دارېخمالارېم بیر داها یاشلاندې / آیهان میانالې (آنې‌لار)

 

دارېخمالارېم بیر داها یاشلاندې / آیهان میانالې (آنې‌لار)

سَحَرین لاپ اۏغلان چاغېندا، دان اولدوزو یئرین باختېنې سؤکمزدن، إویمیزده‌کی هاوایا قالخان های-کۆی سَسی یئددی قۏنشو اۏیانا گئدیب چاتمېشدې. شهرام دۏداق‌لارېنې بۆزه‌رَک، یوخوسوندان کسیک قالمېشدې، نَیّئر ایسه‌ بیبیم’له‌ چیڲین-چیڲینه‌ کیچیک یاتاق اۏتاغې‌نېن دووارېنا دایانېب، گؤز‌لرینده‌کی ایشېلتېنې گیزله‌ده‌ بیلمیردیلر. اۏ گۆن‌لر کیچیک عمیم ایله‌ بالاجا بیبیم بیزیم’له‌ بیر إوده‌ یاشایاردېلار. بیبی دئدیڲیمه‌ سیز قولاق آسمایېن، اۏ منیم لاپ اؤز باجېم ایدی. آنام اۏنا دا بیز‌لر کیمی جانې‌نېن شیره‌سینی أمیزدیرمیشدی. بو ایکیزه بَنزَر بالاجا باجې‌لارېن تئل‌لری، آلېن‌لارېنې اؤرته‌رَک، شیرین بیر گؤرۆنتۆ اۏنلارا باغېشلامېشدې. اۏ گئجه‌ بؤیۆک خالا‌م دا بیزه‌ گلیب، سَحَره‌جن آنامېن یانېندا قالمېشدې. حَیَط قاپې‌سې آچېلېب، آتام کیچیک عمیم ایله‌ ایچه‌ری‌ کئچدیلر؛ آرخا‌لارېندان ایسه‌ پوتلوغا بنزَر قابیله‌ اؤزۆنۆ سۆرۆیه‌-سۆرۆیه‌ حَیَطین قاران‌لېق باغرېنا سالېب، اؤوه‌ سارې گلدی. بو ایکیزه‌ اۏخشار قېزلار دا حَیَطه‌ سارې سئوینه‌-سئوینه‌ قاچېب، آتام’لا عمیمی سلاملادېلار. اۏنلار قاچارکن سانکی شَهَرین بۆتۆن قوش‌لارې ساچ‌لارې‌نېن دالغاسې’یلا اوچوشوردولار. بو بیبی-قارداشېن قېزېنا هر باخان اۏلسایدې، اۏنلارې کسگین بیر دورومدا ایکیز ساناردې. آتام اۆزۆنده‌کی‌ قالچاق‌لارې هئچ گیزله‌ده‌ بیلمَزدن اۏنلارا کیچیک بیر گۆلۆش’له‌ یانېت وئریب، آنام یاتان اۏتاغا سارې گئتدی. بتول خالا‌م آنامېن یانېندا اۏنون أل‌لرینی ألینده‌ ساخلایېب، دیلی‌نین اوجوندا نم هانسې دوعانې اۏخویوردو. آنام ایلان کیمی اؤزۆنه‌ قېورېلماغې باشلایېب، اینجه‌دَن سېزېلدایېردې. آتامېن اۆزۆنه‌ باخان اۏلسایدې اۏنون اۆزۆ’یله‌ دووارېن سالچېق‌لارېنې هئچ سئچمَزدی. آناما یاخېنلاشېب، اۏنون ألینی ایکی ألی’یله‌ توتوب، اؤنجه‌ اؤپۆب، سۏنرا آلنېنا مؤهۆر کیمی یاپېشدېرېب دئدی:

-بیرآز دا دؤزسن، بو آغرې‌لاردان قورتولا‌جاقسان، نیگاران قالما، داغ کیمی یانېندایام.

آتام بونلارې دئیَندن سۏنرا، آنامېن اۆز-گؤزۆنه‌ کیچیک بیر گۆلۆش قۏندو. شهرام دا یاواش-یاواش اؤزۆنۆ آناما یاخېنلاشدېرېب، سۏل ألی‌نین بارماق‌لارېنې بالاجا أل‌لری’یله‌ توتوب، آنامېن گؤزلرینه‌ باخېب دئدی:

-آنا منیم یۏلداشېمې بس ناواخت گتیریرسن؟

سۏنراسې گؤزلرینی قېسېب، بالاجا بیر گۆلۆشۆ یاناق‌لارېنا قۏندوراراق، سؤز‌لرینه‌ داوام إتدی:

-عمیم منیم’له‌ هئچ اۏینامایېر کی، یۏلداشېمې گتیرَن کیمی، تئیخا اۏنون’لا اۏینایاجاغام.

