یئنی یازې‌لار / Yeni Yazılar

قانلې بالهارې / سۏلماز جمالی (حیکایه)

qanlı balharı-Solmaz Cəmali-YeniQapi.com-2-

قانلې بالهارې / سۏلماز جمالی (حیکایه)

دام‌لارېن، دووارلارېن اۆستۆنه دؤشَنمیش یام-یاشېل جومبوزلاردان گیله-گیله قان دامجېلایېر. سوسقون کۆچه‌لر، اۏنا آغېز أڲَن دووارلار، بۆتۆن حایاتېنې چولغایان کابوس‌لار’لا دۏلو گئجه‌ده آغېر-آغېر یۆرویۆر.

هر آن یانېق جېغېرلار، قانلې دووارلار، چاتلاق کرپیج‌لر داها چۏخ دارالېب داها دا أزیر اۏنو. اۆزۆ، گؤزلری، بئیینی بوم-بوز ایدی. آغ یئلدن چن أسیردی. قۏرخونج سس‌سیزلیک هریانې بۆرۆمۆشدۆ.

دووارلارې‌نېن رنگی سۏلدوغو اۏ اۏتاق، اۆزۆ قارا باجا، پۏزوق یاتاق آرتېق اۏنو قارا دۆنیایا باغلایېردې. قاپېنې آچدېغېندا، باجانېن تر باسمېش شۆشه‌سیندن بیر-بیرینه سارېلمېش قارالتې‌لار گؤزۆنۆن اؤنۆنده جانلانمېشدې.

نه کندین، نه ‌ده اؤزۆنۆن نبضی دؤڲۆلمۆردۆ.

دلی بیر قۏرخو ایچینده قاچماغا باشلایېر. گؤردۆڲۆ هرنه، یئرینده قورویوب قالمېشدې. دۆنیا سوسموشدو. بالهارې‌نېن شېرېلتې’‌یلا آخان سو سسی، گؤڲ‌لرده اوچوشان قوش‌لارېن سسی دویولموردو. دۆزلر، تپه‌لر، یاماج‌لار بۏم-بۏش ایدی.

أڲنینده‌کی پالتار جېرېق-جېرېق، قان ایچینده’‌یدی. بدنی هاردانسا آغرېیېردې. کؤکسۆندن جَسدین آغېرلېغې باسېردې. اۏ اۏدلو بیر هاوا ایدی، جانېنا، اۆره‌ڲینه هۏپموشدو.

ایکی قېزېلې أت میلچه‌ڲی أطرافېنا دۏلاشېر. آغ قوردلار بدنینده قېژېلدایېر.

چېراق ایشېغېندا اۏوجومو آچېب باخېرام. قاپ-قارا ساچ‌لارې ألیمه یاپېشېب؛ هله ده نَملی دیر، سۏیوق دېر.

فاحیشه‌نی سئودیڲی چایدا بۏغوب سئودیڲی اؤرۆش‌لرده باسدېردېم. همن اۏ سېغال چکدیڲیم أل‌لر’له اۏنو بۏغدوم.

اۏنلارې گؤردۆڲۆمده “آیاق‌لارې اۏت کؤکۆ تک بیر-بیرینه دۏلانمېشدې. أل‌لری بۏینونون دالېندا باغلانمېشدې. بۏینوندا نه بۏیدا قانچېر واردې.”

اۆره‌ڲیم سۆرعت’له چېرپېنېب سینه‌می آغېرلېق سېخمېشدې. اۏتاغېن تاوانې باشېمدان باسمېشدې.

کۆچه آن ‌با‌ آن دارالېر، گئجه‌نین قۏرخونج قاران‌لېغې اۆره‌ڲینی سېخېر.

یئره چؤکۆب گؤیلۆکده دیزلری اۆسته اۏتورموشدو. آغرې-اۆزۆنتۆ ایچینده تیترک گیله‌لری’یله خئیلک منه باخمېشدې. بنزرسیز راییحه‌لی ساچ‌لارې اۆزۆنه یاپېشېب بدنی أسیم-أسیم أسمیشدی. چۏخ هېچقېرېب آغلایېب سېزلامېشدې، چېرپېنمېشدې.

گؤردۆڲۆ چیرکین صحنه‌لر گؤزۆنۆن اؤنۆندن چکیلمیردی “سانکې بدن‌لری بیر-بیرینه بیتیشمیشدی.”

آز قالمېشدې سینه‌سی یېرتېلا. گؤزلرینه تۏر گلمیشدی.

قاران‌لېق اؤرۆشۆ سۆله‌نیر. آیاق اۆسته سایاقلایېر.

