شوشا / أنصار قاراداغلې (شعر)

شوشا / أنصار قاراداغلې (شعر)

اۏ نه‌ پئیقمبر دېر، نه‌ پادشاه‌ دېر
اؤزۆ قوتسال قیبله، روحو آللاه‌ دېر
دَریالار سَسیندن‌ قالا‌ن سئگاه‌ دېر
یووا موشتولوق وئر، وطن، اۏ قوشا
قافقاز قیامې دېر، شوشا دېر، شوشا!

تاریخ دیلبری’یله قۏل-بۏیون شَهَر
آلنېنا باغلایېر درد‌لی نغمه‌لر
تۏیوندا چېمرانمېش رقص إدیر هۆنَر
قلم نذر إیله‌ییر یازدېغې داشا
قافقاز قیامې دېر، شوشا دېر، شوشا!

هر داشې ناماز دېر، هر کرپیج آذان
قدیم قالا‌‌لاردا سجده‌ده  دومان
بیر قېز بولاغې وار مایاسې ناردان
باهارې گؤز وورور قلم‌قاش قېشا
قافقاز قیامې دېر، شوشا دېر، شوشا!

آیېن دا إوی دېر، هر آینا‌نېن دا
یئرین ده‌ مسکنی، ثۆرَیّا‌نېن دا
یوسیفه‌ تۏی توتموش میصر إیوا‌نېندا
زۆلئیخا آختارېر، بی دورسون قۏشا
قافقاز قیامې دېر، شوشا دېر، شوشا!

نه‌دیر قیصّه‌سینده‌ بو تۆتئی سَسی؟
شمسین سَرخطی‌ دیر، مؤولوی دَرسی
گۆندۆزه‌ تندیر دیر، گئجه‌یه‌ کۆرسۆ
اولدوزلار حۆسنۆنه گؤز-گؤز تاماشا
قافقاز قیامې دېر، شوشا دېر، شوشا!

نور-ناماز بیتیریر أکدیڲی زمی
یازې یاغېش‌لارا چکیر قلمی
خزر بارداغې’یلا ایچیر زَمزَمی
بنزه‌ییر کلئیبره‌؛ دۏغما قارداشا
قافقاز قیامې دېر، شوشا دېر، شوشا!

۹۹/۸/۲۰

Yazını bu əlifbada oxuyun: TÜRKCƏ