وطن ایزگه‌سی / سحر روحی (شعر)

وطن ایزگه‌سی / سحر روحی (شعر)

وطن دئدیڲین، اینسانا آنا اۏلار
یئتیمین باشېنا ناز ایله چکیلن أل اۏلار
گؤز اۏلار قولاق اۏلار
آرخاسېندا دوران داغ اۏلار
گۆنشی، ایسېندېرار جانېوې
هاواسې جوشه گتیرر قانېوې
سنی دئییرم
سنی یازېرام
إشیدیرسن منی جاندان شیرین وطنیم؟؟؟
هئچ بیلیرسن‌می وطنین ایزگه‌سی اۏلار؟
شهیدلری‌نین ده، شیرین شیرین اینکه‌سی اۏلار؟
سن نه بیلیرسن قانې بیر، أتی بیر اؤگئی‌لیک نه‌دیر؟
حسرت’له باخېب، سوسوب، یاساق‌لېق نه‌دیر?
اؤولادلې سۏنسوزلوق،آنالې یئتیم‌لیک نه‌دیر؟
سنی دئییرم
سنی یازېرام
إشیدیرسن منی جاندان شیرین وطنیم؟؟؟
یاتېب یوخودا سنی گؤرمک ایسته‌ییرم
ساچ‌لارېم، هاواندا‌‌ دالغالانېب اوچماق ایسته‌ییرم
داغېن دا داشېندا‌ گزیب قاچماق ایسته‌ییرم
سنین اۏلوب سنین ده قالماق ایسته‌ییرم
آمان آللاهېم…
بو یوخو دۏغرو اۏلسون ایسته‌ییرم
سنی دئییرم
سنی یازېرام
إشیدیرسن منی جاندان شیرین وطنیم؟؟؟