قۏينوندا.‌.‌./ آیسو مختاری (شعر)

قۏينوندا.‌.‌./ آیسو مختاری (شعر)

صبريميز سؤز قۏنوسو مين هيجان قۏينوندا
گل ده آچ قار چيچه‌ڲيم شاختا-بوران قۏينوندا

آرپا چای‌سېز و آرازسېز من اۏ ايتگين سارا كی
ياشادېردېن منی سن هر گۆن آخان قۏينوندا

حسرتيندن حزين-حال سېز و حايات سېز جانېمې
وئره‌رم بيرده گَزَم ياز تک آچان قۏينوندا

لال آشېق‌لار ساياغې غوربتی كؤک‌لَندی سازېم
سؤزۆمۆن مين آوازې سېندې اۏزان قۏينوندا

سارماشېق تک فيكيريم قارما-قارېش دېر دۏلاشېر
منی اۏ درده سالان دۆڲمه، ياخان، قۏينوندا
آتامېز سۆرگۆنه گئتديكده آنام بۏيلويدور
دۆنيايا، آلما يئريكليردی، تاوان قۏينوندا

جايدېرېر فيكريمی هردن اوچورام قارتال تک
خطری باشدان آشان مين طيران قۏينوندا

جانلانېردې گؤز اؤنۆمده گؤزۆ قانلې-قادالې
تنی، تبريزليڲيمين باغرې دومان قۏينوندا

دؤشۆ اۏ شانلې شاخان بايراغېمېن مسكنی دير
سرحدی سئوگی، آی-اولدوز گؤزۆ قان قۏينوندا

يۆز سېنېرسېز اؤپۆشۆن يوردو، پريشان قۏجاغې!!
سؤزۆ قاچ دېر ، گؤزو بير عؤمر دايان قۏينوندا