عسگر آنا‌سې / سئوینج إل‌سئور (شعر)

عسگر آنا‌سې / سئوینج إل‌سئور (شعر)

 

عسگرلیکده‌کی اۏغلونون

گؤڲرچین‌لرینی یئمله‌ین آنا

بیر-بیر یئییب دۏیمالارېنا گؤز قۏیوردو قوش‌لارېن

سانکی اوددوق‌لارې هر بوغدا دَنه‌سی

اۏغلونون معده‌سینه‌ گئدیردی

اۏغلونو دۏیوروردو

 

آنا باخماقدان گؤزلرینی یۏروردو

یئییب-دۏیوب گؤزدن ایتینجه‌یه‌جن

اوزاق‌لارا اوچان

گاه‌ گؤرۆنن، گاه‌ گؤزدن قاچان

قوش‌لارېن دالېنجا

 

گئجه‌لری باشېنې آتاندا با‌لېنجا

یوخو گئتمیردی گؤزۆنه‌

قالخېب چیڲنینه‌ شال آتېر

بایېرا چېخېر

قوش دامې‌نېن قاپې‌سېنې-باجاسېنې یۏخلا‌یېردې

أوّل‌لر اۏغلونون اۆستۆنۆ آچېب-آچمادېغېنې یۏخلا‌دېغې کیمی

 

قوش‌لارېن أحوالې خۏش

قارېن‌لارې تۏخ

جان‌لارې ساغ اۏلدوقجا

آنا آرخایېن اۏلوردو اۏغلوندان

 

قوش‌لارېن بۏیونو سئویر

قاناد‌لارېنې اۏخشایېر

دیمدیک‌لریندن اؤپۆردۆ

 

یوخو‌لارېنې قارېشدېراندا

قاچېب قوش‌لارا دانېشېردې

قوش‌لارېن أحوالېندان بیلیردی

اۏغلونون نئجه‌ اۏلدوغونو

 

بیر آخشام

بیر آخشام گؤڲ‌لره‌ پروازلانان قوش‌لاردان بیری

گئرییه‌ قایېتمادې

اۏ گئجه‌، اۏ گئجه‌ صاباحاجان یاتمادې

دیلینده‌ دوعا‌لار

گؤزلرینده‌ یاش

اۆره‌ڲینده‌ داغدان آغېر داش.