ساواشدان عسگر مکتوبو / جلیل جاوانشیر (شعر)

ساواشدان عسگر مکتوبو / جلیل جاوانشیر (شعر)

قان-قادالې ساواش‌لاردان دؤنه‌جم،
قېرا بیلمَز اومودومو گۆلـله‌لر.
خۏش مۆژده‌لی ظفر‌لر’له گله‌جم،
غالیب کیمی قایېداجام بیر سَحَر.

بیر آز دؤڲۆش خاطیره‌سی – دومانلې،
خۏش گله‌جَک، خۏش اومودلار – بیر قوجاق.
قېزېم اۆچۆن سامان ساچلې گلین‌جیک
اۏغلوم اۆچۆن بۏش گیلیزدن اۏیونجاق.

بیر ده‌ دؤڲۆش دۏست‌لارېمېن فۏتۏسو،
بؤیۆده‌رَم، دووارېمدان آسارام
دؤڲۆش‌لرد‌ن، ساواشدان سؤز دۆشنده‌،
اۏ فۏتۏیا باخارام، گؤز وورارام.

ساچ‌لارېمدا بیر آز بارېت قۏخوسو،
قۏخو گئد‌ر، آنجاق بیتمز قۏرخولار
نئچه‌ سۆرَج یوخو گئتمز گؤزۆمه‌،
گئجه‌لری کابوس اۏ‌لار یوخولار.

خۏش مۆژده’یله قایېداجام، گؤزله‌یین
قایېداجام من اومود’لا، ظفر’له.
قایېداجام، هله‌ دؤزۆن صبر إدین،
قایېداجام مۆطلَق گؤزَل خبر’له‌…

قایېداجام مۆطلَق، منی گؤزله‌یین
آنجاق هله‌ بو داغ‌لاردا ساواش وار،
کؤرپه‌لرین اومودونو اۆزمه‌ڲین
یا گئج، یا تئز، بیتیر بۆتۆن ساواش‌لار…