بَبه نییه آغلایېرسان؟ / ملیحه عزیزپور (شعر)

بَبه نییه آغلایېرسان؟ / ملیحه عزیزپور (شعر)

بالاجا شهیدلره سونولور

بَبه!
نییه آغلایېرسان؟
اۏیونجاغېوې‌مې ایتیریبسن؟
آخ!!!
هانې بس ساغ قۏلون؟
نه‌ ده گؤزل گؤزلرین وار!
آنان،
زئیتون باغ‌لارېنا یئریک‌لَییب یقین!
آنان-بابان کیم دیر؟
آدېوې سوروشمامېشام هئچ!
آدېن نه‌دیر؟
کیم کؤکسۆنه دامغالایېب
آدېوېن مجهوللوغونو؟
موسی‌سان؟
محمدسن؟
کیمسن؟
بلکه مسیح‌سن عزیزیم؟!!
آخې اۏ بویورموشدو؛
ساغ گؤزۆوۆ چېخارتسالار،
سۏل گؤزۆوو ایسمارلا.
ساغ قۏلووو کسسه‌لر،
سۏل قۏلووو ایسمارلا…
– وطنین، ساغې-سۏلو اۏلمور کی –
بیلیرم.
آما، کیمسن سن؟
هـه!!!
یارالارېندان تانېدېم ایندی!
قاراباغا، تبریزه بنزه‌ییرسن.
آدېن؛ غزّه دیر!
ایندی تانېدېم…
آغلاما قوزوم!
دۆنیانېن باشېنا داش دۆشۆر
گؤز یاش‌لارېن.
آغلاما…
باخ!
گؤر نئجه
مۏدئرن اۏیونجاق‌لار وار چئورَنـده!
گؤزل اۏیونجاق‌لار دېر.
دئموکراتچې عمی‌لر گتیریبلر!
آل اۏینات.
آما گؤزله،
سۏل طرفینی آپارماسین
بو چیچی‌لر…
گل قوجوما قاداسې!
یۏخسا
قان آپاراجاق یئر اۆزۆنۆ.
اۏلسون!
نه ده اۏلسا؛
گئیمه‌ڲه کفن یاخشی!
وطن ساغ اۏلسون
و
سن…!
جهنمی ده جنت‌ دیر
وطنین.
اۆزۆلمه!
دۆز، اۆره‌ڲیوین باشېنا گؤمه‌جه‌یم وطنین؛
وطن‌سیزلیڲینی…!
آغلاما،
آرخایېن یوم گؤزلریوی.
آرخایېن اؤل
قاداسې…!