یئنی یازې‌لار / Yeni Yazılar

دۏلابېن سۏنونجو سیییرمه‌سی / سامیره أشرف (حیکایه)

Dolabın sonuncu siyirməsi-Samirə Əşrəf-YeniQapi.com-gaz

دۏلابېن سۏنونجو سیییرمه‌سی / سامیره أشرف (حیکایه)

لطیفه‌ اۏن ایلدن سۏنرا اوشاغا قالمېشدې. گؤزلَنیلمز ایدی. غریبه‌ حیسّ‌لر کئچیردیردی. اۆچ اوشاقدان سۏنرا اؤز تعبیرینجه‌ دئسک، بئله‌ ایشه‌ دۆشمه‌سی قانېنې خئیلَک قارالتمېشدې. بیر یاندان دا أری‌نین وای-شۆوَنی اۏنو عصَبی‌لشدیریردی.

أری اوشاغېن دۆنیایا گلمه‌سینده، لطیفه‌ ایسه‌ اۏنو گؤتۆرتمکده‌ ایصرار إدیردی:

– آیاغېمېزا بیر جۆت آیاق‌قابې آلماغا پولوموز یۏخدو، اوشاق‌لارېن أیین-باش‌لارې چېلپاق، سن دئییرسن کی، دۏغ؟!

أری اۏنون دئدیک‌لرینی إشیتمیرمیش کیمی ایصرار إدیردی:

– هئچ نه‌ اۏلماز، آللاه‌ گؤندَردیڲی بنده‌سی‌نین روزی‌سینی ده گؤندَرَر.

– بس دیر، سن جانېن. قوربان اۏلدوغوم ایلک اؤنجه‌، بو بیری‌لری‌نینکینی گؤندَرسین، سۏنراسېنا باخارېق.

سَحَری گۆن لطیفه‌ یوخودان اۏیاناندا، گؤزۆ آینالې دۏلابېن قارشې‌سېنداکې پولا‌ ساتاشدې. مسأله‌ حَلّ اۏلونموشدو. گؤرۆنۆر أری ده‌ دؤردۆنجۆ اوشاغې کاسېب‌لېق ایچه‌ری‌سینده‌ یاشاتماق مسئولییتینی بۏینونا گؤتۆرمکدن سۏن آندا واز کئچمیشدی. گئجیکمک، اؤزۆنۆ بطنینده‌کی جانلې‌یـا اؤرگشدیرمک نه‌یه‌ لازېم ایدی؟! إله‌ گۆنۆ بو گۆن حکیمه‌ گئتمه‌لی’یدی.

حکیمین اۏتاغېنا گیرَن کیمی طیبّ باجې‌لارې باشې‌نېن اۆستۆنۆ آلدېلار. آردا-آردا اۏنا بیر نئچه‌ ایڲنه‌ ووروب، سیستئم قۏشدو‌لار. ایکی دقیقه‌دن بیر ایشله‌نن عَمَلیّات کلمه‌سی لطیفه‌نی بیر آز دا قۏرخودوردو. آغرې حیسّ إتمه‌مک اۆچۆن آبۏرت آنئستئزییا (کورتاژ اویدورماسې) اۆصولو ایله‌ یاشاما کئچیردیله‌جَکدی. یاشامې بۏیو چۏخ آغرې چکمیشدی. ایندی نؤوبَتی آغرېنې یاشاماغا طاقتی قالمامېشدې.

هردن اؤز-اؤزۆنه‌ فیکیرلَشیردی کی، آللاه‌ گؤرسَتمه‌سین، یئنی‌دن ساواش باشلا‌سا، دۆشمنه‌ أسیر دۆشۆب إله‌سه‌، أن کیچیجیک شیکنجه‌ ایله‌ بۆتۆن نسیل-کؤکۆنۆ اۏنلارا ساتار. نییه‌؟ چۆنکی آغرېنې داشېیاجاق دؤزۆمۆ قالمامېشدې. عصب‌لری سېرادان چېخمېش، جانې ضعیف‌لَمیشدی.

لطیفه‌ گؤزۆنۆ آچاندا هر شئی باشا چاتمېشدې. جانې هئچ اۏلماسا قارشې‌داکې سککیز آی‌لېق فیزیکی زحمتدن قورتولموشدو.

