ایندی گل! / سحر روحی (شعر)

ایندی گل! / سحر روحی (شعر)

گؤز یاش‌لارېمېن گمی‌سی اۏلموشام!
یاواشجا اؤزۆنده غرق اۏلان گمی
یوخولارېما گلیب، گئدیرسن،
أڲنیم، أڲنیمده دارېخېر!
دېرناق‌لارېم’لا اۆزۆم قان ساواشې باشلادېرلار
گلنده یاواش گل، بیلمه‌سینلر قاداسې
آرامېزدا قالسېن، سن گلسن دئیه
پنجره‌مین آرخاسېنداکې قارقالارا گؤزلریمی نذر إتمیشم
شعرلریمی یاسدېغېمېن آلتېندا گیزله‌دنـدن، یاتاغېم دا شاعیر اۏلوب
اۏتاغېن باشې دؤنۆر
سنی دۆشۆنَنده…
گئجه‌لر خیال‌لارېنې اۆستۆمه چکیب یاتېرام
کیمه نه؟
اییـین تَنیمه یاتسېن دئیه…
بیر قېرمېزې رۏژ اۏغورلامېشام
یۏرقانېن آلتېندا اۏندان سۆرۆب، گۆناه‌لارېمېزا فیکیرلَشیرم
قار آلتېندا أل-أله دۏلاشمېشدېق‌مې بیز؟
هئچ یاغېش آلتېندا، گؤره‌سن اؤپۆشمۆشدۆکمۆ بیز؟
یادېوا گلیرمی، یادېما گلمه‌دیک‌لریم؟
هر اۆره‌ڲین آرزې‌سې اۏلان قېزې قۏجالتدېن سن
داها سۏنرالار وئجه گلمیر، داغېدېر
گؤزله‌مک کیمی.
ایندی گل قاداسې‌
داها هئچ آلېشېغېم یۏخ دېر،
کیتاب‌لارېمې اۏخویوب، قورتارمېشام
سطیر-سطیر کۆچه‌لرینی تانېیېرام‌
هر آخشام گلن آذان سَسینی ده أزبر اۏلموشام
سۏنرا یۏخ،‌
ایندی گل قاداسې!
هئچ بیلیرسن هارا گله‌جه‌ڲینی؟
بوراسې دلی‌خانا دېر، هر گئجه سۏیوق دووارلار’لا اؤپۆشدۆڲۆم یئر.
گلیرسَن تئز گل!
“سَحَر” اۏلمازدان گل!
دان اولدوزو، کۆچه‌میزدن کؤچمه‌میش گل!
ایندی گل قاداسې!