میلچک / ایلقار مؤذن‌زاده (حیکایه)
ناهاردان سۏنرا اوزانېب یاتماق ایسته‌دیم. وېژېلتې’یلا بورنومون اۆستۆندن سۏووشدو. قولاغېما إندی. دورسام یقین کی چۏخا باخاجاق. اؤلدۆرمه‌یه‌جه‌یم. قانادلارېنې یۏلوب، قېچ‌لارېنې قۏپارداجاغام. میله چکیب، قارېشقالارېن قاباغېنا آتاجاغام. اۆستۆمه سردیڲیم مَلافه‌یه بۆرۆنسَم بلکه دینجلدیم. نه ایسه ایراده‌سی‌نین قاباغېندا ألیمدن بیر ایش گلمز کیمی، هاردان ملافه ایچینه سۏخولماغېنې دا بیلمیرم.
اۏ نئچه آن‌لیق حیاتېنې سۆرمه‌ڲه چالېشسا دا، یاتماغا جان آتېرام بو آن. اۆزۆم، یاناغېم، دۏداغېم آماندا قالمېر. توتوب قانادېنې یۏلماق ایسته‌ییرم.
مَلافه‌نی دؤرد یاندان یاپېشېرام. هر یئر آغ اۏلوب. کولئر اۆزۆمه وورمادېغې اۆچۆن ایستیدن پیشیرم. مَلافه‌نین ایچینه سۏخولوب. دیری توتا بیلمه‌سیندن وازکئچیرم. مَلافه‌نی دؤرد یاندان اؤرتۆب، آیاغېم، باشېم و أل‌لریم’له بۆکۆرَم. ایستیدن ترله‌سَم ده اؤلدۆرمه‌سینه دَڲر. نفسیم قارالېر. تر آلنېمدان گؤزۆمه دۆشۆر. بئلیمین قاشېنماسېنا دؤزسَم بلکه توتا بیلَم. قارنېمېن اۆستۆنده دیر. وېزېلتې‌سې گلمیر. یۏخ، قارنېمېن اۆستۆنده دَڲیل. نئچه گۆنلۆک حیاتېنا بو آن سۏن قۏیاجاغام. بیلمیرم میلچه‌ڲین ده آلېنې وار یۏخسا یۏخ. نه’یسه گؤرَولی مأمور کیمی باشېمدان أل چکمه‌سه ده، یازې‌سې مَلافه ایچره بۏغولماق اۏلاجاق.
اۏ تای بو تایا فېرلانېرام، بؤیرۆمده زادېمدا اۏلسا خَشیلی چېخسېن. اؤلمه‌سه ده هاواسېزلېقدان اؤلر کی. بیلدیره‌جه‌یم یئریمه گیرمَک نئچه‌یه باخار.
مَلافه‌یه بۆرۆنۆب نئچه دؤور ساندویچ کیمی فېرلانمېشام. هاواسېزلېغا دؤزه بیلمیرم. ایندی‌یـه کیمی حتمن اؤلۆب. جسد کیمی هر طرفیمی مَلافه بۆرۆمۆش حالدا، وېزېلتېیا قولاق آسماق اۆچۆن، نفس‌لریمی یاواشلادېرام.
آروادېم اۏتاغا کئچر-کئچمَز قېشقېرېر. بلکه اۏتاغېن اۏرتاسېندا مومیالانمېش جسده اۏخشادېب. دیک آتېلېرام. شاشمېش گؤزلر’یله زیلله‌نیب باخدېغېنې گؤرمزدن اۏتورورام. سېنمېش عئینکی بالېنجېن اۆستۆنه قۏیوب، یئرده میلچک جسدی آختارېرام. خانېمېم باشېنې بوللالایېب اۏتاقدان چېخارکَن، بیر وېزېلتې سۏووشور قولاغېمېن دیبیندن.
***
ساعات بئش اۏلوب. یوخوسوز اۏلسام دا ایش‌لری گؤرمه‌لی‌یَم. بیر داها صاباحېن واختې گلمیش چکی ایله، قېسط‌لارېن فکرینه قاپېلېرام. إشیڲه چېخېرام. دفتریمی آچمامېش، برق کۆچه‌سینده‌کی عئینک تعمیرگاهېنا گئتمه‌لی‌یَم…
97-یای-أردبیل
ایلقار موذن‌زاده
بَنزَرگه‌لر / Bənzərgələr
شعر و سایکۏتراپی / ایلقار موذن‌زاده (مقاله)
قابارلې نفسلر / مهسا عبدالعلیزاده (شعر)
ایکی یاشلې کؤرپهنین آجې حیکایهسی / واریث یۏلچویئو…
ایلان / رحیم علییئو (حیکایه)
بوز / اومان میانالې (حیکایه)
جزا / سئوینج إلسئور (حیکایه)
قار دنهلری / آیناز بزرگان (حیکایه)
یالقېز إو / سحر روحی (حیکایه)
قۏرخو / امین ناصری (حیکایه)