لطیفه‌نین آنا‌سې‌گیل خسته‌خانانېن یاخېن‌لېغېندا اۏلدوغوندان خسته‌خانادان چېخېب بیرباشا اۏنلارا گئتمه‌ڲی قرارا آلدې. هم بیر آز دینجینی آ‌لار، هم ده‌ آناسې’یلا اۏردان-بوردان دردلَشردیلر. اوتوبوسا مینَن کیمی، یئنی‌یئتمه‌ بیر اۏغلان یئریندن‌ سېچرایېب اۏنا یئر وئردی. لطیفه‌ اۏتوراجاغا أڲلَشیب یئنی‌جه‌ سېیرېلمېش، سۏیوق، بۏم-بۏش بطنینی قوجاقلادې. گؤزۆندن بیر داملا یاش یووارلانېب قۏلونون اۆستۆنه‌ دۆشدۆ. اۏنا یئر وئریب باشې‌نېن اۆستۆنده‌ دایانان اۏغلانا باخېب فیکره‌ گئتدی. ایندیجه‌ گؤتۆزدۆردۆڲۆ دؤلۆن بؤیۆکلۆڲۆنۆ تَصَوّۆر إتمه‌ڲه‌ چالېشدې. اؤتن هفته‌ کیتاب ماغازاسېندان آلدېغې چین تقویمی کیتابېنداکې تاریخ‌لر’له أری‌نین و اؤزۆنۆن دۏغومونو یۏخلا‌مېشدې. تقویمه‌ اینانسا، دؤلۆن گله‌جَک جینسيَّتی اۏغلانې گؤرسه‌دیردی. یَقین ایندی أری‌نین سؤزۆنه‌ قولاق آسېب اۏنا تۏخانماسایدې، اۏن ایلدن سۏنرا اۏ، دا بؤیۆیۆب جانتاراق بیر مکتبلی اۏلاجاقدې. اۏ بیری اوشاق‌لارې کیمی…

لطیفه‌نین اۆچ اوشاغې واردې. ایکی‌سی اۏغلان، بیری قېز. بیر آن‌لېق اؤولاد‌لارېندان بیری‌نین مؤوجود اۏلمادېغېنې تَصَوّۆر إتدی. دَهشَتلی ایدی. یاشامېندا تَصَوّۆره‌ گلمز بۏشلوق اۏلاردې.

نه‌ واخت‌سا، اینتئرنئتده‌ بیر شکیل گؤرمۆشدۆ. آنا دؤرد-بئش یاشلې قېز اوشاغې‌نېن روحو قارشې‌سېندا دیز چؤکۆب آغلایېردې. رسّام آنالارېن واختې’یلا تَلَف إتدیردیڲی کؤرپه‌لرین روحونو تصویر إدیب، آنالارېن چکدیڲی ویجدان عذابېنې گؤرسه‌دیردی.

یَقین ایندی اۏنون دا بو گۆن ایتیردیڲی اؤولادې‌نېن روحو نه‌ زامانسا بؤیۆڲه‌جک و اۏنون قارشې‌سېندا دایانماسا دا، یوخو‌لارېنا گیره‌جکدی.

اوتوبوس آنا‌سې‌گیلین دایاناجاغېنا چاتاندا لطیفه‌ فیکیردن آیېلدې. پول کیسه‌سینده‌کی سۏن ماناتې سۆرۆجۆیه‌ وئریب خېردالادې.

قاپېنې اۏنون اۆزۆنه‌ آچان آنا‌سې مطبخه‌ قاچېب تئز بیر ایستیکان شیرین چای گتیردی:

– بس نییه‌ تک گئتدین؟ دئدیم آخې بورا گل، گلینی قۏشوم یانېنا، اۏنون’لا گئت. بیردن باشېنا بیر ایش گلسه’یدی نه‌ اۏلاجاقدې؟

– هئچ نه‌ اۏلماز. اؤرگن‌میش جانېق اۏنسوز دا.

– یئنه‌ باخما، یانېندا بیر آدامېن اۏلماغې یاخشې’یدې. یییه‌سیز دَڲیلسن کی، تک‌باشېنا یۏلون اۏرتاسېنا دۆشۆب حکیمه‌ گئدیرسن.

داها سۏنرا آنا‌سې سؤزلۆ آدام‌لار کیمی قېزې‌نېن اۆز-گؤزۆنه‌ گؤز گزدیریب سۏروشدو:

– پولون چۏخ چېخدې؟

لطیفه‌ یۆنگۆلجه‌ باشېنې ترپه‌دیب دئدی:

– هه‌، ألیمده‌ نه‌ واردې‌’سا، هامېسې گئتدی. إله‌بیل اوشاق‌لارا یای پال-پالتارې، اؤزۆمه‌ چانتا آلاجاقدېم.

آنا‌سې بو جاوابدان سانکی بیر آز پرت اۏلوب باشېنې آشاغې سالدې.

یئمک یئییب بیر ایکی ساعات یاتاندان سۏنرا لطیفه‌ اؤزۆنۆ بایاق‌کېنـا نیسبَتَن ایتگین حیسّ إله‌دی. اۏ، آیاغا قالخېب حاضېرلاشدې. آنا‌سې مطبخده‌ قاب یویوردو.

لطیفه‌ مطبخه‌ کئچیب دئدی:

– من گئدیم، اوشاق‌لار إوده‌ تکدیلر. سۏنرا گئجه‌یه‌ دۆشه‌رَم.

– بیر آز دا اۏتوراردېن. قارداشېن گلنده‌، آپاراردې.

– یۏخ، لازېم دَڲیل. اۏ، دا یۏرقون-آرغېن ایشدن گله‌جَک. بیر ده‌ منه‌ گؤره‌ أذيّت چکمه‌سین.

