بایرام‌لېق! / ارشد نظری (حیکایه)

بایرام‌لېق! / ارشد نظری (حیکایه)
کئچمیش ایل‌لره تای، بایرام گؤرۆشۆنه دۏست‌لارېن بیری‌نین إوینه گئتدیک. بایرام قایدالارېنې یئرینه یئتیرَندن سۏنرا، دۏستومون قېزې گلیب قوجاغېمدا اۏتوردو. اۆزۆندن اؤپه‌رَک، یاواشجا ألیمی جیبیمه آپاردېم کی بایرام گؤرۆشۆنۆ رسمی‌لَشدیرم. دئمک بیزدن اؤنجه، نئچه بایرام گؤرۆشچۆلری ده اۏتورموشدولار. دۏستومون خانېمې قاباقدان گلمیش‌لیک إله‌ییب دئدی: عمی‌سی زحمت چکمه، سئودا سنین ساغ‌لېغېوې ایسته‌ییر. دئدیم: یۏخ، یۏخ ایلده بیر یۏل بایرام اۏلور. بایرام چۏخلو اوشاق‌لارېنکې دېر. اۏلمازکی من قېزېما بایرام‌لېق وئرمه‌یم. بۆتۆن اۏتوران‌لارېن گؤزلری منیم ألیم’له بیرلیکده جیبیمه دۏلموشدولار. کاش ألیمی جیبیمه سالمایایدېم. دئمه بایرام گؤرۆشۆ پول‌لارېنې نئچه قاباقکې إولرده پایلایېب، قورتارمېشدېم. ألیم جیبیمده یوباندې. إله کی ألیمی جیبیمدن چیخاردا بیلمیردیم. باشقا قۏناق‌لارېن یاواش-یاواش هامې‌سې بیلدیلر. سئودانېن آناسې آیلار خانېم دال با دال دیل تؤکۆردۆ کی: سن آللاه عمی‌سی نییه زحمت چکیرسن، ایسته‌مز!
منی سۏیوق تر یویوب آپارېردې. ألیمی جیبیمدن قۏپاردا بیلمیردیم.
بیزیم إو آدامې باشا دۆشدۆ کی…
دئدی: نئیلَک عمی‌سی، سۏنرا سئودانېن خجالت‌لیڲیندن چېخارسان. باشېمې آشاغا سالمېشدېم کی ایش بوندان آرتېق خاراب اۏلماسېن، إو آدامې چالېشدې کی صحنه‌نی دَڲیشسین؛ من ده ساغ‌اۏللاشدېم، إودن إشیڲه چېخماق ایسته‌دیک. هالېن بو باشېندان اۏ باشېنا نه اوزون یۏلویموش. بۆتۆن اۏتوران‌لار دۏستومون إوی’یله بیرلیکده باشېما فېرلانېردې. تله‌سیردیم کی بو سئناریۏ تئز باشا چاتسېن. چۏخ تَلَسمَک یئنه ألیمه بیر ایش وئردی. هالېن چېخېش قاپې‌سېنې ایتیردیم. آچدېغېم قاپې دئمه آیاق یئری‌نین (تووالئتین) قاپې‌سې ایمیش. دای بو دؤنه بیر کیمسه گۆلمه‌ڲی‌نین قاباغېنې آلابیلمه‌دی؛ من ده قۏناق‌لارا قۏشولوب اؤزۆمه گۆلدۆم.