یئنی یازې‌لار / Yeni Yazılar

اوجوز حیات‌لار … / سۏلماز جمالی (حیکایه)

Ucuz Həyatlar-Solmaz Cəmali-YeniQapi.com--

اوجوز حیات‌لار … / سۏلماز جمالی (حیکایه)

قولاق‌لېغېنې چانتاسېندان چېخاردېب جیب تئلفۏنونا تاخېر. قۏللو-بوداقلې آغاج‌لار’لا دۏلو إنلی خیابانې اۆزۆ یوخارې آددېملایاراق سئودیڲی ماهنېنې دینله‌‌ییر:

«بئنی بورادا آراما، آراما آننه

کاپېدا آدېمې، آدېمې سۏرما

ساچ‌لارېنا یېلدېز دۆشمۆش

کۏپارما آننه، آغلاما …

» أحمد کایا اۏخویور.…

بیر آن‌لېق، آغاج‌لارېن یارپاق دۏلو بوداق‌لارې‌نېن آراسېندان «پررر» إله‌ییب هاوایا قالخان سئرچه‌لره باخېر. آغاج‌لارېن کؤلگه‌سی اوزانېب خیابانېن اۆستۆنه سریلمیشدی.

آغاج‌لارېن کؤلگه‌سی اوزانېب باغېن اۏرتاسېنا قدر سریلمیشدی. اۏجاق چاتېردادېقجا قېغېلجېم‌لار أطرافا سېچراشېر، یاواش-یاواش سؤنۆردۆ.

پېچېلتې‌لارېنې دویوب أتی چیمچه‌شیردی.

– بۏشان …

– بۏشانماق ساده آدام‌لارېن ایشیدی. بیز إله بئله ده أمریمیزی آشېرېرېق …

نفسی دارېخېردې. قولاق‌لارې گؤیۆلده‌ییردی. یاناق‌لارې آللانېب پؤرتمۆشدۆ. آیاغا دوروب اوزاقلاشماق ایسته‌ییر‌دیسه ده باجارمېردې. یارپاق‌لارېن آراسېندا بیر قوش جیککیلده‌ییردی؛ اۏنون چېرپېنتې‌لارې، تۏزلو قانادلارې‌نېن پېرېلتېسې سۆکوتو پۏزوردو. کۆله‌ڲین قۏووب گتیردیڲی چیچک قۏخولارې اۏنلارې مست إتمیشدی. آناسې باغېن أته‌ڲینده دۏغرانمېش أت‌لری یوووردو.

 

هاوا یاواش-یاواش قارالېر. آغ-آپپاق لامپالارېن ایچینه گیریر آلا-قاران‌لېق شَهَر. تۆکان‌لارېن شۆشه‌ قاپې‌لارې لامپالارېن ایشېغېنې عکس إتدیریب پارېلدایېر. خیابانېن قېراغېندا ایچی تلیس’‌له دۏلو داشقانې چکن آداما گؤزۆ ساتاشېر؛ اوجالمېش سېقنال سس‌لری اۏنو کارېخدېرسا دا تر تؤکه‌رَک قېرمېزې چېراغېن سۏن ثانییه‌لرینه باخا-باخا زۏر’لا داشقانې ایته‌له‌ییر. نئچه آن‌لېق، داشقا‌نېن تڲرلری‌نین قېجېرتېسېندان باشقا هئچ‌نه إشیتمیر.

آیاغېنې ماسانېن آلتېندان آیاغېنا سۆرتۆب گؤز وورور. قادېن ألینده‌کی چؤره‌ڲه بالدان سۆرتۆب قېمېشېر؛ قاش-گؤزۆنۆ اۏینادېب گۆلۆر؛ باشېنې إهمالجا ترپه‌دیر. کیشی چؤره‌ڲی آغزېندا اؤوکله‌دیکجه گیجگاه‌لارېنداکې دامارلار اۏینایېر. اۏنلار مازاقلاشېردېلار. آیاق قابېسې‌نېن قېجېرتېسېندان باشېنې قالدېرېب اۆزۆنه زیلله‌نیر. آناسې ألینده‌کی چای سینی‌سی’له ماسایا یاخېنلاشېر. ایستیکان‌لارې قاباق‌لارېنا دۆزرکن  سئوگی دۏلو گؤزلرینی أرینه دیکیب گۆلۆمسه‌ییر.

