اؤلچۆسۆز اومود‌لار / آیدا شهباززاده
سَحَر تئزدن گۆنَش پارېنقاسې، پنجره‌سینده إله بۏیلانېردې کی، کیمسه‌نین آختارېشېنا گلمیشدی. دویقولو، کَدَر‌لی گؤزلرینی یوموب سینه‌دۏلوسو نفس آلدې. قوش‌لار گؤڲ اۆزۆنده دسته-دسته اوچوشوب فېرلانېردېلار. گؤڲده‌کی قاناد چالان آزاد قوش‌لارا حَسَد’له باخېب یانېقلې اوفولدانېب دریندن نفس آلدې. اۏنون یوخوسو گؤزۆندن قاچاق دۆشمۆش گزیب-دۏلاشمېش، اؤلمۆش بیر سئوگی‌نین روحو کیمی… اۏنو اؤزۆندن چۏخ اوزاق‌لارا آپارېب-گتیریردی…
اۏ چۏخدان سؤنمۆش سئوگی اۏجاغې‌نېن کؤزَرتی‌لری’له یاشایېردې.
اۆره‌ڲی‌نین درین‌لیڲینده، اؤلمۆش آرزې‌لارې‌نېن، سۏلموش اومودلارې‌نېن آرا‌سېندا، اۏ أل‌چاتماز سئوگی‌نین قا‌لېق‌لارې هله ده یاشایېر. جانې کۆت آغرې حیسّی سېزېم-سېزېم سېزېلدایېر.
اۏنون پنجره‌سینده قالخان بیر چینار آغاجې‌دې. اۏ، چینار آغاجېنې اؤزۆنه بنزه‌دیردی.
یارپاق‌لارې ایسه، عؤمرۆنۆن گۆن‌لرینی سایېب، ایل‌لرینی یۏلا سالمېشدې. یَقین کی، هله ده یاشاماق ایسته‌یَن، دۆنیادان دۏیمایان بیر جۆت ایشېغې آزالمېش گؤز، چۏخ اوزاق یئردن گلَن عزیزینی گؤزله‌ییرمیش کیمی نؤوبَتی یازدا بو یارپاق‌لار یئنه‌ده دۏغولاجاق، سن ایسه…
سینه‌سینده چېرپېنتې حیسّ إدیردی. یئرینده اۏتوروب ألینی سۆرعت’له چېرپېنان سینه‌سینه سېخدې.
-داها اۆره‌ڲیم ده سؤزۆمه باخماق ایسته‌میر، إله بیل یئریندن چېرپېنېب چېخاجاق. اۆره‌ڲی دۏلو سؤز یۆکۆ’یله، تک قالا‌ندا اؤزۆ–اؤزۆنه پېچېلدادېغې سؤز‌لرین هامې‌سېنې، اۆره‌ڲی‌نین أن اوجقار بوجاغېنا داشېیېب. گؤزۆنۆن بیرینده بیر داملا گؤز یاشې دۏنوب قالېب، اۏ بیری گؤزۆنده اومود پارېلدایېر…اومود‌لارېندان یاپېشېب بَرک-بَرک….دۆشۆنَرسن…اۏندا گؤزله‌مه‌دیڲین آندا اومود قاپېنا گلر. هئچ گؤزله‌مه‌دیڲین بیر واختدا. اۏنون بو سۏرغولارې اۆزه‌ریندن، قالخان سرین و تمیز هاوانې جیڲر‌لرینه چَکدی. بیر قېزا عۆنوانلانمېش سئوگی قیسمتی أبَدی اۏلاراق اۏنون اۆره‌ڲینده قالېب.
گؤره‌سن نه واختاجان گۆنَش کیمی نور ساچان بو قېز’لا دانېشماق شانسې اۏلاجاقدېر…اؤزۆنۆ یالنېز، آلدانمېش حیسّ إتدی. إح‌ح‌ح، گؤرۆنۆر، منیم ده قیسمتیم بئله ایمیش. یان-یؤوره‌سینده هر شئی دایانماق’لا تسلیم اۏلماق عَرَفه‌سینده دیر. یاشادېغې یاشامې فیلم لئنتی کیمی گؤزۆنۆن قارشې‌سېنا گتیرمه‌ڲه جانلانېردې….اۏتوروب درین خیالا دالمېشدې. درین دۆشۆنجه‌لر اۏنو اؤزۆندن چۏخ اوزاق‌لارا آپارېب-گتیریردی.آما اۏنون دۆشه‌جه‌ڲی آن‌لار هله اوزاقدا دېر، گؤرۆنمۆر.
