قابارلې نفس‌لر / مهسا عبدالعلی‌زاده (شعر)

قابارلې نفس‌لر / مهسا عبدالعلی‌زاده (شعر)

  دؤیۆش مئیدانې دېر سانکی مکتوب‌لارېم
  و شعرلریم
     عسگرسیز سنگرلری
بورادا  یالنېز منم
     یالنېز من
  و شقیقه‌م’له آداخلانمېش بیر قورشون
 اۆره‌ڲینده
 أرکین سؤزجک‌لر قانادلانمېش
 بورادا اینتیحار فلسفه‌سی تۆستۆلنمیش!!!
 قورشون آچېلېر…
  آچېلېر ضییاء پنجره‌سی
   و دلیک-دئشیک‌لَنیر شاعیرلیڲیم
 بورادا سؤزجۆک‌لر شهید
       شعرلر قان قوسورلار…
و بیر قادین
 شرافت جنازه‌سی چیڲنینده
        اؤلۆم مئیدانېندا دورموش
 ایت قۏخولو تۏپراغېن ایزی
                     قېیناق‌لارېندا
هؤنکۆرۆر 
          “قابارلې نفس‌لری”
 و قېرمېزې آژیر چکیلیر سانکی
        هارای‌لارېندان
کیریـییر دۏداق‌لارېم
               قۏرخولارېندان
بورادا اینتیحار فلسفه‌سی تۆستۆلَنمیش
  و گؤز یاش‌لارېم
     کیپریک‌لریمدن آسېلې…
      و من
 گئجه قوجاغېندا اۏتورموش
 یازېرام
  دؤیۆش مئیدانې دېر سانکی
         مکتوب‌لارېم
                و شعرلریم…

 13/11/1391
گئجه ساعات /3:22