گؤڲَرمیش تیترک دۏداق‌لارې‌نېن آراسېندان چېخان سؤزجۆک‌لری، قولاغې‌نېن دیبینده هله ده دویوردو. قالخېب دؤرد بیر یانا بۏیلانمېشدې:

“آیاغېمېزېن آلتېندا تۏرپاق رقص إدیردی، آغاج‌لارېن چیچه‌ڲی چېرتلایېردې، داغ‌لار ایچیندن-ایچیندن گۆلۆردۆ، بالهارې دیله گلیب آشېب-داشېب ماهنې اۏخویوردو، همن بو اؤرۆش‌لرین گؤوده‌سینی تۏمورجوق‌لار دئشیردی. یئلین باغرېنې کپه‌نک‌لر دلیردی. قوش‌لار قولاغېمېزېن دیبینده نفس‌ دریردی. أکینچی أکینه چېخېردې، سَپینچی سَپینه. بیچیلین اۏت‌لارېن کؤکۆ آجې چکیردی.

قۏووشدوغوموز گۆن …”

قۏلو ‌ایله گؤزۆنۆن یاشېنې سیلمیشدی. گؤزل بَدنی، اۏد توتوب آلېشماقدا اۏلان گؤزلری بئینیمی آلۏولاندېرېردې.

قاش‌لارېنې شوخلوغا چاتاردې، گؤزلریمه زیلله‌نیب “چؤللۆڲۆ، اؤرۆشۆ آز گز، اۏلار سنی مندن داها چۏخ گؤرۆرلر” دئیَردی هر چؤله چېخدېغېمدا؛ منی اؤرۆش‌لره بئله قېسقاناردې.

ایری گؤزلری گیله‌لریمه تیکیلمیشدی. قارا گؤزلری سولو قارا مونجوق کیمی پارېلدامېشدې:

“اؤره‌نه‌نین أته‌ڲینده اۏتلوغون قالېن‌لېغېندا قوجاقلاشاردېق…کئچی قولاغې، یئم‌لیک یئیه-یئیه بۆتۆن قایغې‌لاردان خبرسیز دئییب-گۆلردیک. بیر سن واردېن بیر ده من.”

دیرک‌لری سو اۆزه‌رینده قورولان اۏ إوده؛ اۆره‌ڲی دئشیلیب، گیله‌لری تک سو وئرمیشدی. اۏ إوی ده سو باسمېشدې.

اۏنو اۆره‌ڲیمده داشېدېغېم گۆن مندن گئتمیشدی.

– بَڲیم؟

– جاناااا خانېمېم؟

– منه چۏخ باش چک، سنه یئریکله‌ییرم آخې …

قاققېلدایېب گۆلردی.

فیکیرلریم ده مانقالداکې کؤز کیمی، کۆل آلتېندا گؤمۆلۆب اؤلمۆشدۆ.

برک-برک اؤزۆمه سېخېب یئنه بۏینونا یاپېشمېش ساچ‌لارېنې سېغاللادېم. بدنی یاواش-یاواش ألیمین آلتېندا سۏیودو.

اینجه، سۏیوق بیرآز دا نم بدنینی اؤزۆمدن اوزاقلاشدېرېب اۆزۆنۆ نظردن کئچیرتدیم. قانچېرمایا گؤزۆم ساتاشدې.

بۏشالېب-بؤیۆمۆش گؤزلر گئجه‌نین قاران‌لېغېنې سۏموروردو.

جمده‌ڲی دۏغراماغا گیریشدی. بو قانچېرما بدنی‌نین بۆتۆن سینیرلرینی گردی. گؤزلرینده دلی‌لیک قېغېلجېمې چېرتېلدایېردې. نیفرت ایری‌لَشمیش گؤزلریندن آشېب چؤللۆڲه، چؤللۆکدن اۏیانا بالهارې’یا، اۆره‌ڲینه، اۏنا، گئجه‌یه، دومانا چؤکۆردۆ. قان آرام-آرام تۏرپاق اۆسته دامجېلایېردې. اۏنو یۏخ اؤز ألینی دۏغرامېشدې…

یاشېل‌لېغا قانلې ایز سالا-سالا یاماجا سارې قالخېردې. بالهارې‌ جۏشوردو، داشېردې، باغېرېردې. قانلې سو اؤزۆنۆ اؤرۆشه چېرپېردې، سانکې ایچیندن کئچیب گئدیردی.

کئشکه هر ایکیسی‌نین ده باشېن کسیب قارماق‌لاردان آسسایدېم دئیه دۆشۆنۆردۆ.

