سن منیم کیمی‌سَن إی قار / شمس لنگرودی (چئوری شعر)

سن منیم کیمی‌سَن إی قار / شمس لنگرودی (چئوری شعر)

چئویرن: الهام بزرگان

 

سن منیم کیمی‌سَن إی قار

گئدیرسن و أریییرسن.

سن منیم کیمی‌سَن إی قار

اۏدو یاندېرېرسان

ایستی‌لیڲینده‌ اؤلمک اۆچۆن

یایېن یاسمن چیچک‌لری سنی یانسېلایېر

سنی گؤرمه‌یَن کپه‌نک‌لر

اۏنا عاشیق اۏلورلار

اۏلمایا آلېن یازېمې بیر یئرده‌ گؤرۆبسن قار.

کئشکه‌ باجارېب یایدا یاغاردېن

و بیز قار اؤرتۆڲۆ’یله

گۆنَشه‌ قارشې نازلاناردېق.

خالقېن شن‌لیڲینه‌ گۆوَنمه‌

یاغارکن نئعمت‌سَن

یئره‌ اۏتوردوقدا لعنت‌لری’له قارشېلاشارسان.

سَس‌سیزلیکده‌ بیر شئی یازېرسان

حیکمتین’له هامېمېزې راستلادېرسان

سَنین آغېنسامالارېنې یاخشې تانېیېرېق.

سن نه‌قدر ساده‌سَن کی هامېیا بیرگه یاغېرسان

سن نه‌قدر ساده‌سَن کی  آغاج‌لارېن اۆزه‌رینده‌ یازېن آلېن یازې‌سېنې یازېرسان

بونلارا سېوېنسالار دا، اۏخویورلار

سۏنوندا، گؤر نه‌ قَدَر پیس بیر دۆنیا اۏلدو

گۆنَشی

سَنین اۆچۆن حاکیم قۏیدولار

سن ده‌ تیتره‌ین آیاق‌لار ایله‌ یئره‌ اۏتورورسان

بللی دیر کی سېنېرسان قار.

 

قدرینی بیلمک اۆچۆن

چېنقېل و شۆشه‌ قېرېنتې‌لارې’یلا یئره‌ چؤک

دۆشۆنۆرَم کی، طالئعیمی بیر یئرده‌ گؤرۆبسن قار

أری

أری! دۏندېرېلمېش موسیقی!

و گل باخ

اینجیک‌لر سنین اۏلدو

باهار آدېنا

قورتولاجاق.