یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
آتامېن گؤزلری / ویدا حشمتی (شعر)
یئنه بو شَهَرین کؤرپه‌جیڲی
قارا بولودلارا بَلَنمیش
“آجې”دان آخېر مله‌یَن آغرې‌لارې
شهناز خیاوانېندا بایرام عطرینی
چؤهرایی جام‌لاردا ساتېر اۏ قېزجېغاز
کۆلک‌لره ساورولموشدو
باتېق چارقادې
تۏرباسېندا، تۏخونما آلما-
گۆنه‌باخان‌لارې سارپ-سارې…
إل گؤلۆنۆن یاناق‌لارې دا
سیلله ایله قېزارېب،
یۏخسا لاله‌لر تیکان‌لارېن کؤلگه‌سینده قالمازدې.
قارانقوش‌لار دا گتیرمه‌دی
نار قېزلارېن اؤپۆش‌لرینی.
یئنه بو شَهَرین بایرامې
آجېقلانېبدېر آتامېن بۏم-بۏش گؤزلرینده….
