یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
شهید آناسې (2) / سحر خیاوی (شعر)
بو غزل اۏتای-بوتای آذربایجانېن شهید آنالارېنا سونولور
قېشدا گلدین وطنه، جیسمی ده قانچېل گیلانار
گلمه‌ییبدیر آنان اؤلسۆن هله بو یوردا باهار
نۏقطا-نۏقطا بدنیندن تیلیت آل قان سۆزۆلۆر
ننه قوربان بیر بدنده بو قَدَر اولدوز اۏلار؟
یای‌لېغېم’لا یارانې باغلایېم هؤولار ببه‌ڲیم
ألیمی چتر إله‌ییم بلکه سنه دۆشمه‌دی قار
چېخاردېم گۆل آیاغېندان بو آغېر چکمه‌لری
گؤزلریمدن ایراق اۏلدو، آیاغېن چالدې قابار
اینانانمېردېم اۏغول، اۏ دئییلَن شوم خبری
اؤلۆمۆن أخبارېنې تر-تَله‌سیک گَتدی چاپار
یاندې مین آرزې-دیلک آخ… تۏیونو توتمامېشام
چاخناشار ایچده اۆرَک، فېرتېنالار منده قۏپار
زخمه وور کؤکسۆمه مین دفتر آغېت ناله إدیم
إتدی واخت‌سېز اؤلۆمۆن قلبیمی چۆن سینه‌یئ تار
قارقالار گؤزلرینه اۏخ کیمی باتدېن مله‌ڲیم
خۏل-بوداق‌سېز سنه قۏی آغلایېم آی تازه چینار
آنا قوربان بیلیرم ایندیجه یۏل یۏرقونوسان
قۏی اؤپۆم گؤزلرینی، اوچسون عذارینده غوبار
بیلیسن آیرې‌لېغا یۏخدو دؤزۆم دای آنادا
کسیلن قۏل‌لارېنې بیر کره ده بۏینوما سار
گئجه‌لرده یۏل آزېب بلکه گؤزۆمدن کئچه‌سن
قۏیموشام کیپریڲیمین هر تئلینه بیرجه فَنار
نئینک، اۏلسون وطنه من سنی قوربان وئردیم
سن گۆنش‌لیکده سنی کیم دانا، آللاهې دانار
مین باهار گلسه ده اۏغلوم، پایېزام من سن‌سیز
توت ألیمدن منی ده، سن‌سیز اۏلان مندن آپار
