشام یئمه‌ڲینده بیر طرفده اۏنلارېن عائله‌سی، بیر طرفده ده بیز باغداش قوردوق. اۏ، قاشېغې آغزېنا آپاراندا بئله گؤزلرینی مندن آیېرمېردې. یازېق-یازېق اۏنا باخېب مندن کنار دور دئمک ایسته‌ییردیم. منه إله گلیردی کی، هامې بیزه باخېر. اۏندان خۏشلاندېغېم اۆچۆن اوتانېردېم، یۏخ’سا رنگیمین قارا اۏلدوغو اۆچۆنمۆ، بیلمیرَم…
بیر طرفدن ده آتا‌سې لئیلاسېنې عزیزلَییردی: شیرین قېزېم، بیردَنه‌م، شازدام…
قفیلدن آغلاماغا باشلادېم
نه‌دَنینی دئدیم، اؤزۆ ده ایچیمی چکه-چکه. لئیلا‌نېن منه باخماغېندان هامېیا شیکایت إتدیم. ایچدن آغلایېردېم، لاپ ایچدن.
2-نجی گؤرۆش
لئیلاگیل 1993-نجۆ ایلده قاچقېن کیمی بیزیم إوده یئرلَشمیشدیلر. هر شئی یوخو کیمی گلیردی منه. اۏ ماوی گؤزلر ایندی آغلاماقدان قېپ-قېرمېزې اۏلموشدو.
آتام حَیَطیمیزده‌کی دامې سوواقلایېب اۏنلارا وئردی. لئیلا‌نېن آتا‌سې دا ،آنا‌سې دا گئجه-گۆندۆز چالېشېردې. اؤولاد‌لارېنې کۏرلوق چکمه‌ڲه قۏیموردو‌لار. اۏنلاردا پیشن یئمک‌لردن بیز، بیز‌ده پیشن یئمک‌لردن ایسه اۏنلار یئیَردی. بیر عائله کیمی اۏلموشدوق.
هارداسا ، اۆچ آی ایچینده هم لئیلا، هم ده قارداش‌لارې ایله أڲلنجه‌لی گۆن‌لر کئچیرتدیک، لئیلانې داها چۏخ سئودیم. اۏ یئنه ده دَجَل گؤزلری’له منی گؤزدن قۏیموردو، آما اؤرگشمیشدیم.
لئیلا‌نېن آتا‌سې ایمکانلې اۏلدوغو اۆچۆن بیز‌لره یۆک اۏلماق ایسته‌مه‌دی. اۏنلار شَهَره کؤچدۆلر.
3-نجۆ گؤرۆش
2000-نجی ایل‌لرین ایلک گۆن‌لرینده، لئیلاگیل بیزه قۏناق گلدی.
لئیلا آرتېق بؤیۆک قېز اۏلموشدو. داها دا گؤزَللَشمیشدی. یاناق‌لارېنداکې چیل‌لر همیشه‌کی کیمی دَڲیلدی، چۏخو چکیلمیشدی.
قارداش‌لارې اۏنو قېسقانېردې. بیزی دانېشماغا قۏیموردو‌لار.أصلینده، همین واخت‌لار باشقا قېز‌لارې سئویردیم، سایې-حئسابې اۏلمایان اۏنلار’لا قېزې. کَدَر‌لی صحنه ایدی.
همین گۆن خئیلَک هَنَک إتدیک. اوشاق‌لېق خاطیره‌لریمدن بۏیلانان اۏ حیس‌لریمی بۏغدوم. اۏنو سئودیڲیمی دئمه‌ڲه جسارَتیم چاتمادې.
سۏن گؤرۆش
یۆکسَک لیسانسېمې بیتیریب کنده قایېتمېشدېم. ایشله‌مک، إولنمک حاققېندا دۆشۆنۆردۆم.
لئیلاگیل یئنه ده قۏناق گلمیشدی.
گؤزلَنیلمز گؤرۆش، هئچ بیر فیلمده، أثرده اۏخومادېغېم بیر گؤرۆش.
آرتېق لئیلا آرامېزدا اۏلان پلاتۏنیک سئوگیدن إله اۆرَک’له دانېشېردې کی، إوده اۏلان هر کس اوغونوردو. من ایسه یئنه ده ایلک گؤرۆشده‌کی کیمی آغلایېردېم.
بو دفعه‌کی گلیشده لئیلا‌نېن یانېندا اؤزۆنه بنزه‌ڲَن کؤرپه‌سی و یاشام یۏلداشې وار ایدی.
