منی بوگۆن اۆچۆن باغېشلا اۏغلوم! / زهرا نظرنژاد (داملا) (شعر)

منی بوگۆن اۆچۆن باغېشلا اۏغلوم! / زهرا نظرنژاد (داملا) (شعر)

سنی اؤز ألیم’له وئردیم اؤزگه‌یه
منی بوگۆن اۆچۆن باغېشلا اۏغلوم!
سنی بیر گۆل ساياق دردیم اؤزگه‌یه
منی بوگۆن اۆچۆن باغېشلا اۏغلوم!

بیر چاره‌م اۏلسایدې وئرمزدیم یقین
من آنا دیلینه قېیمازدېم سنین
اؤنۆنده خجیلم دۏغما وطنین
منی بوگۆن اۆچۆن باغېشلا اۏغلوم!

قۏلونو باغلادېم دئدیم: بویورون!
آلېن! قۏل-قانادېن قۏپارېن-قېرېن!
نه آنادان دئیین، نه دیلدن سۏرون!
منی بوگۆن اۆچۆن باغېشلا اۏغلوم!

سندن اوتانېرام، باشېم آشاغې…
آرخامدا وطن وار، اؤنۆمده یاغې
اۏندان اۆز چؤندَردیم مانقورت سایاغې
منی بوگۆن اۆچۆن باغېشلا اۏغلوم!

قوربان وئره‌جکدیم سنی من اۏنا
نه یازېق سۏیوندون اؤزگه بیر دۏنا
یاد اۏجاق‌لار اۆچۆن دؤندۆن اۏدونا
منی بوگۆن اۆچۆن باغېشلا اۏغلوم!

من «داملا» اۏلدوم سن سئل اۏلاجاقدېن
یوردون دامارېنا قان دۏلاجاقدېن
منیم اؤجۆمۆ ده سن آلاجاقدېن
منی بوگۆن اۆچۆن باغېشلا اۏغلوم!…

«داملا» 1394/7/1