یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
دارېخماق / مهسا عبدالعلیزاده (شعر)
بیرآز دارېخماق ایسته‌ییرم دۏستوم
سنی دارېخماق أن گؤزل
دارېخا بيلسَم،
باخېش‌لارېندا سنی دارېخان
هئيوا آغاجېنېزدا يېرغالانان
اينتيحار پاندۏلو کیمی…
آنانېن سنی ايتيرديڲی گله‌جک‌لر کیمی
سنی مندن سۏران‌لارېن قارشې‌سېندا
بۏغازېمې قورودان هېچقېرتې‌لارېم کیمی…
بیرآز منه دارېخماق دادېزدېر دۏستوم
سئويرَم سنين دارېخمالارېنې
منه باخ… دارېخېم
دۏغرانمېش كلمه‌لری‌نين شعرلريمه قارشې جنايتيندن سؤيله…
سؤيله گئجه‌نين قۏلتوغونا سېغېنمېش اؤزۆندن… دارېخېم
بوراسې ستلجم ياشامېمېز…
تۏراخای‌لارېن باش‌لارېنې قاچېرتدېق‌لارې قار قدَر سۏیوق دېر بوراسې،
تیتره‌ییریک
سيلكه‌نير قارتېمېش دويقولار ايچیمیزده
آيرېلېرېق ايت‌ليڲميزدن
و اينسان‌لېق لئشی‌نی سېچرادېر چئوره‌ميزه
بوراخېر دووارلارا ايزينی
و یایېلېر شَهَره بیر-بیریمیزی آنلايا بيلمه‌ديک‌لريميز…
دارېخماق ايسته‌ييرم
قادېن‌لېغېمېن يۆز ايل‌ليک قاتېندان آيرېلماغېم گلیر
دۆشه بیر اۆره‌ڲینه،
اۆره‌ڲینه دۆشه بیلسَم…
دنیزلر یۏل‌لارېنې ایتیریب دۏلا بیلسه گؤزلريمه
دۏلوخسونا بيلسه ايچیمده سوسان کؤرپه‌لريم
گؤزلرينه دالا بيلسَم
و اۆره‌ڲيمين سېخېلدېغې كيمی
أل‌لرينی سېخسام…
گؤزلرين ديليمه گتیره بیلمه‌دیڲیم إعتیراف
دۏداق‌لارېمېن قېراغېندان سېزان قېرمېزې لكه‌نين ايزی
گؤزلرين ايضطيرابدې
ايچینده‌یم،
استرس دیر
يۏل‌لار بۏيو چکیرم …
دارېخماق ایسته‌ییرم
دار… ېېخدېر منه
دارېخدېر منی…