چیڲن‌لری قالخېب-إنیر، بۆتۆن بدنی تیتره‌ییردی. اۏ آغلامېردې؛ ایچه‌ریدن قۏپان نریلتینی بۏغماق ایسته‌دیکجه تیتره‌ییب چالخالانېردې. لال باخېش‌لارې’لا آناسېنا نه‌ایسه دئمک ایسته‌ییردی.

 

پییادا یۏلونون هر ایکی یانېندا خېردا-خوروش آل‌-وئرچی‌لرین یئره سردیک‌لری پال-پالتارا، قاب-قاشېغا گؤز گزدیریر.

اۏردان کئچن‌لرین چۏخونون آلېش-وئریش نیتی اۏلماسا دا آل-وئرچی‌لر’له مېرتلاشېب، بعضن اۏنلارې أله سالېب، بعضن ده سؤزه گلیب سۏووشوب گئدیرلر. آل-وئرچی‌لرین اۆزۆنده کی پریشان‌لېق، یۏرغونلوق پرن-پرن اۏلموش روحونو داها دا داغېدېر. بئزیکمیش گؤزلری’‌له یان-یؤوره‌یه گؤز گزدیریب ساتېشا قۏیدوق‌لارې آیېن-اۏیونو بیر گۆدۆکجۆ کیمی قۏرویورلار. آدام‌لار قۏیون سۆرۆسۆ کیمی بیر-بیرینه گیریر. کیشی‌لردن بعضی‌سی یئرین دارېسقال‌لېغېندان یارارلانېب ایسته‌دیڲی کیمی قادېن‌لارې لمس إدیر.

یۏل آیرېمېندا دوروب نفسینی دریر. یاشېل ایشېغا گؤز تیکیر، قېرمېزې اۏلماسېنې گؤزله‌ییر.

دیلی‌نین آلتېندا مېزېلدانېر:

«قېرمېزې ایشېق آرخاسېندا تانېشدېق

آغ جیزگی‌لر اۆزه‌رینده.

قېوراق آرابالار تک زامان اؤتدۆ اؤنۆمۆزدن.

آردېجېل سېقنال‌لار و اؤیله‌جه پۏلیس فیت‌لری؛

باخمادېق!

قېرمېزې ایشېق‌لار آرخاسېندا سئویشدیک!

و کئچیلمز نه یۏل‌لاردان کئچدیک

گؤزلری‌نین یاشېل ایشېغی’‌لا …*»

عئینی زاماندا یاشېل ایشېغې وئج‌لرینه آلمایېب آجېقلې باخېش‌لارې، سؤیۆش‌لری إشیتمزدن گلیب تۏختاق و سایماز آددېم‌لار’لا خیابانې کئچن آدام‌لارا باخېر. جانا گله‌رَک سېقنال و یامان-یۏوزا باسان ماشېن سۆرۆجۆ‌لرینی گؤزدن کئچیریر.

قارشې خیابانا کئچرکن گؤزۆ اؤنۆنده‌کی یېغېنجاغا ساتاشېر. دایانېر، قولاق‌لېق‌لارې چېخاردېب دینله‌ییر. اۆچ آل-وئرچی باشقا بیر آل-وئرچینی دؤڲۆب، پییادا یۏلونون قېراغېندا ساتدېغې پال-پالتارې سپه‌لَییبلر خیابانېن اۏرتاسېنا. کیشی أڲیلیر، دۆزه‌لیر، دۏنقولدانېر. اۆست-باشې جېرېلمېش، آغېز-بورنو أزیلیب گؤم-گؤی إدیلمیشدی.

