آتا رنگینده اوشاق / الهام بزرگان (حیکایه)
چۏخ اوزاق‌لاردا، کئچمیش زامان‌لاردا، نسیلدن نسیله گلن بیر ناغېلدا اوشاق بوزون اۆسته یېخېلېب دؤنۆب بوزا دئییر: بوز سن نه ظالېمسان !
بوز قایېدېب دئییرکی من ظالېم اۏلسایدېم گۆنش منی أریتمَز ایدی.
ایندی ایسه من سۏروشوم سن نه ظالېمسان آی بوز، بو یۏرقون بالاجا اۏغلانېن آیاق‌لارېنې بئله‌جه اۆشۆدۆرسن؟
هاوا آیازلامېش اولدوزلار شَهَرین گؤڲۆنده إله سییریردیلر، بئله گؤرۆنۆردۆ کی قېشېن ٲن آیاز گئجه‌سی اۏلاجاقمېش.
شَهَرین خیابان‌لارې چېراق‌لار’لا بَزه‌نیب اینسان‌لار شادلېق’لا آلېش-وئریش إدیردیلر.
کیمی ایسه چیلله گئجه‌سینه، پارتلامېش شیرین نار سئچمکده، کیمی ایسه شیرنی ماغازاسې‌نېن قاباغېندا سېرادا دایانمېشدېلار.
خیابانېن هر طرفینه باخسان، سئوینج ایله أل-أله دۏلانان اینسان‌لارې گؤره‌جکسن.
آما بعضن بو اینسان‌لارېن رۏل‌لاری یاشایېشدا دَڲیشیک دۆشۆب، بالاجا اوشاق اۏلوب آتا، و بۆتۆن یاشام یۆکۆنۆ بالاجا اوشاق چکیر .
اۆشۆمۆش بالاجا اۏغلان هردن بیر اۆزرلیک قابېنې اۏ ألیندن بو ألینه وئریب أل‌لرینی آغزېنا سارې آپارېب أل‌لرینی نفس‌لری ایله ایسیندیرمه‌ڲه چالېشېردې.
اۆزَرلیک قابېنې کۆره‌ڲینده اۏلان یامامېش کؤهنه تۏربادان دۏلدوروب سانکې اؤزۆ هئچ اۆشۆمَز، آما بو بالاجا اۏغلان بو ایشېقلې خیابانېن گؤزل گئییملی قادېن‌لار،کیشی‌لری‌نین قادا بالاسېنې سۏوماغا گلمیش!
اۆزَرلیک آلۏولاندېقجا، سانکې بالاجا اۏغلانېن اۆره‌ڲینده بیر اومود آلۏولانېردې:
نه یاخشې بو گئجه دئیه‌سن آنام-باجېما یئمک آلا بیله‌جه‌ڲَم. قولاق‌لارېنې آتادان قالمېش بؤرکۆن آلتېندا گیزله‌دیب اؤزۆنۆ سازاق‌لاردان قۏروماغا چالېشېردې.
إله گؤزل ماشېن‌لار قارشې‌سېندان کئچیب اوزاقلاشېردېلار سانکې بو بالاجا اۏغلان بو دۆنیادا تک بوراخېلمېش، بۆتۆن یاشام یۆکۆ اۏغلانېن بئلینه آسېلمېشدې. آما اۏغلان واز کئچمَز،اۏ کیچیک‌لیڲیندن “آتا” رۏلونا آلېشېب.
کئشکه سنین اۆشۆمۆش، قارالمېش بالاجا أل‌لریوی ألیمه آلېب ایسیندیره بیلسه’یدیم، کئشکه یاندېردېغېن اۆزَرلیک‌لر سنین اؤز درد بلاوې سۏوسایمېش.
اۆزَرلیڲین تۆستۆسۆ شَهَرین ان گوزل خیابانین بورویوب بالاجا اوغلان توستولر آراسیندا ایتیب
منیم اۆزَرلیک اییی وئرن بالاجا اۏغلوم! گلن ماشېن‌لارا باخېردې گئدن ماشېن‌لارا باخېردی بلکه بیری‌سی ماشېنېن پنجره‌سینی آچېب اۏغلان بو گئجه آنا-باجې‌سېنې سئویندیره بیلسه’یدی.
سن نه ظالېمسان شاختا، سن نه ظالېمسان آی بـــــــوز!!! بالاجا اۏغلانېن کیچیک أل‌لرینی آیاق‌لارېنې اۆشۆدۆرسن.
آیازلامېش گئجه‌نین سیلیانې اۏغلانېن آمانېنې کسیب، اؤز-اؤزۆنه سۏروشوردو :
آخې نۏلاردې من ده اوشاق اۏلایدیم
مَڲَر سن اوشاق دَڲیلسن؟؟!
اوشاغام، آما اوشاق‌لېغېمې بو قارا باسمېش اۆزَرلیک قابېندا یاندېرماغا مجبورام…
شَهَرین أن گؤزل خیابانېندا آلۏولانېب تۆستۆله‌نن اوشاق‌لېق گؤزل گئییملی قادېن‌لار،کیشی‌لرین قادا بالاسېنې سۏوورموش!
بالاجا اۏغلان اۆشۆمۆش أل‌لرینی شالوارې‌نېن جیبینه آپارېب، جیبینده اۏلان بوز کیمی سۏیوق خېردا پول‌لارې دۏنموش اۏووجونا سېخېب اؤز-اؤزۆنه دانېشېردې:
آخې اۏلا بیلرمی بیرگۆن بو گؤزل گئییملی اوشاق‌لارېن یئرینه اۏلام ؟… تانرې نه‌دن منی “آتا” یاراتدې آخې؟!!!!
بالاجا اۆره‌ڲی آلۏولار ایچینده یانېردې… نۏلار بو گئجه باجېمېن اۆره‌ڲینی سئویندیره بیلسم!؟
تۆستۆ ایچینده ایتَن ماشېن‌لار، تۆستۆ ایچینده ایتَن ماغازالار
نه قَدَر یۏرقونام بو یاشامېن منه وئردیڲی یۆک منه چۏخ بؤیۆک دَڲیل‌می؟!
من کیمدن سۏروشوم؟ تانرې سن‌می ظالېمسان؟
یۏخسا دۆنیا، ظالېمدې؟
یۏخسا یانېمدان اؤنمسه‌مه‌ییب کئچن اینسان‌لار؟!
من کیم اۆچۆن اۏخویوم؟
اۆزَرلیک‌سن، هاواسان
مین بیر درده داواسان
درد قاپې‌دان گیرنده
سن باجادان قۏواسان
بالاجا اۏغلان …
سنین دردینی کیم قۏواجاقمېش!؟
بَنزَرگه‌لر / Bənzərgələr
قار دنهلری / آیناز بزرگان (حیکایه)
یانېت‌سېز سۏرغولار / فائضه بزرگان (حیکایه)
ناغېللارداکې اؤزلَم / فائضه بزرگان (حیکایه)
اوشاقلار اۆچۆن دؤزۆم حاققېندا ماراقلې حیکایه
تۏپپوشوم / نیلآی عالی (اوشاق ناغېلې)
نیلآی'ېن یئنی دۆنیاسې / اوشاق ناغېللارې
ایکی یاشلې کؤرپهنین آجې حیکایهسی / واریث یۏلچویئو…- بوز / اومان میانالې (حیکایه)
جزا / سئوینج إلسئور (حیکایه)
