یئنی یازې‌لار / Yeni Yazılar
آنا صفحه Ana Səhifə / ادبیات / Miyanalılar / باهار / جلال اکبری (شعر)

باهار / جلال اکبری (شعر)

1F
باهار / جلال اکبری (شعر)

“سایېن أرشد نظری جناب‌لارې‌نېن باهار شعرلرینه بیر تضمین”

بیر شاختا ألینده بوزلورام باهار
چیچه‌ڲین آغرې‌سېن سېزلېرام باهار
شافاقلې گۆنَشی ایزلیرم باهار
چۏخدان دېر یۏلووو گؤزلۆرَم باهار
گلنده بئله گل قېشا اۏخشاما

سنین’له داغ‌لارېم اۏلاجاق گؤزل
اۏندا دېر شلاله اۏخوسون غزل
قۏرخورام یۏل‌لارې باغلېیا خزل
گلیرسن یاشېللې مَحَبّتلی گل
ظالېما أڲیلمیش باشا اۏخشاما

سئوگی‌دن آرالې کدر دامېرام
سئوگی‌سیز جننته گؤزۆ یومورام
اینتیظار چکه‌رک، غمه جومورام
من سنین آدېندان سئودا اومورام
دویقوسوز٬ دیل بیلمَز داشا اۏخشاما

گل یاشېل‌لېق گتیر چؤله چیمَنه
جان باغېشلا سندن اؤترۆ اؤله‌نـه
اؤز موشدولوغووو اؤزۆن وئر منه
اۆرَک پنجره‌مدن باخېرام سنه
اومودسوز گؤزلرده یاشا اۏخشاما

گۆنش اؤزۆن شاختا قارا بیلدیریب
بنؤوشه بۏرانېن بئزمه‌ین گؤرۆب
أل‌لرین آرزېمېن ساچ‌لارېن هؤرۆب
چیچک‌لر گؤزل‌لیک خبرین وئریب
کۏر گؤزۆن اۆستۆنده قاشا اۏخشاما

بۆلبۆل حسرت چکیر گۆل بوداغېنا
اوچا بیلمیر آنجاق اومود باغېنا
سنی آند وئریرم یاشېل چاغېنا
سنی آند وئریرم گؤڲ قورشاغېنا
قانادې قېرېلمېش قوشا اۏخشاما

دۏکتۏر أرشد إله دایاق ایفتیخار
“چکمه‌لی هاوا”سې شاهکاردې شاهکار
“جلال” اۏندان درسین آلېب سؤز یازار
چۏخدان دېر یۏلووو گؤزلۆرم باهار
گلنده بئله گل قېشا اۏخشاما

یازار / Yazar : آیهان میانالیAyhan Miyanalı

بو یازېنې دا اۏخویون /Bu Yazını da Oxuyun

1F

قۏرخو / امین ناصری (حیکایه)

قۏرخو / امین ناصری (حیکایه) سۏیوغون قاباغېنې آلسېن دئیه پنجره‌یه توتولان نایلۏن شاققېلدایېردې! بالکۏن‌دان آسلانان …


Warning: count(): Parameter must be an array or an object that implements Countable in /home/yeniqapi/public_html/wp-includes/class-wp-comment-query.php on line 399

Leave a Reply

Your email address will not be published. Required fields are marked *