یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
کیچیک اؤرگَتمَن‌لریمیز / ساچلې فرهادی (کؤشه یازې)
کیچیک واخت‌لارېمدان اؤرگَتمن‌لیڲی سئوردیم. هر بیر یئر تاپدېقدا، اؤرگَتمن‌لیک اۏیونونو قوراردېم. اؤزۆمدن ۱۱ آی کیچیک دایېم’لا بو اۏیونا باشلایاردېم. بئیینی دۏلو سۏرغولار’لا دینمزدن قولاق آساردې،
من ده یازا-یازا اؤزۆمه گلیب بیرآن گؤرَردیم أل‌لریم سانکې اون کیسه‌سیندن چېخېب، ألیمی اۆستۆمه چکه‌رَک، یۏرقونجاسېنا باخېب دئیَردیم: -اؤرگشدینیزمی؟؟
یای گۆن‌لرینده مدرسه‌یه دارېخان کیمی اۏلاردېم…
هله ده اۏ گۆن‌لر کیمی مدرسه‌یه دارېخارام…
سحر چاغې ساعات سککیزده، کیلاس‌لارا گیرمَزدن اؤنجه، اؤرگَتمن‌لرین گۆلۆش‌لری مدرسه‌نین یئنی بیر گۆنۆنۆن باشلاماسې‌نېن مۆژده‌سینی وئریر.
اوشاق‌لار کیلاسدان بۏیلانېب اؤرگَتمن‌لرین گلمه‌سینی إعلان إدیرلر، بلکه ایستک‌لری بو اۏلاردې کی بیرگۆن اؤرگَتمن گلمه‌ییب، اؤزلری کیلاسې ایداره إده‌لر!
یاسَمَن بلکه ایستَردی بیر گۆنلۆک اؤرگَتمن اۏلوب درسی باشلایا.
– منیم گؤزل بالالارېم بوگۆنکۆ درسیمیز آتالارېمېزدان قالان بیر گؤزل حیکایه دیر.
قدیم زامان‌لاردا قاضی‌نین حَیَطینده بیر خۏروز وارېدې. بیرگۆن حَیَطده إشه‌له‌ننده، خۏروز بیر قارا پول تاپدې و…
ایندی اوشاق‌لار بو گؤزل حیکایه‌دن نه‌لر آنلادېنېز؟؟؟
یا آیرې‌سې ایستَردی حئساب درسینی آچېب اؤزۆ بیلدیڲی کیمی، یۏلداش‌لارېنا دا اؤرگَتسین… اۏ قَدَر یازېب-پوزسون کی أل‌لری جؤوهرلَنیب ألی‌نین اۆستۆنۆ تمیزلَییب، سۏنوندا سۏروشسون اؤرگَشدینیز؟؟؟
بو ایستک هم کئچمیشده، هم ده کی ایندیکی اوشاق‌لاردا نۏرمال بیر اۏلای دېر…
آما من هر زامان کیلاسدا دئیه‌رَم کی من ده سیزلر کیمی بیر اؤرگنچی اۏلا بیله‌رَم، یالنېز سیزلر’له تکجه فرقیم بو دېر کی من سیزلردن نئچه یاش بؤیۆڲَم…
من بیرگۆن اۏلماسام دا، سیزلر داها گۆجلۆ کیلاس ایداره إده بیلرسینیز.
من ده سیزین کیمی اؤرگنمه‌ڲـه گلمیشم…
بیز کیلاسدا هر قۏنو حاققېندا دۏیونجا دانېشارېق، فرق إتمَز اؤرگَتمن اۏلا یۏخسا اؤرگَنچی.
آما بونلار کئچن ایله‌جَن گرچک ایدی، ایندی…
ایندی دوروم‌لار فرقلی اۏلوب دېر. بو خسته‌لیک بیزلرین دۆنیاسېنې ایکی بؤلۆمه آیېرېب. تئلئفۏنون اۏتایې و بو تایې…
هر شئی اوزاق‌لېق’لا باشلانېر…
ایندی من خسته‌لَنمیشم. گئجه‌نین بۆتۆنۆ آغرې‌لار ایچیمده چولقالانېب، قېزېشمادان هوش-بئیینیم ده قالمایېب. خسته‌لَندیڲیمی هئچ اوشاق‌لارېما بیله، بَلیرلَتمه‌میشم. گؤرۆنتۆم یۏخ، سسیم یۏخ، أصلینده خسته‌لیکدن لاپ سوسارجا اۏلموشام. بیر نچه گۆن بئله‌لیک’له کئچیرتمیشیک.
بو حال‌سیز دورومومدا اوشاق‌لاردان کیلاسېن ایداره إتمه‌سینی ایسته‌دیم.
بو اوشاق‌لار ایلین ایلک گۆن‌لریندن، تئلئفۏن دالېندا، ایراق-ایراق درس اۏخویوبلار. اۏنلارا چۏخ اومود باغلایا بیلمه‌ییردیم، اۆره‌ڲیمده بئله دئییردیم کی: حئییف بو اوشاق‌لارا.
آما اۏ گۆن گؤردۆک‌لریمه اینانا بیلمه‌ییردیم.
اینانېلماز بیر دورومدا، اۏ آن گۆجلۆ بیر کیلاس گؤردۆم.
هره‌سی بیر درسی اؤرگتمه‌ڲـه باشلامېشدېلار. بۆتۆن داورانېش‌لارېمې، سؤزلریمی، هامې‌سېنې یانسېلایېردېلار. هئچ بیلمَزدن اۏ آن، چۏخ گؤزل دویقولارې یاشایېب، اؤرگَنچی‌لریم اۆچۆن غرورلاندېم.
بو اوشاق‌لارېن بئیینینده قالارقې اۏلان کیچیک واخت‌لارېندان اؤرگَتمَن‌لیک ایسته‌ڲی اۏلا بیلر.
بو خسته‌لیک بیزیم قوروم‌لاردا چۏخلو أکسیک‌لیک‌لر یارادسا دا، چۏخ ایش‌لر دۆگۆنلۆ قالسا دا، آما منجه گؤزل اۏلای‌لارا دا نه‌دن اۏلدو. اۏ اۏلای‌لاردان أن گؤزه‌لی، أن بؤیۆڲۆ ده، هر اؤرگَنچی‌نین اؤزۆنه بیر اؤرگَتمَن اۏلماغې دېر…
