اۏیان / شبنم أنور (شعر)

اۏیان / شبنم أنور (شعر)

ساچ‌لارېمېن قاران‌لېغېنا
آپارمېشدېم
اۆزۆم باغ‌لارې‌نېن
قېرمېزې شرابېندا بۏغاجاقدېم
قیامَتیم
سازې‌نېن تئل‌لرینده سس‌لَنیردیم
اؤلۆردۆم
قویلانېردېم
و سن
اؤپمۆشدۆن یوخولارېندا گؤزل قېزېن دۏداق‌لارېندان
آدېم کیلیسا دېر
آساجاقدېلار سنی
سایدېغېن
و اؤرگندیڲین اۆچۆن آدېمې
آسېلاجاقدېم یوخولارېوا گلدیڲیم اۆچۆن
اۏیان
اۏیات شاعیر
یارامېن ایچینده بیتن قاردَلَن گۆلۆ
مزارلېغېمدا یئر یۏخ دېر سازچې شاعیرلره
کیلیسا منم
سنی سۏنسوزلاشدېران ترسا
یوخولارېندا دۏلاشان روح
و سن
قانایاجاقسان یارالارېمدا بسله‌دیڲیم تیکان‌لارېن اۏرتاسېندا
اۏیان
آدېم کلیسا دېر
شهرین بۆتۆن گؤزه‌لرینده‌کی کۏکۏ شَنئل قۏخوسو
و سئومه‌ڲه عؤمرۆ یئتمه‌ڲن بیر قار چیچه‌ڲی
اۏیان ساچ‌لارېمېن قاران‌لېغېندا
و خاطېرلا منی بیتگی‌لرین یوموشاق‌لېغې
و مؤوسۆم‌لرین أن یاشېلې آراسېندا