یئنی یازې‌لار / Yeni Yazılar
آنا صفحه Ana Səhifə / ادبیات / شعرلر / آزاد شعرلر / آغلاماق دېر وطن اۆچۆن / محمّد نوری‌ (شعر)

آغلاماق دېر وطن اۆچۆن / محمّد نوری‌ (شعر)

1596535302141_NoqkK62o

آغلاماق دېر وطن اۆچۆن / محمّد نوری‌ (شعر)

نئجه‌ ایناندېرېم سنی؟
تئهران بۆتۆن یارا‌لارېنې
قېرمېزې چېراغېن دالېندا دایاندېرېر کی،
یار گلمه‌سین!
سن گلمه‌دین
و هئچ‌بیر مکتوبوم عسگرلیڲیمده‌ ألینه‌ یئتیشمه‌دی.
یارا‌لې‌لارېمې داشېماق اۆچۆن
چیڲین‌لرینی گؤندَرمه‌دین.
ایندی یارا‌لارېم دَلی بیر قېز دېر
من دَلی بیر شاعیر.

نئجه‌ ایناندېرېم سنی؟
کئفلی شاعیر‌لر سینه‌نده‌‌کی حَرم‌لردن اوچور
بۆتۆن قوش‌لار
حَیَطه‌ تؤکۆلن صاباحې دیمدیکله‌دیکجه
سۆمۆک‌لریم چېخار گئجه‌دن.
دئییرسن: نه‌ اۏلسون؟
بیری اوچور
بیری قۏنور
بیری قویلانېر.

نئجه‌ ایناندېرېم سنی؟
آدام‌لار اوچماق ایسته‌یَنده‌
کؤلگه‌لرینی سۏیونورلار
سن دئمه‌، آدام‌لار هر گۆن بیزه‌ سلام وئریب اوزاقلاشسالار دا،
بیر گۆن ویداع‌ سؤزۆ ایله‌ بیزه‌ یاخېنلاشاجاقلار.
سن اۏ اوزاق‌لار‌دا دَلی بیر قېز اۏلاجاقسان،
من بو یاخېن‌لاردا دَلی بیر شاعیر.

***

من اؤز گؤزۆم’له‌ گؤردۆم
وطن دایانمېشدې کنار‌دا!
پۏلیس قاپې آغزېندا دایانان آغاج‌لارا دئییردی:
بوردان بیر ایتی ده‌ قۏیمایېن ایچه‌ری‌ کئچسین!

باخدېم پاسپۏرتوما
پایېز آغاج‌لارې قوجاقلایېب آپارېردې باکې‌’یا
هئچ واخت سۏروشمادېن نییه‌ أل‌لرینی توتاندا آغاج‌لار دیکسینیر؟
یۏخ’سا پایېزمې‌سان؟

هر گئجه‌ یارا‌لارېمدان چېخان آدام‌لارې گؤرۆرَم!
یوخو‌لارېمېن اۏ تایې قېرمېزې دېر.
کیم مندن اۏ یانا بۏیلانسا،
یالنېز دَنیزی گؤره‌ بیلَر.
کیم ساحیل اۏتورقاسېندا أڲلَشیب دَنیز’له‌ دانېشارسا،
بَدَنی اۆزَر.

تانرې اونوتماسېن
دَنیز اۏلدوغوم واخت
سو قوش‌لارې بَدَنیمی یئدیلر،
بو بیر سوء-قصد دیر دئدیم.
تانرې اونوتماسېن
گؤزیاشاردېجې قاز‌لار إلئکترۏن آغلاماق دېر وطن اۆچۆن.

ایندیکی قوش‌لار گؤڲ‌ اۆزۆنه‌ یاپېشېبلار، گۆنَشی بۏرج آل، آمریکایا دئ
تانرې‌نېن بۏرجونو اؤده‌سین.
بو یاغېش ساواشېن یومشالمېش شکلی‌ دیر.
بو قَدَر یاغېشېن آلتېندا سنه‌ عاشیق اۏلماق ایمکان‌سېز دېر.

من اؤز گؤزۆم’له‌ گؤردۆم
منهتن’ده‌ پۏلیس شؤعبه‌سینه‌ گئدن آغاج‌لارېن بیر-بیرینه‌ دئییردیلر:
گؤردۆنۆزمۆ؟
رئستۏراندا یئمک ماساسې اۆستۆند‌ن اوجا بینا‌لار بیتیردی،
جۏرج فلۏید أرکین* اۆستۆنه‌ چېخېب أل‌لری ایله‌ گؤڲ‌ اۆزۆن واراقلایېردې.
گؤردۆنۆز مۆ؟
گؤڲ‌ اۆزۆ سېناندا، هر زامان بیر شاعیر کلمه‌لری أته‌ڲیندن‌ چېخاردېب قوشا چئویریردی.

دئییردیلر
بو قَدَر تانکېن آلتېندان چېخان خانېم‌لار،
إوی اؤلدۆرَر
إو قېشقېرار
و کۆچه‌ده‌کی آغاج‌لار، بیرلَشمیش میللت‌لر تشکیلاتېنا یوبیلئی مراسیمی کئچیردَرلر.

دئییردیلر
پئیغمبَر اۏلماق اۆچۆن سیقارې ترک إت.
دئییردیلر
گؤڲه‌ گئتسن ده‌ فلسطین’ده‌ سئرچه‌ یۏخ دېر.
جۆبران خلیل “یادیگار ایمام”دا قهرمان‌لېق قازانسا،
هامې آپارتما‌نېن قوجاقلایېب
قاچېردار تبریزه!

باخ هر نه‌یین اۏ تایې وار
فۏرما شعرین اۏ تایېندا، بیر قادېن ‌دېر
إعتیراض إتمه‌سن، ألینی توتوب بو تایا کئچمک ایسته‌ییرم!
إعتیراض إتدین، آیاق‌لارېمې کَسدیم، یاپېشدېردېم کؤلگه‌نه‌،
هارا گئدیرسن’سه‌، گئت
هارا گئدیریک
هارا گئتسم ده‌
سنی آختارېب تاپاجاقلار.

یازار / Yazar : آیهان میانالیAyhan Miyanalı

بو یازېنې دا اۏخویون /Bu Yazını da Oxuyun

images (53)

ساواشدان عسگر مکتوبو / جلیل جاوانشیر (شعر)

ساواشدان عسگر مکتوبو / جلیل جاوانشیر (شعر) قان-قادالې ساواش‌لاردان دؤنه‌جم، قېرا بیلمَز اومودومو گۆلـله‌لر. خۏش …


Warning: count(): Parameter must be an array or an object that implements Countable in /home/yeniqapi/public_html/wp-includes/class-wp-comment-query.php on line 399

Leave a Reply

Your email address will not be published. Required fields are marked *