یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
سېخېنتې دۆشۆنجه‌لرین باغېرتې‌سې / پوریا محمدی‌کیا (شعر)
دیشیمی سېخمېشدېم
سېخماق آجې‌نېن سۏنراسې دَڲیل
گؤزۆمۆ یومموشدوم
یومماق گئجه‌نین أرته‌سی دَڲیل…
آهان دا تاپدېم ایتدیردیڲیمی
: سېخېب دا یومدوغوم کیپریک‌لرین آرخاسېندا…
بو قاران‌لېغې یازمالې‌یام سنه
بو قېزېل نۆطفه‌لی بۏشلوغو…
سېخدېقجا گؤرۆنن ایکی گۆنَشی…
.
سېخدېقجا گؤزلریم بئینیمه دۏلور…
.
دۆشۆنۆرم گۆنَشی
دۆشۆنۆرَم قېزېل نۆطفه‌لی بو قاران‌لېغې…
دۆشۆنۆرم اؤلۆمه گئدرکن ایشېقلانان یۏلون سۏنوندا منی تۏپراغېن سېخېب دا بۏشلوغا دۏلدوراجاغېنې…
.
هانسې بینانېن هانسې قاتېندایدېم
بیلمَم
اۏ گۆنکۆ خییاوان اۏ گۆنکۆ یاغېش
آه اۏ گۆنکۆ سرخۏشلوق
بیرآز ایچمیشدیم ألینده‌کی نمی…
آغزېنداکې ایسلانان دیلی…
گؤزۆندن آخان دنیز دادېنې
هانسې فصیلدی هانسې آی
بیلمَم
اۏ گۆنکۆ زامان اۏ گۆنکۆ تاریخ
نه داشا قازېلمېشدې نه کاغېذلارا سېغا بیلَردی
سېغماق
آغېزا سېغمایان کلمه دیر
(بو کلمه‌نی یارادان یاشاما سېغمامېش یقین)…
اۏ گۆنکۆ قوجاق
سېغدېم دۏغروسو
یئرلَشدیم کیپینه سنده…
.
خاطېرلامېرام دَڲیل…
دوشونمه‌مه‌لی‌یم سایې‌لارې بۏش یئره…
.
ماتئماتیکین سئوگی‌یـه بولاشماماسې گـَرَک…
بو بیر فیزیکسل شعر اۏلمالې:
گؤزلریم اؤزۆمه دؤنۆب، ایچیمه باخېر
گؤرۆرَم ایندی پرده‌سیز سَنی
أل‌لرینی گؤرۆرَم ایچیمده
ایچیم سَن‌سَن… سَن ایچیم‌سَن
ایچیم سنی
ایچدیم سنی
منده سېغمایان سۏنونجو قدح‌ده‌کی ویسکی تک
قولاق‌لارېم ایچیمی دینله‌ییر
ایچیمده یئل أسیر
آنامېن سَسی ایچیمده قالېب هله
قالماق
(بو کلمه‌نی دوستاقدا اۏلان بیری یاراتمېش یقین)
سنی دینله‌ییرم
ایچیمده‌سن
ایچیمده سَن‌سَن
کی بو سس‌لر منی کۆچه‌لرده اینقیلابا قالخان سېخېلمېش أل‌لرین ایچینه گؤتۆردۆ اۏ گۆن
هانسی بینانېن هانسې پنجره‌سی ایدی
بیلمَم
من سنی دینله‌دیم و آنامېن لای‌لاسېنې:
.
(بیر گۆن سحر دان چاغېندا
گۆنش کیمی یایېلاجاق
ظۆلمت‌لرده ناکام یاتان
منیم سۏنسوز آرزې‌لارېم)
.
سۏنرا آغزېمې بارېت’لا دۏلدوروب
آتېلدېم ایزدیحامېن قېغېلجېمېنا…