لطیفه‌ حیسّ إله‌دی کی، آنا‌سې باخېش‌لارېنې اۏندان قاچېردېر. نه‌ ایسه‌ پرتدی. قۏنونو باشا دۆشدۆ. هر زامان بئله‌ مقام‌لاردا أل توتان، مادّی کؤمَک‌لیک إدَن بو آغ‌بیرچَکلی، یاشلانماقدان یۏرولموش قادېنېن اۏنا وئرمه‌ڲه‌ پولو یۏخ ایدی. اوتانېردې.

لطیفه‌ آیاق‌قابې‌لارېنې گئییندی. چېخ‌ ها چېخ‌دا آنا‌سې یاووقلاشېب خالاتې‌نېن جیبیندن‌ نه‌سه‌ چېخاردې، اۏنون چانتاسېنا آتدې.

إوه‌ چاتاندا هاوا یاواش-یاواش تۏرانلاشېردې. یاشادېغې بینانېن قارشې‌سېنا چاتاندا، اۏغلان‌لارې اۏنو إیواندان هایلایېب، اۏنا اؤپۆش گؤندَردیلر. إوه‌ چاتان کیمی قوجاغېنا آتلانېب دئدیلر:

– آنا، ایجازه‌ وئریرسن حَیَطه‌ گئد‌ک؟ تئز گله‌جه‌ییک.

– گئدین.

اۏنسوز دا تک قالماق ایسته‌ییردی. قېزې اۏ بیری اۏتاقدا اۏتوروب دَرس‌لرینی حاضېرلایېردې. لطیفه‌ إحمالجا یاتاق اۏتاغېنا گیردی. اۏتاق اۏنو بو دفعه‌ سانکی باشقا جۆر قارشېلادې. إله‌ بیل دووار‌لارېن دا رنگی قارالمېشدې. اۆچ-دؤرد ساعات بوندان اؤنجه دۏلو چېخدېغې بو إوه‌ ایندی بۏش قایېتمېشدې.

اۏ، چانتاسېنې آچېب حکیمین وئردیڲی رئسئپتی چېخاردې. بایاق سئکرئتئردن آلدېغې اۆستۆ شکیللی کاغېذ حکیمده‌ قالمېشدې. اۆره‌ڲی سېخېلماغا باشلادې. اومودونو همین شکیللی کاغېذا باغلامېشدې. هئچ اۏلماسا محو إتدیڲی جانلېدان کیچیک بیر یادیگارا اومود بسله‌میشدی. چانتاسېنې إشه‌له‌ینده‌ ایچه‌ری‌سیندن اۆستۆنه‌ حالوا یازېلمېش کانفئت چېخدې. یَقین بایاق آناسې‌نېن چانتاسېنا آتدېغې کانفئت ایدی.

لطیفه‌ هؤنکۆرتۆ ایله‌ آغلاماغا باشلادې. إله‌ اۆرَکدن آغلایېردې کی، إله‌ بیر ایندیجه‌ کیمی‌سه‌ تۏرپاغا قۏیموشدو… باشېنې قالدېراندا قېزې‌نېن قارشې‌سېندا دایانېب قۏرخاق نظرلر’له‌ باخدېغېنې گؤردۆ:

– آنا، نه‌ اۏلوب؟

– هئچ نه‌. آل، بو کانفئتی قارداش‌لارېن گلنده‌، بؤلۆشدۆرۆب یئیر‌سینیز.

قېزې اۏتاقدان چېخاندا، لطیفه‌ سیییرمه‌نین گؤزۆنۆ آچېب اۏرداکې چین تقویمینی گؤتۆردۆ. ایشاره‌له‌دیڲی صفحه‌نی آچاندا، آراسېندا‌کې ایکی خطی قېزارمېش تئست چوبوغو یئره‌ دۆشدۆ. اۏ، سهو إتمیشدی. اۏندان، کیچیک، بالاجا دا‌ اۏلسا، نیشانه‌ قالمېشدې. لاپ ساواشدا شهید اۏلان عسگرین کؤینه‌ڲی‌نین جیبیندن‌ چېخان بۏش پاترۏن کیمی. اۏ، تئست چوبوغونو تقویمین آراسېنا قۏیوب دۏلابېن أن سۏنونجو سیییرمه‌سینده گیزلَتدی.

حامامدان چېخاندان سۏنرا بیر آز راحاتلاشمېشدې. ایندی اۏنون اۆچۆن بو إوده‌ أن مۆبهم و دۏغما بیر یئر واردې.

دۏلابېن سۏنونجو سیییرمه‌سی.

Yazını bu əlifbada oxuyun: TÜRKCƏ

یازار / Yazar : آیهان میانالیAyhan Miyanalı

بو یازېنې دا اۏخویون /Bu Yazını da Oxuyun

1581326054_04

گۆزگۆ / سۏناسې ولی‌یئوا (حیکایه‌)

گۆزگۆ / سۏناسې ولی‌یئوا (حیکایه‌) بو، هر گۆن تکرار اۏلونور. هامېنې منیم دَلی اۏلمادېغېما ایناندېرماق. …


Warning: count(): Parameter must be an array or an object that implements Countable in /home/yeniqapi/public_html/wp-includes/class-wp-comment-query.php on line 399

Leave a Reply

Your email address will not be published. Required fields are marked *