یارا‌لې آنا قوش ایله‌ یاراماز اوشاق / بورلا وَرمَزیار (اوشاق حیکایه‌سی)

یارا‌لې آنا قوش ایله‌ یاراماز اوشاق / بورلا وَرمَزیار (اوشاق حیکایه‌سی)

بیری وار ایمیش، بیری یۏخ ایمیش.
أوّل زامان ایچینده‌، گلبیر سامان ایچینده‌، بیر عائله‌ قوش وار ایمیش. بیر گۆن آنا قوش أججه‌ قوش بالالارې‌نېن قارنېنې دۏیورماق اۆچۆن، یئمک آختارماغا یووادان إشیڲه چېخدې.
 
گؤم-گؤڲده‌ اوچارکن بیر ایلک مدرسه گؤردۆ. اۏرا یاخېنلاشېب، مدرسه‌نین باخچاسېندا چؤرک تیکه‌لرینی گؤردۆ.
اوشاق‌لارېن یئمک‌لریندن قالا‌ن چؤرک تیکه‌لرینی یئمک اۆچۆن، گؤڲدن باخچایا یئنیب، باخچانېن اۏرتاسېنا قۏندو.
بیر آز چؤرک تیکه‌‌لریندن اؤزۆ یئییب، بیر آزېنې دا یوواسېنداکې أتجه‌ قوش‌لارېنا آپارماق ایسته‌دی.
بو آرادا آنا قوشو ایزله‌ڲَن بیر یاراماز اوشاق، مدرسه‌نین حَیَطینده‌ آنا قوشا گؤز تیکیر، ألینه‌ بیر داش آلېر، آنا قوشا سارې فېرلاتدې.
یاراماز اوشاغېن داشې آنا قوشون قانادېنا دَڲیب، آنا قوشون قانادې قېرېلدې. آنا قوش اوچماغا چۏخ چابا گؤرسَتدی، آما اوچا بیلمه‌دی.
آنا قوش اوچا بیلمه‌یینجه‌، آیاق‌لارې اۆسته‌ دوروب، یاراماز اوشاغا سؤیله‌دی: سن نه‌دن گۆجۆن چاتدېغې حئیوان‌لارا ضرر وئریرسن کی؟. بیز قوش‌لارېن دا، سیزین کیمی جانېمېز وار. اینجیییریک، اۆزۆلۆرۆک.
یاراماز اوشاق آنا قوشون دانېشدېغېنې إشیتدیکده شاشېرېب، قالدې.
آنا قوش داوام إتدی: منیم ایکی دَنه‌ أتجه‌ قوش بالام وار. من اۏنلارا یئمک گؤتۆردۆڲۆمۆ گؤزله‌ییرلر. سَنین آنانېن قۏلو قېرېلسایدې، سنه‌ یئمک حاضېرلایا بیلمه‌‌سه’یدی، سن نه‌ إدَردین!؟
یاراماز اوشاق سؤیله‌دی: إله اۏلسایدې آج قالاردېم، اۆزۆلردیم. آنامېن قۏلونون قېرېلماسېنې هئچ ایسته‌مم.
آنا قوش سؤیله‌دی: إله ایسه‌، سن نه‌دن منیم قانادېمې قېردېن! ایندی منین أتجه‌ قوش بالا‌لارېم آج قالا‌جاقلار! من نه‌ إتمه‌لی‌یم! سن سؤیله‌.
یاراماز اوشاق بیر آز دۆشۆنۆب، خطاسېنې آنلادې. اوتانېب آنا قوشا دئدی: سن حاقلې‌سان آنا قوش، من خطالې بیر ایش گؤرمۆشَم. اۏ آرتېردې: من، سَنین قانادېن تۏختایاناجان أتجه‌ قوش‌لارا دن، چؤرک تیکه‌‌لری و سو گؤتۆره‌جه‌ڲم. بو دا منیم خطامېن بَدَلی اۏلسون.
سۏنرا یاراماز اوشاق، آنا قوشو ألینه‌ آلېېب اؤرگَتمَنینه آپاردې. اؤرگتمَنی قوشون قانادې‌نېن یاراسېنې باغلادې.
یاراماز اوشاق اۏ گۆندن بری یاراماز‌لېغېنا سۏن قۏیوب، حئیوان‌لار’لا‌ مئهریبان اۏلدو. اۏ باشقا یۏلداش‌لارېنا آنلاتدې کی: هر بیر جانلې‌نېن جانې وار، آنا‌سې-آتا‌سې، اوشاغې و یۏلداشې وار. اۏنلارېندا بیزیم کیمی یاشاماغا حاق‌لارې وار. اوشاق‌لار حئیوان‌لارې قۏروماق اینسان‌لارېن بۏرجو دېر؛ دئدی…!

یازار: بورلا‌ ورمزیار – ۸ یاشلې یازار
ایزمیر ۲۰۲۰٫۱۱٫۱۱