تۏرپاق اؤلکه‌سی / سیما نعمتی (شعر)

تۏرپJune 26, 2021اق اؤلکه‌سی / سیما نعمتی (شعر)

کالاشنیکۏف (کلاشینکف) سانجېلېب هر آددېمدا
آغاج‌لارېن گؤوده‌سینده گیزله‌نن
سیلااااح قۏرخوسوندا
شۆبهه‌لَنیر سئوینج!
گلن-گئدن سسینده دیکسینیر
گلیب، گئدن دینج خیال‌لارېن
سفئح دۆشۆنجه‌سی
باشماغېنا قۏشولان کامئرا
نفس‌لرینی سانایان میکرۏفۏن
حتتا
اۏتاغېنداکې گۆزگۆ
و…
هرنه
هرنه
هررررنه وارسا
آند ایچیر کی
سن
تک دَڲیل‌سن!

آرخایېن‌لېق آشېب-داشېر خيیاوان‌لاردان
پارادۏکس سانجېلانېر
قوجاغې‌نېن أمنییتینده
دۏداغې‌نېن قېپ-قېرمېزې سئللول‌لارېندا
قارا قانچېل اۏلور اؤپۆش هَوَسی
آاااخ
نه یامان کئفله‌نیب بو شهر
اؤز کئفی‌ ایله
یاشادېر، اۏینادېر، آلدادېر بیزی
بو یالانچې شهر
دیلنچی شهر…
یۏخسول کۆچه‌لرینده
سۆمسۆنۆر آج دویغولار
أسارت طهارتینده پاسلانېر اؤزگۆرلۆک
بوراسې “تۏرپاق” اؤلکه‌سی
أل ساخلایېن!
آمان دېر دستامازسېز قوجاقلاشمایېن…