آنا‌لېق / سودابه‌ فرضی (چئوری قېسا حیکایه‌)

آنا‌لېق / سودابه‌ فرضی (چئوری قېسا حیکایه‌)

🔁 چئویرن: آیهان میانالې

🎤 سس‌لَندیرن: مینا پورحیدر

آپارتمانېن تمیز‌لیڲینه‌ هر هفته‌ ۴-۵ یاشلې قېزې ایله‌ گلَن، گنج بیر قادېن دېر….

بو گۆن بؤلمه‌میزین دۆز قارشې‌سېندا چکدیڲی سیلپه‌نین (تئی) سَسی اوشاغې’یلا دانېشېغې‌نېن سَسینه‌ قارېشمېشدې…

بارماق‌لارېمېن اوجو’یلا، فوضوللوق منی بۆرۆمۆش سَس‌سیز بیر حالدا، گؤزچه‌نین (قاپې‌نېن باخېش باجاسې) آرخاسېنا کئچدیم. بیرینجی پیلله‌نین اۆزه‌رینده‌ بالاجا بیر مۏکئت قۏیوب، اوشاغې اۏنون اۆستۆنده‌ اۏتورتموشدو…

اوشاق:

-بوردان سۏنرا هارا گئده‌جه‌ییک؟

آنا:

-بوگۆن داها آرتېق باشقا بیر یئره‌ گئتمه‌یه‌جه‌ییک، شنبه‌‌لر خالا‌-خالا‌ اۏیونو کیمی بیر گۆن دیر، چۏخ ایشله‌میریک کییییی…

بیر آز سۏنرا اوشاق سۏروشور:

-صاباح هارا گئده‌جه‌ییک؟

آنا‌سې غریبه‌ بیر ذؤوق’له‌ یانېتلادې:

-صاباح سَحَرباشې بیر دؤنه پیلله‌لریندن زۆیۆب یئره‌ یېخېلدېغېم یئره‌ گئده‌جه‌ییک! اوشاق ایچی کئچه‌رَک گۆلۆر….

قولاقسانېرام…

دۏندورما آپارتمانې‌نېن نه‌ اۏلدوغونو باشا دۆشمۆرَم. آنجاق سۏنرا پاستیل ایله‌ چرزه‌ آپارتمانې‌نېن حاققېندا دانېشېرلار.

اوشاق بیر قارېشقا تاپېر…

بیرلیکده‌ قارېشقانې بیر کاغېذېن اۆزه‌رینه‌ یؤن‌لَندیریب، پیلله‌لرده‌کی گۆلدانېن دوراغېندا اۏنو اوشاق‌لارېنا قۏووشوب، اۏنلارا “منی آیاق آلتېندا أزیلمکدن بیر مئهریبان قېز قورتاردې” دئسین دئیه، یئندیریرلر.

بیزیم قاتېن تمیز‌لیڲی بیتیر…

أل-أله‌ وئریب آشاغې قاتا إنَرکن، بیر دؤنه‌ “یئر بادامې آپارتمانې‌نېن” آسانسۏروندا ایلیشیب قالدېق‌لارېندان دانېشېرلار.

بو آنا‌لېق إتمه‌ دادې داماغېمې شیرینسه‌دیر. آنا‌لېق إتمه‌ یالنېز دۏغوب، دۏیوروب، بسله‌ییب، گئییندیرمک دَڲیل ایمیش کییی!

آنا‌لېق إتمه‌، بالا‌سېنې ایکی‌دیللی اوشاق باغچا‌سېنا قۏیوب، مارکا‌لې گئییم‌لر أڲنینه‌ گئییندیریب، گۆنَش قارشې‌لېغې کرِم‌لر اۆز-گؤزۆنه‌ یاخېب، چئشیدلی اوشاق کیتاب‌لارې آلېب، شۏکویاستېق ایله‌ بال-بادام یئدیرتمک دَڲیل ایمیش کیییی.

چیرکین‌لیک‌لر اۏرتاسېندا گؤزَل بیر دۆنیا یاراتماق بیر آنانې آنا إدَر. و من اۏ آنانې ایزله‌ییردیم…!