سۏن باخېش‌لارې گیله‌لریمده اۏتوروب قالېب. کئشکه بیر آن‌لېق گؤزۆمۆ یوموب اؤزۆمۆ اۏنون أته‌ڲینده گیزلَدیردیم. آغرېدان قېورېلا-قېورېلا دئدیڲی سؤزلر اۆره‌ڲیمی دیدیکله‌ییر، گؤینه‌دیر. تیتره‌یَن سسی هاوا کیمی، یوموشاق-یوموشاق دومانې یارېب، دؤرد یانا زیل قاران‌لېق چؤکدۆرۆردۆ. أل‌لری’‌له، گؤزلری’‌له  قوجاغېما دارتېنېردې. سۏلقون اۆزۆنۆ، پریشان ساچ‌لارېنې، ایچینده سئوگی یاتان گؤزلرینی گؤرۆردۆم. اۏ گؤزلرین، اۏ باخېشېن درین‌لیک‌لرینده گیزلَنیردیم.

دۏداق‌لارې سۆرَکلی ترپه‌نیردی. یانا-یانا آغلایېردې؛ تیتره‌یه-تیتره‌یه دانېشېردې. باشېنې چیڲنیمه قۏیوب اۆزۆنۆ بۏینومدا گیزلتمک ایسته‌ییردی. بونلارېن هامېسې‌نېن یوخو اۏلماسېنا أمین ‌ایدی. اۏنو یوخودان اۏیاتماغېمې ایسته‌ییردی.

سۆمۆک‌لریم گیزیلده‌ییر. بیر سس، قادېن سسی أسینتی کیمی بۆتۆن حۆجئیره‌لریمه هۏپور.

گؤزلریمی آچېرام. ساغ ألی بئلیمده گزیر، سۏل بارماق‌لارې ایسه اۆزۆمۆن هر طرفینه اینجه-اینجه تۏخانېر.

اۆزۆنۆ یوخولو اۆزۆمه یاخېنلادېب آلنېنې آلنېما سؤیکه‌ییر. گؤزلری گۆلۆر، گۆلمه‌مک اۆچۆن اؤزۆنۆ زۏر’لا ساخلایېر.

_”نه گؤزل نقاشی چکمیشم!! گل گئدک گۆزگۆده باخ. بیلیرم بَڲه‌نه‌جکسن.” دۏداغې قاچېر.

_گۆزگۆده چکیبسن؟

شاشېرېرام.

-یۏخ سنین اۆزۆنده‌ه‌ه‌ه‌ه …

یاتاقدان قۏرخا-قۏرخا إنه‌رَک شاققېلدایېب گۆلۆر.

اینیلتی‌لرینی هله ده دویوردوم. اۏ آن‌لاردا دۏداق‌لارېم آغېرلانېب ترپَنمیردی.

“سۏنرا

گۆلۆشۆن گلدی عاغلېما

و ایچیمدن دئدیم کی

یئنه گلسن

یئنه سئوه‌رَم سنی …”

دان یئری آغارېردې. بایېردان دۆنیا دۏلوسو قوش سسی گلیردی. دۆزلرده، تپه‌لرده سۆرۆ  واردې. اوزاقدا خۏروز بانلایېردې. کندده چیچک آچېب یاشېل‌لېغا قارېشمېشدې. بۏغاناق‌سېز، بورولغان‌سېز، یام-یاشېل دینج بیر چؤللۆک گؤردۆ. یاشېل قارالتې اوچوردو. سس‌سیز-سؤزسۆز دانېشېردې. چېغېرېردې؛ آما بو چېغېرتې دا سس‌سیز ایدی.

روحو بالهارې چایېندان، اؤرۆش‌لردن بئله دیدرگین دۆشمۆشدۆ.

بیج-بیج گۆلۆمسه‌یه‌رَک گۆزگۆیه باخدېم. غفلتن باش قالدېران بیر سارسېنتېدان سیلکینیب چېخدېم، اوزون، درین یوخودان آیېلدېم؛ ایری-ایری آچېلېب بۏشالمېش گؤزلریم دۏلدو، یاشېل گؤزلریمدن اۏ باخدې.

بۆتۆن وجودونو سیلکه‌له‌یَن بیر قهقهه’‌یله گۆلدۆ.

اۏ آدامې اؤزۆنده گؤردۆ …

 

بالهارې: بیله سوواردا یئرله‌شیب آرازا آخان چای آدې دېر.

 

یازار / Yazar : آیناز بزرگان

بو یازېنې دا اۏخویون /Bu Yazını da Oxuyun

fəriba vəfi-yeniqapi

اۏقیانوسا باخان داخما / فریبا وفی (حیکایه)

اۏقیانوسا باخان داخما / فریبا وفی (حیکایه)   فیلمده‌کی قادېن إوینی ساتدې. أشیا‌لارېنې دا. اۏنا …


Warning: count(): Parameter must be an array or an object that implements Countable in /home/yeniqapi/public_html/wp-includes/class-wp-comment-query.php on line 399

Leave a Reply

Your email address will not be published. Required fields are marked *