یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
پایېز قادېن… / قمر سؤزآی (شعر)
إح‌ح… پایېز قادېن
آرزې‌لارېن تؤکۆلدۆ گؤزلریندن
خزان یارپاق‌لارې کیمی…
دویقو‌لارېن قوجاقلادې
سَس‌سیزلیڲین قلبینی…
سارېلدېغېن ظۆلمتین
بۏغولدون قاران‌لېغېندا…
عۆنوان‌سېز‌لېغېندا جان وئردی روحون…
توش گلدی عؤمرۆن…
گؤره‌سن، نه واخت‌سا
سۏن بیر کَدَر’له
سۏنا چاتاجاق‌مې
بو بدبخت‌لیک یوخون…
هر گۆن اینتیهار إتدی اومودلارېن
گله‌جه‌ڲین بۏینوندان
آسدې آجې گرچک‌لرینی…
هانسې بیر دایاناجاقدا ایتیردین
اۆزه‌رینده گنج‌لیک نَفَسی قالمېش
آرزې‌لارېنې، ایستک‌لرینی…
نه‌دن سئوگییه قوربان وئردین
آزادلېغې‌نېن باکیره‌لیڲینی…
ایندی ایسه گئت…
گئت… پایېز قادېن…
سارېل اؤزۆندن ده بؤیۆک
پایېزېن بۏینونا…
قوجاقلا عؤمرۆند‌ن تؤکۆلن
آجې ایل‌لرین خزانېنې…
ألینی سۏن دفعه
آپار قولاغې‌نېن دیبینه…
سؤیله طالئعی‌نین
سۏنونجو آذانېنې…