کیشی‌لردن بیری قاش-قاباغېنې ساللایاراق یئره تۆپۆرۆر.

“کثافت مادر جنده، دیگه حق نداری جنساتو اینجا بفروشی.”

“بی شرف‌، فقط  اگه یه بار دیگه این اطراف ببینیمت‌ خونت حلاله، خواهرتو …”

بیر قادېن أل‌لرینی دیزلرینه دؤڲه-دؤڲه تشویش’‌له چېغېرېر:”چیکارش دارین بیچاره رو؟ بره دزدی کنه؟”

قادېنا بیرآز مات-مات باخېر …

 

هر ایکی ألینی قالدېرېب مؤحکم قادېنېن باشېندان چېرپمېشدې.

قادېن اۏتوردوغو یئرده گیجَلمیشدی. ألینی آلنېنا قۏیوب آغزېنداکې قانې تۆپۆرمۆشدۆ.

قېز اوشاغې ألینی پاچاسېنا آتېب آغلایان قارداشې‌نېن قوجاغېنا گیرمیشدی. قوجاق-قوجاغا تیتره‌یه-تیتره‌یه آغلامېشدېلار.

همن گئجه اۏتاقدان گۆلۆش‌لری‌نین سسی گاه اوجالېب گاه آلچالمېشدې. آتاسې‌نېن قۏینونا گیرمک اۆچۆن ناز إله‌ین آناسې‌نېن سسینی دویموشدو.

 

بیر ایکی دؤزۆمۆ تۆکنمیش آدام یېغېنجاقدان چېخېب اۏردان اوزاقلاشېرلار.

آرخاسېنې چئویریر، اۏردان اوزاقلاشاراق داواخانانېن قاباغېندا یئنی-یئتمه اۏغلانېن فیلیم گؤتۆره‌رَک قوجاغېندا وورنوخان آز یاشلې قېزا دئدیڲی سؤزۆ إشیدیر: “الان میذارم اینستا فقط ببین چند تا لایک میخوره.”

جاوان قېز گۆله‌رَک سارېیا بۏیانمېش دالقالې ساچ‌لارېنې گؤزۆنۆن اؤنۆندن چکیب قولاغې‌نېن دالېنا یېغېر. دۏندورما ألینده اۏغلانېن بۏینونو قوجاقلایېر:”باهوش منننن عجق خودمی، بوس بوس”

سېرا ایله دۆزۆلمۆش یام-یاشېل آغاج‌لارې گؤزدن کئچیریب کؤکس دۏلو نفس آلېر. داغېنېق ساچ‌لارېنې ألی’‌له دارایېب لئچه‌ڲینی ساهمانلایېر‌. بیر اوشاغېن قاباغېنا قاچاراق “خانوم ایشالله خوشبخت بشی یه آدامس بخر ازم” سؤزۆ ایله اؤزۆنه گلیب اۏنون آجېناجاقلې گؤزلرینه، چیرکه باتمېش اۆزۆنه، جېندېر پار-پالتارېنا باخېر. ألینی چانتاسېنا سالېر؛ پولو چېخاردېب چېخارتماز بالاجا اۏغلان ألیندن قاپېب سئوینه‌رَک قاچېر. سئوینجلی سسینی اوزاقلاشاراق إشیدیر”خدا خیرت بده آبجیییی”.

اوتوبوس دوراغېندا آدام‌جېغازلار بیر-بیرینی ایته‌له‌ییب اؤزلرینی زۏر’لا ایچه‌ری دۆرتۆرلر. أل-آیاق آلتېندا قالان‌لار اۆزلرینی تورشودوب چېغېر-باغېر سالېرلار. بیر قارې ألینده‌کی چلیڲی قالدېرېب چنه‌سی حیرصدن، اۆزۆنتۆدن أسه‌رَک سۆرۆجۆیه، یئره-گؤڲه دئیینیر.