بو دورومدا، قفیلدن اۏنو سۏیوق کۆلَک سانکی سېخېب اؤزۆنه طرف چَکدی. بو نه‌دَن‌دَن رؤیا‌لارېنا قۏیولموش دایانقا (پاوزا) دۆڲمه‌سینی یېغېشدېرماق ایسته‌دی. بیردن سۏیوق کۆلَک اۏنو اؤز أل‌لرینه آلدې. ساچ‌لارېنا تۏخاندې، یۆنگۆلجه ترپه‌دیب سرخۏش إدیردی…اۏ منیم ألیمی توتدو. منی قۏرخاق و آخماق قېز کیمی أله سالمامېشدې. اۏنا اۆره‌ڲیم قَدَر اینانماغا باشلادېم. هر گئجه ساچ‌لارېمې سېغالایان، منیم خیالېمې داها ساکیت و گؤزَل‌لَشدیرَن بو وار‌لېق ایندی منیم’له اۆز-اۆزه دورموشدو. اۆزۆمده‌کی عجاییب ایفاده‌دَن بئله آنلاماق اۏ‌لار کی، من هئچ قۏرخمورام ساده‌جه اومود ایچینده باتېرام.
اۏرا‌دا غریبه بیر سئوینج حیسّنی سئزدیم. دیلیم تیر-تیر أسیردی. آخې سن حقیقت دَڲیلسن. -دئیه اۏنون گؤزلری‌نین ایچینه باخدېم. سن یۏخسان…یۏخسان و گرچک‌لیکده اۏلاناقلې اۏلا بیلمزسن. ساده‌جه یالنېز منیم گؤزۆمه گؤرۆنۆرسَن. من باغېرېب، آغلایېردېم. چۆنکی اۏنو آرتېق ایتیر‌میشدیم دئیه، بیر آن‌لېق منی دَهشَت بۆرۆدۆ. گؤزلریمی بَرَلدیب اۏنا باخدېم. گؤزلر سانکی آی کیمی آغ و بۏز رنگ‌لری‌نین قارېشېغې، منی ایشېقلاندېرېردې. سَسیمی چېخارتمېردېم، آما حیسّ إتدیم کی، قلبینده‌کی نور ایسه آرتېق پارتلایېب، خۏشبخت بیر آلۏوا چئوریلمیشدی اؤزۆنۆنه پېچېلدادې: “کاش کی داییمی سنین’له قالا‌ردېم. حتتا اؤلسَم بئله بو خۏشبخت حیسّ’له اؤلردیم.” هر زامان کیمین’سه و فرقلی اینسانېن یانېمدا اۏلماسېنې آرزېلایېردېم. منیم چتین‌لیک‌لریمی ایشېق سۆرعتینده یۏخ إتمه‌سینی ایسته‌ییردیم و یالنېز… یالنېز سن بونو باجاردېن. باشېمې آشاغې سالېب، اؤزۆمۆ ساکیت‌لَشدیرمه‌ڲه چالېشېردېم. اۆزۆمده‌کی تَردن سا‌چېم صیفَتیمه یاپېشمېش؛ بیر داها گؤزلریمی بَرَلدیب اۏنا باخدېم. گرچکدن ده اۏنو تانېمېرام. من ده هله اۏنا سرخۏش دَلی کیمی وورولموش قۏل‌لارې‌نېن إحاطه‌سینده عاجیز قالمېشام؛ اۏ، ایسه منیم اۆچۆن أعلاء بیر سئوگی رۏلونو اۏینایېر… لاکین من نه قَدَر چالېشسامدا غالیب گله بیلمه‌دیم و سانکی، أسیر دۆشدۆم. بونا گؤره ایچیمده‌کی دؤیۆجله‌ین سَسه سۏن قۏیماق ایسته‌ییردیم. کئچمیشده ایچیمده یانان خیال‌لارېم، آرتېق دؤزه بیلمه‌ییب، ساکیتجه بۆتۆن بونلاردان حظّ آلماق، یاشامېمېن بیر سئوینجی ایدی. ایندی ایسه اۏنون درین‌لیڲینده، قاران‌لېغا آپاران چالانېن اۆزۆنده ایدیم دئیه، بیر آن‌لېق منی دَهشَت بۆرۆدۆ. گؤزۆمه دۆشن کؤلگه یۏخ اۏلدو. آنجاق اۆره‌ڲی ایسته‌دیڲی کیمی آلېنمېردې. سَسیمی چېخارتماسام دا، اۆره‌ڲیم وار گۆجۆ’یله چېغېرار: سنین’له گئتمه‌ڲه حاضېرام…. بو آن‌لېق، إله بیل کیم ایسه منیم آغزېمې توتوب، دانېشماغا و ترپنمه‌ڲه ایمکان وئرمیردی. من ایسه گۆجسۆزله‌میش، یوخو گؤرۆرمۆش کیمی دیکسینیب درین خیالدان آیرېلدېم. گۆنَشین نورو ساده‌جه مؤعجۆزه‌وی شکیلده فۏرماسېنې دَڲیشدیرمیش. آرتېق آیېن ایشېغې اؤز عادی فۏرماسېنا گلمېش….!
سانکی خاطیره‌لرینده آیرې‌لېق دومانې باشېنان چؤکمۆش، اۆره‌ڲینده قایغېنې، سئوگی گۆجۆنۆ و اؤزگۆرلۆڲه چاتمېش اومودونو آرتېرېردې.
