اۏیاندېقجا چۏخالېرېق، چۏخالدېقجا اوجالېرېق! / آیهان میانالې

اۏیاندېقجا چۏخالېرېق، چۏخالدېقجا اوجالېرېق! (آیهان میانالې)
یئنه مارت آیې‌نېن سککیزی یۏلدان یئتیشیب، اۏرتام‌لارېمېزېن بۏیاغېنې دَڲیشدیردی. بو دؤنه کئچمیش‌لره گؤره داها فرقلی دیر. ییرمی ایل اؤنجه‌یه بیر باش وورساق، اۏ دؤورده بارماق سایې‌سې قادېن یازارېمېز یۏخ ایدی. هر ایل کئچدیکجه، بیزیم میللت اۏیانېب، اۏیاندېقجا دا، یئنی قَلَم‌لر ایشېق اۆزۆ گؤردۆ. هر سطیر یازېلدېقدا، ایلک باشدا آنا دیلیمیز گۆج‌لَندی، آردېندان دا قادېن‌لارېمېز ایل‌لر بۏیو ایتیردیک‌لری اؤز گۆوَنجی نئچه قات گۆجلو ألده إتدیلر. قادېن گۆج‌لَندیکجه، بیزیم میللتین گۆجۆ ده ایکی قات آرتدې. داها آرتېق قادېن‌لارېمېز آیاق آلتېندا أزیلَن گؤرگه‌دن إشیڲه چېخېب، گَرچَک بیر قادېنېن سیمگه‌سینه چئوریلدیلر. اۏنلار اۏیاندېلار، اۏنلار چۏخالدېلار، اۏنلار اوجالدېلار و بو اوجالېقدان آسېلې، یۆزلرجه آنا دیلیمیزده یازار-شاعیر-هۆنرمن سس‌لَنیب، سسیمیزی دۆنیانېن قولاغېنا چاتدېردېلار.
اۏ گۆنۆ آرزې إدیرم کی اۏندا، کیشی-قادېن چیڲین-چیڲینه آیاق آلتېندا تاپدالانمېش یاسال حاق‌لارېمېزې ألده إدیب، گۆوَنج-أمنیت-محبت دۏلوسو بیر اۏرتامې، گله‌جک اوشاق‌لارېمېزا پای وئره‌لر. اۏ گۏن گلیرسه، بیر قادېن دۏغال حاق‌لارېنې ألده إتمک اۆچۆن دَڲیل، بؤیۆک باشارې‌لارې اۆچۆن یاشامېن-أوره‌نین ساواشېنا چېخاجاق!.
2022-03-08 کرج