 

– إله‌بیل تۏرپاق آلتېندا چۆرۆده‌جکسن. گل سن ده کئف إله من ده. گئجه قېزونان اوشاق‌لار یاتاننان سۏرا گلیم؟

آیاغې‌نېن آلتېندان یئر قاچمېشدې. سسی إله‌بیل قویودان چېخمېشدې: ننه …

ایچه‌ری گیرمیشدی. ننه‌سی چلیڲینی گؤڲه قالدېرېب آخساق قېچې ایله آیاغا دورماغا چالېشېردې. چنه‌سی شاققېلدایېب دیلی سؤز توتموردو. اۆز-گؤزۆ آغ-آپپاق اۏلموشدو.

آتاسې اۏنو گؤرۆنجه آرخاسېنې چئویریب دېشارې چېخمېشدې.

 

قارا سیچان قنۏودان بۏیلانېب بیرآز ایشېلدایان گؤزلری’‌له  یان-یؤوره‌سینی هۆرکه‌رَک سۆزۆر؛ بیر آلا پیشیڲی یاخېن‌لېغېندا گؤردۆکده بیر آندا گؤزلردن ایتیر.

آلا پیشیڲین کسیلمیش قولاق‌لارېنا زیلله‌نیر.

 

حیطده گۆلمک سس‌لری گؤڲه قۏوزانمېشدې. چؤله چېخدېغېندا یئکه تَهَرین اۆستۆنده قورباغالارېن اۏتا چکدیک‌لرینی گؤرمۆشدۆ. قورباغالار آمان‌سېزجا قورولدایېب آتېلېب دۆشۆردۆلر …

قارداشې اۆزۆنۆ خالاسې اۏغلونا چئویرمیشدی. آغزېنې أڲه-أڲه: “کاش بی پیشیک تاپېب قولاغېن کسیردیک. اۏنون کئفی بوننان چۏخدو.” دئمیشدی.

 

یئمک‌خانالاردان دویولان یئمک قۏخوسو هریانې بۆرۆیۆب. نئچه پیشیک یئمک‌خانالارېن قاباغېنا یېغېشېب قاباق‌لارېنداکې باغېرساق‌لارې دیش‌لری’‌له دارتېرلار. قۏجا کیشی ألینده زیر-زیبیل’‌له دۏلو تۏربا ایله یئمک‌خانالارېن قاباغېندا نئچه دقیقه‌لیک دوراراق اۏرانېن دؤزۆمسۆز ایشچی‌لری طرفیندن قۏوولور. نه‌سه دئییر، دانېشېر، باشا دۆشمۆرلر. إشیتمیرلر.

“دانشجو” پارکېنا یئتیشدیڲینده آیاق‌لارې دایانېر.

پارکېن سۏل بوجاغېندا اوشاق‌لارا اؤزل ایراهلاندېغې بؤلۆمه یؤنه‌لیر.

اۏ گۆندن بیر داها گلمه‌میشدی بورا …

دۏست‌لارې’‌لا بیرگه پارکا گئتمک ایذنینی آناسېندان آلدېغې گۆن، هیجانا قاپېلېب گیزلین سؤزلرینی یازدېغې دفتری ماسانېن اۆزه‌رینده اونوتموشدو. بیر تک اۏ گۆن اونوتموشدو …

اوشاق‌لار هر طرفده سپه‌لَنیب قاچېرلار، اۏینایاراق چېغېرېشېب هیجان’لا گۆلۆرلر.

اۏرتادا آچېق بؤلۆمده نئچه اۏغلان اوشاغې منچئستئر یونایتئد تاخېمېنا عایید اؤزل گئییم‌لری’‌له فوتبال اۏینایېرلار.

