یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
دومانلې مکتوبلار (1) / لیلی خدایی (اینجه أدبیات)
نه یۏل، نه یوخو. نه چېراق، نه آغلاماق.
“فروردین آیې‌نېن یئددی‌سینه‌جن گوزله‌رَم سنی”
اؤلۆم دئدی.
هر گۆن گلیر إویمه. هردن بیر ایستیکان چای ایچیر. سۏنرا دوروب کیتاب‌لارېن تۏزونو سیلیر. قورآنې دا آتامېن تَر دستمالې’یلا. پرده‌لری چکیر، گۆنشی چۏخ سئویر. اۆره‌ڲیم سېخېلاندا بایاتې اۏخویور. گؤزلریمه باخېب گۆلۆمسه‌ییر. گئجه‌لر پنجره دالې‌سېندا دوروب چېراق یاندېرېر. آخشام‌لار تزه چؤرک آلېر. گؤیرچین‌لره دن سَپیر. گۆل‌لره سو وئریر. اؤلۆم منی چۏخ سئویر.
بو گۆن دئدی: گؤزله‌مکدن یۏرولدوم. یا دومان یا من. ایل‌لر بۏیو نیسگیل ایله یاشاماغې ایسته‌ییرسن یۏخسا بیاض گلین‌لیڲی گئییب اۏ باکیره دۆنیانېن یۏلجوسو اۏلماغی؟
ایکی یۏل آراسېندا قالېب چۏبان اولدوزونو ایتیرمیشم. سن سؤیله دومان؛ گئدن، خبر آلمایان عاشیقیمی سئچیم، یۏخسا قالان، خبر آلان مَحبّتی؟
دومانلې مکتوبلار- لیلی خدایی