بتول خالا‌م بونلارې إشیدنده‌، گۆله‌-گۆله‌ شهراما دئدی:

-آنان سنه‌ شیب-شیرین بیر یۏلداش گتیره‌جک. گۆنَش دۏغان کیمی، اۏ دا گله‌جَک!

شهرام بونلارې إشیدیب، سئوینه‌رَک نَیّئر گیله‌ سارې قاچېب دئدی:

-آبجی آز قالېبدې آنام یۏلداشېمې گتیره‌!

سۏنراسې بالاجا بیر جۆجه‌ کیمی اؤزۆنۆ نَیّئرین قۏل‌لارېنا سالېب، آنام اۏلان اۏتاغا سارې اۏ گؤزَل گؤزلرینی زیلله‌دی.

ساعات اؤزۆنۆ سَحَره‌ چاتدېرېب، خۏروزون بانې’یلا کؤک‌لَنمک اۆچۆن، دؤرد نالا‌ چاپماقدایدې. اۏروجلوغون 17-نجی گۆنۆ گلیب چاتمېشدې. بو یایېن جان آلان ایستی‌سی بیر یانا، اۏروجلوغون لاپ چتین آنې‌لارې دا بیر یانا. ساعات یۏرقون گؤوده‌سینی سۆرۆیه‌-سۆرۆیه‌ گتیریب بئشه‌ چاتدېرمېشدې. آنام یاتان اۏتاقدا ݝـَریبه‌ بیر های-کۆی وار ایدی. بتول خالا‌م دا اۏتاغا کئچدی. زامان لاپ اؤزۆنۆ قېسمېش کیمی گؤرسه‌دیردی. ساعاتېن اوزوندان بیرآز کیچیک قۏلو، اؤزۆنۆ 38-نجی دقیقه‌یه‌ چاتدېردې. اۏتاقدان کؤرپه‌ آغلایېشې‌نېن سَسی اۏتاغې دَڲیل، بۆتۆن تنگه‌نی اؤزۆنه‌ بۆرۆدۆ. خالا‌م سئوینجیندن‌ اۏتاقدان إشیڲه‌ چېخېب، آتاما دئدی:

-ایبراهېم آغا موشدولوغومو وئر، تانرې سنه‌ بیر سارې‌شېن اۏغلان وئردی.

آتامېن گؤزلرینده‌کی‌ سئوینجی هرکس گؤرسه’یدی، آتا‌لېق سئوداسې‌نېن نه‌ اۏلدوغونو داها یاخشې باشا دۆشَردی.

آرتېق بو درد’له بسلنمیش دۆنیایا آیاق باسېب، گله‌جه‌ڲیمین چتین گۆن‌لری اۆچۆن تلسمه‌ڲه‌ باشلادېم.

42 یای کئچیردیب، چۏخ‌لارېنې ألدن وئردیم، چۏخ‌لارې ایسه‌ یاشامېما قاتېلدېلار. درین حسرت‌لری یاشادېم. گئجیکدیم، چاتمادېم، ایندی‌سه‌ بو یایېن لاپ جان آلان چاغېندا، یۏرقون بیر عسگر کیمی، کئچمیشه‌ حَسرَت قالېب، گله‌جه‌ڲیمدن أل اۆزمۆشم. هر شئی قاتما-قارېشېق اۏلوب. دۆزن پۏزولوب، اومودسوزلوق بولودو، سئوینج گۆنَشی‌نین اۆز-گؤزۆنۆ اؤرتۆ-باسدېر إدیب…

دۆنیا هامېمېزې دیدرگین إدیب، أن عزیز یاخېن‌لارېمېزې بیزدن آلدې. بو بؤیۆکلۆکده‌ دۆنیا، منه‌ دار بیر دوستاق کیمی گلیر. صاباحېن نه‌ اۏلدوغونو دا هئچ بیلمیرَم، ساده‌جه‌ 42 یاشېندا بیر قۏجایام، دیلَک‌سیزم، داها دۏغروسو، گلیم‌سیز بیر اؤگئی یازارام!

بونلارې گئجه‌نین بو واختې یازارکن آنامېن محبّت دۏلوسو قوجاغېنې اؤزله‌ییب، اۏنون آغارمېش بیرچک‌لرینه‌ دۆشۆنۆرَم. آتامېن اۆز-گؤزۆنه قۏنان قۏجالېق هنگامه‌سینه دۆشۆنۆرم، قَهَر آز قالېر منی بۏغا. بیرآن اۏنلارې ألدن وئرمک قۏرخوسو جانېما هۏپور، اۆشۆیۆرَم، جانېم لاپ آجېیېر. بتول خالا‌مې خاطېرلایېرام. آی‌لار اؤنجه‌ اۏنو دا ألدن وئردیم. اۆشۆیۆرَم، آغلایېرام، سېزلایېرام، قۏرخورام، 42 یاشېندا اۏلموشام…

10/08/2021  5:38 کر‌ج