یاشېل نیمکت‌لری اینسان‌لار ایچ-ایچه اۏتوراراق دۏلدوروبلار. پارکېن ساغ طرفینده بیر جاوان اۏغلان ساغ آیاغېنې یئره دؤڲه-دؤڲه سیقار پاکئتینی چېخاردېب بؤیرۆنده دیز-دیزه اۏتوران  قېزا طرف توتور. بیرآزدان هره‌سی‌نین ألینده بیر سیقار، باش‌لارېنې گؤڲه سارې قالدېرېب تۆستۆ-تۆستۆیه وئریب‌ حزین-حزین دانېشېغا قېزېشېرلار.

گؤزۆمۆن اؤنۆنۆ ایلک قهوه رنگلی گؤن باشماق سۏنرا بیر پاکت سیقار توتور. گؤزلریمی سیقار پاکئتیندن آلېب یاواشجا یوخارییا قالدېرېرام. قارا لی شالوار، تورونجو قۏل آچېق کؤینک، اوجا بۏی، اۆز-گؤزۆ بزکلی سارېشېن بیر جاوان !

باخېشېمې گؤرۆنجه سیقار پاکئتینی گئری چکیب اؤزۆنه بیرین چېخارېر؛ آداما یۏووشاراق یانېمدا اۏتورور.

بۏیالې دۏداق‌لارې ترپه‌‌نیر:

“نگران نباش، کششی نسبت به تو ندارم.”

سیقارېن سۏمورور؛ بیر ایکی سئری بۏغوق-بۏغوق اؤسکۆرۆر؛ تۆستۆنۆ گؤڲه اۆفۆرۆر. باخېشېمې حیس إدیر. آرخامدان گؤزۆنۆ آلېر؛ سیقارېنې داماغېندان گؤتۆره‌رَک گؤزلریمه زیلله‌نیر، عئینی حالدا آجې ‌دیلی’‌له سانجېر:

“سمت چپت رو نگا، صحنه‌ای که میبینی  از قیافه‌ی من جالبتره”

باشېمې چئویریرم سۏل طرفیمه.

باشقا بیر کیشی’‌له قادېن کیمسه‌نی سایمایاراق بیر-بیرینه سارېلېب‌ اؤپۆشۆرلر.

نئچه اوشاق اۏیونو بوراخېب اۏنلارا یاخېنلاشېرلار … گئری چکیلمیش گؤز یاشې قېزېن نم ببک‌لرینی پارېلدادېب کیرپیک‌لری‌نین دیبینده تیتره‌شیردی.

 

ماشېنېن ایچینده، قاران‌لېق کۆچه‌نی ایشېقلاندېران تک بیر چېراق’‌لا بیر-بیرینه یاخېن اۆزلری گؤرۆر. تانېش کیشی’‌له تانېش بیر قادېن …

ماشېنېن دال صندلی‌سینده یوخودان آیېلان دۏققوز یاشدا قېز اوشاغې بو گؤرۆنتۆنۆ ایزله‌ییر. ألینی آتېر پاچاسېنا، اؤزۆنۆ بولایېر.

آناسې‌نېن گۆنده‌لیک دفتری’‌له بیرگه آلۏولانان ساچ‌لارې، یانېب بۆزۆشن بدنی، گؤزۆنۆن قاباغېندا جانلانېب أتی‌نین یانېق قۏخوسو بورنونو دۏلدورور…

 

ارسطو مجردی*

یازار / Yazar : آیناز بزرگان

بو یازېنې دا اۏخویون /Bu Yazını da Oxuyun

Aynaz Bozorgan-ağ-qırmızı tutlar

آغ-قېرمېزې توت‌لار / آیناز بزرگان (حیکایه)

آغ-قېرمېزې توت‌لار / آیناز بزرگان (حیکایه)   فیزیک اؤرگتمَنی قارا تاختانېن قاباغېندا دایانېب ألینده‌کی گچ’له …


Warning: count(): Parameter must be an array or an object that implements Countable in /home/yeniqapi/public_html/wp-includes/class-wp-comment-query.php on line 399

Leave a Reply

Your email address will not be published. Required fields are marked *