یئنی قاپې Yeni Qapı یئنی قاپې، یئنی بير باخېشدېر تۆرک دۆنیاسېنا
نئچه یۆز ایل‌لیک دَڲَرینده‌کی دؤرد ایل / آراز احمداۏغلو
آنا دیلیمیز اوجا آللاه’ېن بیزه وئردیڲی أن بؤیۆک نئعمتی دیر. بو نئعمتین قدرینی بیلیب دَڲر وئرَن‌لر أصلینده اؤز کیم‌لیک، اؤز وار‌لېق، اؤز اینسان‌لېق‌لارېنا دَڲر وئرَن‌لر دیر. بو یۏلدا چالېشان اینسان‌لار باشقا اینسان‌لارا دۆنیا لَذَّت‌لری آدلانان بۆتۆن ناز-نئعمتدن کئچیب اؤز دَڲَر‌لی واخت‌لارېنې بو یۏلدا قۏیورلار. ألبتّه بونون هئچ کیمه میننَتی یۏخ دېر. اۏنلار بو ایشی هئچ کیمدن هئچ نه گؤزله‌مَزدن گؤرۆر. اۏنلار بو ایشی سئودیک‌لری اۆچۆن گؤرۆر. اۏنلار اؤز سئوگی‌لری اوغروندا چالېشېر. بو هر اینسانېن دۏغال حاقّې دېر.
آنا دیلیمیزده بو گۆن نه‌سه یازېب اۏخویا بیلیرک‌سه، بونو آنا دیلیمیز، دۏغال حاق‌لارېمېز، اولوسوموزون قورولوشو اۆزه‌رینده أمه‌ڲی اۏلان کئچمیش دده-بابا‌لارېمېزا بۏرجلویوق. آللاه اۏنلارېن هامې‌سېنا بۏلون-سۏلون رحمت إله‌سین! اۏنلارېن بؤیۆک أمه‌ڲی اۏلماسایدې، بوگۆن تۆرکچه آد‌لې بیر دیل و تۆرک اولوسونون یاراتدېغې مدنیيَّت‌لر یۏخ ایدې. اۏ دورومدا دۆنیا نه گۆنده اۏلاردې، اۏنو دۆشۆنمک بئله چتین دیر. بوگۆن آیاق اۆسته دورماغې باشارېرېق‌سا، بونو اۏ رحمت‌لیک دده-بابا‌لارېمېزېن چیڲین‌لرینه بۏرجلویوق. باخمایاراق کئچمیش متن‌لریمیزی اۏخوماق بوگۆن باشقا دیل‌لری آنا دیل‌لریندن داها آسان اۏخوماغا آلېشمېش نسلین مئیلینه داماغېنا دادېخماسې چتین گلسه ده، بیز اۏنلارا بۏرجلو اۏلدوغوموزا اونودا بیلمه‌ریک. اۏنلارېن چکدیڲی ایشکنجه‌لر، آغېر یاشام دورومو، بیتمک بیلمه‌ڲن قانلې ساواش‌لار، ظۆلم‌لر، قارانات‌لارې نظرده آلساق بلکه ده بوگۆنکۆ إتدیک‌لریمیز بیزی اۏنلارېن قارشې‌سېندا تۏزا چئویره بیلَر. إله اۏنا گؤره ده اۏنلارېن دَڲَر‌لی أمه‌ڲی قارشې‌سېندا باش أڲمک بۏرجوموز دېر.
آما دیل جانلې وار‌لېق دېر. بو دیل یارادېب یئنی‌لَنمک’له یاشایا بیلَر. هم دیل-دۆشۆنج هم اۏرتۏقرافی باخېمېندان بیز دیلیمیزین تمل‌لرینی قۏرویاراق یئنی‌لیک‌لره ده آچېق اۏلما‌لې‌یېق. اۏرتا چاغدا یازېلمېش کلاسیک أدبیاتېمېزېن أل‌یازمالارېنې اۏخوماق بوگۆن بیزه چتین گلیر’سه بو دده‌‌لریمیزین باغېشلانماز گۆناهې کیمی گؤزۆکمه‌مه‌لی دیر. اۏنلار اۏ یارادېجې‌لېق‌لارې’یلا اؤز یاشادېغې آیامېن یئنی‌لیڲی سایېلېردې. اۏنلارېن یارادېجې‌لېغېنې چاغداشلاشدېرماق بوگۆن بیزیم بۏرجوموز دېر. بیز هر زامان کئچمیشین قالېن-قَییم بینؤوره‌سی‌نین اۆستۆنده شصت’له دوروب ایره‌لی‌یـه باشې‌اوجا‌لېق ایله باخان کیشی‌لرین تؤره‌مه‌لری‌ییک. اۏنلار اۏ یئنی‌لیڲی دؤنه‌لرجه یارا‌دا بیلیبلرسه، بیز‌لر نییه یارا‌دا بیلمه‌یَک. بو یئنی‌لیڲی بوگۆن دیلیمیزین اۏرتۏقرافی‌سینده تام جېراسېل‌لېق’لا و تام مَنطیقی بیر بیچیمده یارا‌دا بیلن دۏستوموز آیهان میانالې بَڲ دیر. بو قلمی تانېیان دۏست‌لار بیلیر، اۏنون بۆتۆن یارادېجې‌لېغې و یازمالارې عرب قرافیکاسېندا یازېلېر. بونون نه‌دنی کئچمیش متن‌لرین دیلیمیزین فۏنئتیکی ایله اویقون گلمه‌مه‌سی و دیلیمیزده چۏخلو یانلېش اۏخونوش‌لارا، سؤزجۆک‌لریمیزین ایتیب-باتماسېنا نه‌دن اۏلماسې دېر. آما بوگۆن YeniQapi.com سایتېندا چېخان متن‌لرده آنا دیلیمیزی دده-بابا أ‌لیفبامېز ایله یازېب هر سؤزۆ اؤز یئرینده دۆزگۆن اۏخویا بیلمک ایمکانې یارانېب. بو ایمکان‌لار دیلیمیزده یاخېن گله‌جکده بؤیۆک دیرچه‌لیش‌لر یاراتماسې گۆن کیمی اۏرتا‌دا دېر. بو اۆزدن شخصَن بئله ایمکان‌لارې یارادان دۏستوموز، قارداشېمېز آیهان میانالې بَڲه درین تَشَکّۆر‌لریمیزی بیلدیریب اولو تانرې’دان اۏنا جان ساغ‌لېغې، اوغورلار آرزېلایاراق یئنی قاپې‌نېن دؤردۆنجۆ ایل دؤنۆمۆنۆ تبریک إدیریک.
