یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
صۆلح سیمگه‌سی / نوریه لوح (شعر)
اوفوقی دَڲیل
کلمه‌لر
دیکینه دؤشه‌نیر قلمین اوجونا
بۏیوت‌لار بۏیلانېر أسکی دووارلاردان
شامدانې‌لار سئویشیر
سربست سارماشېق‌لار’لا
هه
صۆلح سیمگه‌سی دیر بارماق‌لارېم
قَلَمین گۆجۆنه ایناندېقجا
داها آردېجېل، داها چالېشقان
بۏت‌لارې تانېدېقجا
داها گۆجلۆ، داها قۏرخماز
دیۏجانس‌جاسېنا
سېندېرېرام تابۏلارې
من دۆنیانېن شَهَرداشې‌یام
یئر کۆره‌سی فېرلانېر باشېمېن قافاتاسېندا
سېنېرلار سېنېر نۏرۏن‌لارېمېن بؤجک‌لرینده
خزر یۏل آچېر گؤز پېنارلارېما
بیرلَشیر گؤزۆمۆن اؤنۆنده میللت‌لر
ایستیکانلاشېر شعریمین گۆن چېخان بوجاغېندا صۆلح شاعیرلری
اۏریانا دۏغور اۏ هئچ دۏغولماز اوشاغې
نزار دانېشېر بئیروتون قۏورولموش ساچ‌لارېندان
بورسا دادې وئریر حیکمَتین قانادلارې
بئرلین چات گؤتۆرۆر برئشتین یازې‌سېندا
ریتسۏسون چیچک‌لرینه چاتېر شعیریمین خالچاسې
اپیتافیۏسو قورتارېنجا أل‌لریم قېزارېر
چؤره‌ڲی، سویو، هاوانې، آلسالار دا
گۆلۆش‌لریمی چۏخ گؤرمه‌میشم
شعریمین پابلۏسونا…
.
.
.
بیز چېخېرېق ساواش‌لارېن اوزون خلسه‌سیندن
دویقولار کئف‌لَنیر
و یئنی‌دن سئویشیریک شَهَرین رؤیالې گۆن باتېشېندا
مزه‌لَنیر ساواشدان قورتولان دۏداق‌لارېمېز
و دینجه‌لیر یۏرقون اۏرقان‌لارېمېز
.
.
.
اۏن مرتبه‌لی یوخو دېر شعیریم
بیر آن دیکسینیرَم اۏرتا قاتېندا
بوراسې شینگئن دَڲیل
بیرتایېم قافقاز
بیر یانېم اۏرتادۏغو
اۆز به اۆزۆم ایسه قارا قۏشونون سېندېرېلماز قایالارې
بوردا تانرې‌لار داها زۏرلو
جهالت آت چاپدېرېر ایچیمیزین
بۏش إمپراطورلوغوندا
مئکزیک دووارلارېندان هۆندۆردۆر نادان‌لېق
بوردا آغ-قارا گزیرلر
قاران‌لېق “شئیتانرې‌لارې”
دارا چکیرلر آزادلېغې
و اۏراقلایېرلار سئوگی‌نین گنج چاغ‌لارېنې
هه
بیز اۏرتا عصیرلری یاشایېرېق أصلینده
خاچ یۆرۆش‌لری قورتارمایېب بوردا هله
“شئیتانرې” سؤزۆ زامان پاشازاده‌نین “آینادا اؤل-دیریلمک” شعر تۏپلوسونداکې شئیتانرې شعریندن آلېنمېش.
