یئنی یازې‌لار / Yeni Yazılar

مئهریبان ملک / صیاد زیادپور (حیکایه)

SeyyadZiyadpur-www.YeniQapi.com-

مئهریبان ملک / صیاد زیادپور (حیکایه)

آنا‌سې هر گۆن بالاجا إل‌آیېن ساچ‌لارېنې دارایېب، تَپ_-تزه‌ پالتار‌لارېنې گئییندیریب چانتاسېنا دا لازېم اۏلان یئمک‌لری قۏیوب اوشاق‌لار باغچا‌سېنا آپارېردې.
گۆنده‌لیک دَرس‌لرینی یاخشې اؤرگندیڲینه‌ گؤره‌ صینیفداش‌لارې‌نېن ایچینده‌ أعلاء قییمَت‌لری قازانان إل‌آی، آتا-آنا إله‌جه‌ ده‌ قۏهوم-أقرابا طرفیندن‌ سئویلیب عزیزلَنیردی.
گئجه‌لر یوخودا طبیعَتین یام-یاشېل بۏیا‌سېندان، کپه‌نک‌لرین اینجه‌ اوچوشوندان، قوش‌لارېن خۏش سَسیندن‌، گۆندۆزلر ده‌ تئلویزیۏن وئرلیش‌لرینده‌ گئدن گؤزَل مَنظَره‌لردن ذؤوق آلېردې.
إل‌آیېن دۆشۆنجه‌سینه‌ گؤره‌ یاز یاغېشېندان سۏنرا گؤرۆنن گؤڲ‌ قورشاغې فاطما آنانېن هاناسې و قېشدا کې قار آدامې دا مئهریبان مله‌ڲین آغ پالتار‌لې هئیکَلی’یدی.
تکلیف‌لرینی یئرینه‌ یئتیرنده‌، مئهریبان ملک یاستېغې‌نېن آلتېنا پول یا دا یاخشې تؤحفه‌‌لر آلېب قۏیوردو، أل چاتماز بیر ایسته‌ڲی اۏلسا گؤز قېرپېمېندا اؤده‌ییردی، سۆت دیشینی دستمالا بۆکۆب یاستېغې‌نېن آلتېنا قۏیاندا گلیب گؤتۆرۆب یئنه‌ یئرینه‌ پول قۏیوردو، آناسې‌نېن دئدیڲینه‌ گؤره‌ قَفَسده‌ کی قۏشا دۏوشان‌لارېندا پولونو اۏ اؤده‌میشدیر، بونلارا باخمایاراق مئهریبان ملک بیر کره‌ ده‌ إل‌آیېن گؤزۆنه‌ گؤرۆنمه‌میشدی.
یئددی یاشېنا دۏلان إل‌آی پایېزېن ایلک گۆن‌لریندن‌ قۏجا تبریزین مدرسه‌لری‌نین بیرینده‌ رسمی اۏلاراق بیرینجی صینیفده‌ دَرس اۏخوماغا باشلادې، هله‌ ده‌ مئهریبان ملک ایله‌ اؤز آراسېنداکې ایلگینی قېرمامېشدې،
یاشامې‌نېن یئنی گۆن‌لرینی یاشایان یئددی یاشلې إل‌آی، آغ بَنیز‌لی، ماوی گؤزلۆ، گۆلر اۆزلۆ بیر خانېمېن اؤرگنچی‌سی اۏلدوغوندان غرور دویوردو، ایلک تانېش‌لېقدا یئته‌نکلی بیر قېز اۏلدوغونو گؤڲ‌ قورشاغې‌نېن یئددی رنگ‌لری حاقدا سۏردوغو سۏرو’یلا‌ ثوبوت إتمیشدی.
سۏن گۆن‌لرده‌ ده‌ آناسېندان سۏروشموشدو، آنا!
اؤرگتمَنمی ایستکلی اۏلور آنامې؟
قېزېم! آنا آدامې دۆنیایا گتیریر (یئره‌ سالېر)
اؤرگتمَن ایسه‌ یئردن گؤڲه‌ قالدېرېر، منجه‌ اؤرگتمن آنادان قات-قات آرتېق سئویلمه‌لی‌ دیر.
بئله‌لیک’له‌ إل‌آی اؤزۆنۆ اؤرگتمَن خانېمېن یانېندا چۏخ راحات حیسّ إدیردی. بیر گۆن مئهریبان ملک ایله‌ اؤز آراسېندا کې أحوالاتدان سؤز آچېب هر نه‌یی اۏلدوغو کیمی دانېشدې، اؤرگتمَن خانېمېن اینجه‌ گۆلۆشۆ’یله‌ اۆزله‌شن إل‌آی بو دفعه‌ هئچ نه‌یی باشا دۆشه‌ بیلمه‌دی.
آرادان نئچه‌ گۆن کئچدی سئویل و ساناز دۏست‌لارې’یلا‌ بیرگه‌ دانېشدېغې حالدا قولاغېنا اؤرگتمَن خانېمېن سَسی آخدې، إل‌آی!
_بَلی خانېم
_گؤزَل بالام سَنین اۏ مئهریبان مله‌ڲین اؤز آنان دېر، آنالار یئر اۆزۆنۆن ملک‌لری دیر، جَنّت آنالارېن آیاق‌لارې‌نېن آلتېندا دېر…
ایچینده‌ یۆزلرجه‌ موقاییسه‌ آپاران إل‌آی ایکی یۏلون آیرېجېندا قالېب هله‌ ده‌ چؤزه‌ بیلمیر مئهریبان ملک آناسې دېر یۏخ’سا اؤرگتمَنی؟!
گله‌جکده‌ ایکی ایستی قانلې قادېنېن شَرَفینه‌ رۏمان یازماغې دۆشۆنَن إل‌آی حال حاضېر‌دا یئددینجی صینیفده‌ اۏخویور.

یازار / Yazar : آیهان میانالیAyhan Miyanalı

بو یازېنې دا اۏخویون /Bu Yazını da Oxuyun

örgətmənlər günü-ayhan miyanalı - yaşanmış hekayə-Yeni Qapı

اؤرگتمن‌لر گۆنۆ / آیهان میانالې (یاشانمېش حیکایه)

اؤرگتمن‌لر گۆنۆ / آیهان میانالې (یاشانمېش حیکایه) ساعات اۏن‌بیری بئش دقیقه کئچمیشدی. کرج شَهَری‌نین خارابا …


Warning: count(): Parameter must be an array or an object that implements Countable in /home/yeniqapi/public_html/wp-includes/class-wp-comment-query.php on line 399

Leave a Reply

Your email address will not be published. Required fields are marked *