فۆضولی / علی کریم (شعر)

فۆضولی / علی کریم (شعر)

دۆنیا سنی قۏجالتدې یاشېدېن اۏلسون دئیه‌

گؤمۆلدۆ دردین یئره‌، اوجالدې آهېن گؤڲه‌.

درده‌ شریک – درد اؤزۆ، سۆکوت – سوالا‌ جاواب.

قرانیت داغ‌لار بئله‌، گتیرمزدی بونا تاب.

 

فۆضولی، اۏ نه‌ دؤوران!..

گؤرسه‌لر یانېر اینسان

یانانا اۏد وئردیلر.

 

فۆضولی، اۏ نه‌ کَدَر!

گؤرسه‌لر دۏنور اینسان،

دۏنانا بوز وئردیلر…

 

فۆضولی، اۏ نه‌ قَدَر؟ –

گؤرسه‌لر باتېر اینسان،

باتانا دَریالارې

بیردن بخش إله‌دیلر،

دۆنیا سنی قۏجالتدې،

قۏجالدېن دۆنیا کیمی،

گؤڲلۆن کَدَر’له‌ دۏلو –

چالخانان دَریا کیمی.

 

گلدی کَسدی قاپې‌نېن آغزېنې شؤهرَت’له آد.

إی بؤیۆک اوستاد،

هئیهات،

اۆره‌ڲینده‌ اۏ آدا، شؤهرَته‌ یئر واردې‌مې؟

مین بیر کَدَر ألیندن‌

اۏر‌دا یئر قالا‌ردې‌مې؟

گلدی جاوان بیر قېزېن

وعده‌سیز محبّتی،

گؤڲلۆنده‌ درد ألیندن‌

بو عئشقه‌ یئر واردې‌مې؟

بعضن ده‌ خواننده‌‌نین

جیلوه‌لندی صنعتی،

غزل‌لریندن آیرې

غزل اۏخوناردې‌مې؟

دۏغما سؤز‌لرینه‌ ده‌

قلبینده‌ یئر واردې‌مې؟

دۆنیا سنی قۏجالتدې –

جاوان گؤرۆنسۆن دئیه‌،

یانقېن‌لار تۆستۆسۆتک

آهېن اوجالدې گؤڲه‌.

 

سن اۏد توتوب آلېشدېن.

بو اۏدو قۏجا دۏغونون

هر یئریندن‌ گؤردۆلر –

گؤردۆ بو دۏغما یئرین.

بۆتۆن بو گئن دۆنیا‌نېن

گؤز‌لری گؤڲده‌ قالدې.

گؤڲ‌ ده‌ شفق‌لر ساچان

آهېنا باخدې، دالدې.

دئدیلر کی، فلک‌لر

یاراتمېشدېر بو اۏدو،

فقط بو اۏ‌دا یانان

فلک‌لر اؤزۆ اۏلدو.

باخېرام اوجا‌لاردان

گلیر فۆضولی سَسی.

گؤرۆنۆر اوجا‌لاردا

اۏنون نورلو ایزلری.

اۏ اولدوزلار

فۆضولی یانقې‌سې‌نېن کؤز‌لری،

اۏ گۆنَشده‌ فۆضولی اۏدونون نیشانه‌سی.